កំពង់ឆ្នាំង ៖ រទេះគោខ្មែរ ដែលធ្វើឡើងអំពីឈើល្អនានា តាមរចនាប័ទ្មខ្មែរពីបុរាណ ដែលជាកេរ្តិ៍មរតកបេតិកភណ្ឌជាតិសម្បត្តិវប្បធម៌ខ្មែរ ត្រូវបានអ្នកស្រុកនៅក្នុងភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ប្រមូលទិញពីតាមមូលដ្ឋានជនបទ យកមកជួសជុល លក់អោយអតិថិជនដែលភាគច្រើនគឺជាអ្នករស់នៅក្នុងទីក្រុង យកទៅតាំងលម្អនៅក្នុងភូមិឋានរួមចំណែកថែរក្សាសម្បត្តិវប្បធម៌របស់ជាតិ ទុកអោយក្មេងជំនាន់ក្រោយបានស្គាល់កុំអោយបាត់បង់។
នៅព្រឹកថ្ងៃទី១២ ខែមិថុនានេះ លោក មាស សុវណ្ណារី អាយុ២៧ឆ្នាំ ជាអ្នកប្រមូលទិញរទេះគោចាស់ៗនៅតាមមូលដ្ឋានជនបទយកមកជួសជុលលក់បានអោយដឹងថា ៖ លោកទើបតែចាប់យកមុខរបរខាងលើនេះ ក្នុងឆ្នាំ២០១៨នេះទេ ព្រោះថាមានអ្នកនៅទីក្រុងមួយចំនួនបានកុម្ម៉ង់ទិញរទេះគោខ្មែរកន្លងមក ដើម្បីយកទៅដាក់តាំងលម្អនៅក្នុងភូមិដ្ឋានទុកអោយកូនចៅបានស្គាល់ ព្រោះថាមកដល់ពេលនេះ ប្រជាពលរដ្ឋភាគច្រើនលែងប្រើរទេះគោនេះទៀតហើយ គឺពួកគាត់នាំគ្នាមកប្រើប្រាស់គោយន្តជំនួសវិញ។
លោក មាស សុវណ្ណារី បានអោយដឹងទៀតថា ៖ រទេះគោចាស់ៗទាំងនេះ ដែលលោកបានទិញមកក្នុង១គ្រឿងមានតម្លៃពី២០ម៉ឺនទៅ៤០ម៉ឺនរៀល តាមការខូចតិច ឬខូចច្រើន ហើយបានជួលជាងមកជួសជុលដំឡើងអោយល្អឡើងវិញ ដោយអស់ថ្លៃឈ្នួលពី៣០ម៉ឺនទៅ៤០ម៉ឺនរៀល ទើបលក់ចេញបាន ហើយពេលលក់ចេញទៅវិញក្នុង១គ្រឿងៗមានតម្លៃពី៣០០ទៅ៤៥០ដុល្លារតាមប្រភេទឈើធ្នង់ ឬឈើគ្រញូង ដែលភាគច្រើនគឺបានលក់ដាច់នៅមុនថ្ងៃចូលឆ្នាំខ្មែរតែប៉ុណ្ណោះ។
ដោយឡែកលោកពូ សំ ប៊ុនលី ជាជាងជួសជុលរទេះគោ បានអោយដឹងថា ៖ លោកបានស៊ីឈ្នួលជួសជុលរទេះគោខាងលើនេះ ជិត១ឆ្នាំហើយ ដោយគិតតម្លៃឈ្នួលក្នុង១ថ្ងៃ២៥.០០០រៀល និងពេលខ្លះការជួសជុលរទេះគោមួយៗនេះ អាចប្រើរយៈពេលជួសជុលពី៥ថ្ងៃទៅ១អាទិត្យ តាមរទេះគោខូចតិច ឬខូចច្រើន។
លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងបានអោយដឹងថា ៖ រទេះគោខ្មែរគឺជាសម្បត្តិបេតិកភណ្ឌជាតិ ដែលបានកើតមានតាំងពីមុនសម័យអង្គររាប់ពាន់ឆ្នាំមកហើយ គឺជាស្នាដៃបុព្វបុរសខ្មែរយើង ជាក់ស្តែងដូចមានរូបចម្លាក់នៅលើប្រាសាទអង្គរវត្តមាន រទេះគោ រទេះសាឡីដឹកស្តេច រទេះសេះចម្បាំង និងរទេះដឹកកាំភ្លើងធំជាដើម គឺជាស្នាដៃរបស់ដូនតាខ្មែរ គប្បីកូនខ្មែរយើងនាំគ្នារក្សាទុកស្នាដៃនេះកុំអោយបាត់បង់ គឺបើវប្បធម៌រលំជាតិរលាយ វប្បធម៌ពណ្ណរាយ ជាតិពិតជារុងរឿង៕
Source: Kampuchea Thmey Daily
0 Comments