ភ្នំពេញ ៖ នៅវេលាម៉ោង៩និង៣០នាទីព្រឹកថ្ងៃ ថ្ងៃទី១២ ខែមិថុនា ឆ្នាំ២០១៨ នេះ នៅទីស្ដីការក្រសួងការបរទេសកម្ពុជា លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បានអញ្ជើញចូលរួមពិធីប្រគល់ថវិការបស់UN ជូនគ្រួសារសពលោកសួន សំបូរ ដែលបានពលីជីវិតក្នុងតំបន់បេសកកម្មនៅសាធារណរដ្ឋម៉ាលី ហើយពិធីនេះ ក៏មានការអញ្ជើញចូលរួមពីលោក សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសំអាតមីននិងកាកសំណល់សង្គ្រាមផងដែរ។
លោកឧត្តមសេនីយ៍ សែម សុវណ្ណនី អគ្គនាយក មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាម បានថ្លែងបញ្ជាក់ថា ចាប់ពីឆ្នាំ២០១៤ រហូតមកដល់ពេលបច្ចុប្បន្ននេះ កងកម្លាំងកម្ពុជាចំនួន០៩នាក់ បានទទួលមរណភាព និងពលីជីវិត និងរងរបួសចំនួន១១នាក់ ដោយជំងឺគ្រុនចាញ់គ្រោះធម្មជាតិ គ្រឿងផ្ទុះកែច្នៃ ជាពិសេសការវាយប្រហារដោយក្រុមប្រដាប់អាវុធក្នុងសាធារណអាហ្វ្រិកកណ្តាល។
លោកបានបន្តថា គិតចាប់ពីឆ្នាំ២០០៦ រហូតមកដល់បច្ចុប្បន្នមជ្ឈមណ្ឌលជាតិ បានបញ្ជូនកម្លាំងមួកខៀវកម្ពុជាចំនួន ៥៤៨៦នាក់ ក្នុងនោះស្ត្រី២៥៤នាក់ ទៅចូលរួមបណ្ដាបេសកកម្មចំនួន១០ ក្នុងប្រទេសចំនួន៨ រួមមាន ស៊ូដង់ ស៊ូដង់ខាងត្បូង ឆាដ អាហ្វ្រិកកណ្តាល លីបង់ ស៊ីរី សាយប្រឺស និងម៉ាលី។ បច្ចុប្បន្នកម្លាំងមួកខៀវកម្ពុជាចំនួន ៨១៣ ស្ត្រី៦១នាក់ កំពុងបំពេញបេសកកម្មនៅ ស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី៕
Source: Kampuchea Thmey Daily
0 Comments