ភ្នំពេញ ៖ ពិធីពិនិត្យព្យាបាលជំងឺដោយឥតគិតថ្លៃ របស់ក្រុមគ្រូពេទ្យនៃអង្គការស្ម័គ្រចិត្តជុំវិញពិភពលោក ជូនដល់ប្រជាពលរដ្ឋសង្កាត់គោករកា ក្នុងខណ្ឌព្រែកព្នៅ រាជធានីភ្នំពេញ កាលពីថ្ងៃទី០៦ ខែមិថុនា ឆ្នាំ២០១៨ ដែលមានការចូលរួមពី លោកម៉ុម ជឹនហ៊ុយ ប្រធានគណៈកម្មការនៃព្រឹទ្ធសភា លោកសុខ សម្បត្តិ អភិបាលនៃគណៈអភិបាលខណ្ឌព្រែកព្នៅ លោកភក្តី ប្រធានគ្រូពេទ្យស្ម័គ្រ និងនិងពេទ្យបរទេសជាច្រើនរូបទៀតផងដែរ។
ដើម្បីបំពេញទៅតាមតម្រូវការចង់បាន របស់បងប្អូនប្រជាពលរដ្ឋក្នុងមូលដ្ឋាន ដែលខ្វះខាតថវិកាក្នុងការព្យាបាលជំងឺ ក្រុមគ្រូពេទ្យនៃអង្គការស្ម័គ្រចិត្តជុំវិញពិភពលោក បានបើកពិនិត្យព្យាបាលជំងឺដោយឥតគិតថ្លៃ ជូនបងប្អូនប្រជាពលរដ្ឋក្នុងសង្កាត់គោករកា ពេញមួយថ្ងៃតែម្តងនៅក្នុងវត្តឈូកវ៉ា។
ថ្លែងនៅក្នុងពិធីបើកការពិនិត្យ និង ព្យាបាលនេះលោកភក្តី ប្រធានគ្រូពេទ្យនៃអង្គការស្ម័គ្រចិត្តជុំវិញពិភពលោក បានលើកឡើងថា យុទ្ធនាការនេះគឺជាយន្តការសុខភាពមួយដ៏សំខាន់របស់គ្រូពេទ្យនៃអង្គការស្ម័គ្រចិត្តជុំវិញពិភពលោក ក្នុងការចូលរួមចំណែកនៅក្នុងសកម្មភាពមនុស្សធម៌ ជាមួយនឹងការផ្តល់ការព្យាបាល ការប្រឹក្សានិងការលើកកម្ពស់សុខមាលភាព របស់ប្រជាពលរដ្ឋកុំឲ្យមានជំងឺទាំអស់គ្នា ដោយព្យាបាលឥតគិតថ្លៃឡើយ។
ចំណែកលោកសុខ សម្បត្តិ បានលើកឡើងថា សុខភាពគឺសំខាន់ណាស់សម្រាប់មនុស្សគ្រប់រូប ហើយក្នុងនាមលោកជាអាជ្ញាធរខណ្ឌព្រែកព្នៅ លោកនិងបង្កលក្ខណៈងាយស្រួលដល់ក្រុមគ្រូពេទ្យអង្គការស្ម័គ្រចិត្តជុំវិញពិភពលោក ក្នុងការចុះមកជួយព្យាបាលប្រជាពលរដ្ឋដោយឥតគិតថ្លៃនេះ ហើយការព្យាបាលនេះប្រជាពលរដ្ឋគ្រប់រូបក៏អាចមកពិនិត្យនិងព្យាបាលជំងឺទូទៅបានផងដែរមិនប្រកាន់និន្នាការនយោបាយអ្វីឡើយ ក្នុងនោះផងដែរលោកសុខ សម្បត្តិ ក៏បានសូមសំណូមពរដល់លោកភក្តី ប្រធានក្រុមគ្រូពេទ្យអង្គការស្ម័គ្រចិត្តជុំវិញពិភពលោក មកពិនិត្យនិងព្យាបាលប្រជាពលរដ្ឋក្នុងខណ្ឌព្រែកព្នៅជាបន្តបន្ទាប់ទៀត បន្ទាប់ពីគម្រោងលើកទី១នេះត្រូវបានបញ្ចប់ហើយនោះ។
ដោយឡែកលោកម៉ុម ជឹនហ៊ុយ បានមានប្រសាសន៍ថា សុខភាពជាទន់មួយដ៏សំខាន់របស់មនុស្សយើងគ្រប់គ្នា មនុស្សយើងបើសុខភាពមិនល្អហើយ គឺមិនអាចធ្វើបានដូចបំណងនោះឡើយ។ ដូចមានពាក្យគេនិយាយតៗគ្នាថា ក្រកុំទាន់ភ័យប៉ុន្មានទេ តែកុំឲ្យតែមានសមាជិកក្នុងក្រុមគ្រូសារណាម្នាក់ឈឺឲ្យសោះ តែមានជំងឺហើយគឺពិតជាពិបាកត្រួតលើពិបាកជាក់ជាមិនខាន ហើយជីវភាពក៏មិនមានការវិវត្តឲ្យបានល្អប្រសើរនោះដែរ។
លោកបន្តថា ការធ្វើសកម្មភាពមនុស្សធម៌នេះ និងរីកសាយភាយពេញប្រទេសកម្ពុជា និងទូទាំងពិភពលោក ហើយលោករីករាយនិងសហការ ព្រមទាំងសម្រួលដល់ការពិនិត្យ និងព្យាបាលនេះឲ្យយបានរលូនដូចការគ្រោងទុក៕
Source: Kampuchea Thmey Daily
0 Comments