សភា​ប៉េ​រូ​បញ្ឈរជើង​លោក Fujimori ប៉ុន្តែ​ទុក​ឲ្យ​គាត់​មានជីវិត​ផ្នែក​នយោបាយ

សភា​ប្រទេស​ប៉េ​រូ​បាន​បញ្ឈរជើង​សមាជិកសភា​លោក Kenji Fujimori កាលពី​ល្ងាច​ថ្ងៃ​ពុធ​ជុំវិញ​ការចោទប្រកាន់​ពីបទ​ពុករលួយ ​ប៉ុន្តែ​ខ្វះ​ចំនួន​ចាំបាច់​ដើម្បី​បណ្តេញ​គាត់​ដែលជា​ផ្នែក​មួយ​នៃ​ការប្រយុទ្ធ​ជាមួយ​បងស្រី​របស់គាត់​ដើម្បី​គ្រប់គ្រង​លើ​វង្ស​ត្រកូល​នយោបាយ​របស់​ឪពុក​។​

បន្ទាប់ពី​ការជជែក​ដេញដោល​រយៈពេល​១១​ម៉ោង​នៅក្នុង​សម័យប្រជុំ​ពេញអង្គ​មួយ​, សមាជិកសភា​៦១​រូប​បាន​បោះឆ្នោត​បញ្ឈរជើង​កូនប្រុស​ពៅ​របស់​អតីត​ប្រធានាធិបតី Alberto Fujimori​។​
​
ប៉ុន្តែ​ក្រោយមក សមាជិកសភា​ជាច្រើនរូប​បាន​ដើរចេញ​ហើយ​ប្រធាន​អង្គ​ជំនុំ​លោក Luis Galarreta បាន​ផ្អាក​សម័យប្រជុំ​ដោយ​លើកឡើង​ពី​កង្វះ​ចំនួន​ចាំបាច់​មុនពេល​ពួកគេ​អាច​បោះឆ្នោត​លើ​ញត្តិ​មួយ​ដើម្បី​បណ្តេញ​លោក Fujimori តាម​ការស្នើសុំ​ពី​គណបក្ស​របស់​បងស្រី​គាត់​និង​ជា​គូប្រជែង​គឺ​លោកស្រី Keiko Fujimori ។​
​
លោក Kenji Fujimori បាន​និយាយ​បន្ទាប់ពី​ការបោះឆ្នោត​ថា “​ខ្ញុំ​និយាយ​រឿងនេះ​ទៅ​បងស្រី​របស់ខ្ញុំ​។ នៅទីនេះ​អ្នកមាន​ក្បាល​របស់ខ្ញុំ​។ យើង​គឺជា​ជនរងគ្រោះ​នៃ​ភាព​ដឹកនាំ​ផ្តាច់ការ​សភា​”​។​
​
លោក Fujimori អាយុ​៣៨​ឆ្នាំ​ត្រូវបាន​គេ​ចោទប្រកាន់​ពីបទ​ប៉ុនប៉ង​ទិញ​សន្លឹកឆ្នោត​ដើម្បី​ធ្វើ​ឲ្យ​អតីត​ប្រធានាធិបតី​លោក Pedro Pablo Kuczynski អាច​គេចវេះ​ពី​ការចោទប្រកាន់​បាន​។ ទោះបីជា​យ៉ាងណាក៏ដោយ លោក Kuczynski បាន​លាលែង​ពី​តំណែង​កាលពី​ខែមីនា​។​
​
នៅពេលដែល​លោក Fujimori លែង​ចូលរួម​មហាសន្និបាត​ហើយ​ស្ថិតក្រោម​ការស៊ើបអង្កេត​នោះ​, ការបោះឆ្នោត​កាលពី​រាត្រី​ថ្ងៃ​ពុធ​បាន​ក្លាយជា​ជ័យជម្នះ​សម្រាប់​បងស្រី​របស់គាត់​ក្នុងការ​ប្រយុទ្ធ​ដើម្បី​គ្រប់គ្រង​កេរ្តិ៍ដំណែល​នយោបាយ​រប​ស់​ឪពុក​ឈ្មោះ Alberto ។​
​
ប៉ុន្តែ​លោក Fujimori មិនត្រូវ​បាន​គេ​ដកសិទ្ធិ​ពី​នយោបាយ​ទេ​ហើយ​គាត់​និង​បងស្រី​របស់គាត់​អាច​ប្រឈមមុខ​ដាក់គ្នា​ទៅវិញទៅមក​ក្នុងការ​បោះឆ្នោត​ប្រធានាធិបតី​ឆ្នាំ​២០២១​។​
​
គួរ​បញ្ជាក់ថា បន្ទាប់ពី​ការបោះឆ្នោត​បញ្ឈរជើង​គាត់​, ពាក់​កណ្តាល​នៃ​សមាជិកសភា​ក្នុង​អង្គ​ជំនុំ​បាន​ដើរចេញ​ដោយ​បន្សល់ទុក​នៅតែ​អ្នកគាំទ្រ​បងស្រី​របស់​គាត់​ប៉ុណ្ណោះ​។ នោះ​មានន័យថា មិនមាន​ចំនួន​គ្រប់គ្រាន់​ដើម្បី​បោះឆ្នោត​លើ​ការ​បណ្តេញ​លោក Fujimori ទេ​៕ AFP

​

Source: Kampuchea Thmey Daily