ក្រុមជើងឯកឆ្នាំចាស់បឹងកេត និងជាម្ចាស់ជើងឯក៣សម័យកាល ក្នុងពានរង្វាន់លីគកំពូលកម្ពុជា (Metfone Cambodian League) មិនទាន់ពិចារណារឿងដោះដូរកីឡាករនៅក្នុងទីផ្សារដោះដូរកីឡាករជើងទី២ នៅចុងខែមិថុនា នេះនោះទេ ដោយក្លិបអាចប្រើប្រាស់កីឡាករចាស់ដែលបានចុះបញ្ជីកាលពីជើងទី១ គ្រប់គ្រាន់ហើយ។
លោក ហៅ សុជាតិ គ្រូបង្វឹករបស់ក្រុមដែលមានប្រភពមកពីខេត្តកំពង់ចាម មួយនេះបានបញ្ជាក់ថា «មកដល់ពេលនេះយើងមិនទាន់បានសម្លឹង ឃើញកីឡាករណាទេ ហើយយើងក៏មិនទាន់បានរៀបចំដែរ ព្រោះថាកីឡាករយើងគឺគ្រប់គ្រាន់ហើយសម្រាប់លីគកំពូលកម្ពុជា។ ចំពោះពានរង្វាន់សម្តេចតេជោ ហ៊ុន សែន វិញ គឺអាចមានបញ្ហាបន្តិចបន្តួចតែខ្ញុំជឿថា ពួកគាត់អាចលេងបាន»។
សូមបញ្ជាក់ថា យោងតាមលិខិតផ្លូវការដែលចេញដោយគណៈកម្មការប្រកួតបាល់ទាត់ជាតិកម្ពុជា (CNCC) បានបញ្ជាក់ថា ការដោះដូរកីឡាករជើងទី២នេះក្លិបជាសមាជិកទាំង១២ អាចផ្លាស់ប្តូរលើកីឡាករកម្ពុជា៣រូប និងកីឡាករបរទេស៣រូប។ គិតត្រឹមពេលនេះពានរង្វាន់លីគកំពូលកម្ពុជា ធ្វើដំណើរដល់សប្តាហ៍ទី៨ ហើយខណៈជុំទី១នៃរដូវកាលនេះនឹងបញ្ចប់នៅថ្ងៃទី២៤ ខែមិថុនា ខាងមុខ។ តាមគម្រោងការប្រកួតជុំទី២នឹងចាប់ផ្ដើមនៅថ្ងៃទី៣០ ខែមិថុនា ហើយកីឡាករថ្មីៗដែលក្លិបនីមួយៗជាសមាជិកទាំង១២ក្រុមបានចុះបញ្ជីលើកទី២នេះនឹងចូលលេងបាន។
ចំណែកលោក បែ មករា អ្នកចាត់ការទូទៅរបស់ក្រុមបឹងកេតអែហ្វស៊ី ធ្លាប់បានប្រាប់អ្នកសារព័ត៌មានក្នុងស្រុកថា លោកកំពុងសម្លឹងរកកីឡាករថ្មីៗបន្ថែមដើម្បីជំនួសកៅអីដែលកីឡាករ សុខ សុវណ្ណ និងកីឡាករ ឃួន ឡាបូរ៉ាវី ចាកចេញកាលពីពេលថ្មីៗ។ ប៉ុន្តែនៅមិនទាន់រកបានកីឡាករជំនួននៅឡើយ។ ចំណែករឿងកីឡាករ ចាន់ វឌ្ឍនាកា វិញរូបគេនឹងបន្តដំណើរជាមួយក្លិបបឹងកេត ប្រសិនបើគេមិនចេញទៅបន្តអាជីពនៅក្រៅប្រទេស។ ប៉ុន្តែពេលនេះនៅមិនទាន់មានការពិភាក្សាណាមួយនៅឡើយនោះទេ។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។
ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។
យ៉ាងណាក្តីបឹងកេត ត្រូវការជ័យជម្នះស្ទើរតែគ្រប់ការប្រកួតដើម្បីប្រជែងជាមួយក្រុមកំពូលតារាងណាហ្គាវើលនិងក្រុមមួយចំនួនទៀតដើម្បីឈរកំពូលតារាងរក្សាតំណែងជើងឯកក្នុងលីគកំពូលកម្ពុជា។ ឆ្លងកាត់៨ប្រកួតមកនេះបឹងកេត ឈ្នះបាន៦លើកនិងស្មើ២លើក ឈរលេខ១ក្នុងតារាងរួមបណ្តោះអាសន្នដែលមាន១២ក្រុម មាន២០ពិន្ទុក្នុងដៃ។ ប្រកួតបន្ទាប់បឹងកេត ត្រូវប៉ះម្ចាស់ផ្ទះភ្នំពេញក្រោន លើទីលានកីឡដ្ឋាន RSN Stadium វេលាម៉ោង៦ល្ងាចថ្ងៃសៅរ៍ ទី៩ ខែមិថុនា ឆ្នាំ២០១៨៕
Source: Kampuchea Thmey Daily
0 Comments