ភ្នំពេញ ៖ ដោយសារតែម៉ូទ័របូមទឹកលាងរថយន្ត ចេញតិចៗពេក ជនរងគ្រោះបានជួសជុលម៉ូទ័រនោះ តែមិនបានដកឌុយចេញ ឬ បិទកុងតាក់ភ្លើងទេ នៅពេលកំពុងតែដោះជួសជុលក៏ឆ្លងចរន្តឆក់ដេកដួល ហើយដាច់ខ្យល់ស្លាប់ តាមផ្លូវទៅមន្ទីរពេទ្យ កាលពីវេលាម៉ោង៩និង៣០នាទីព្រឹក ថ្ងៃទី៧ ខែមិថុនា ឆ្នាំ២០១៨ នៅក្នុងហ្គារ៉ាស់ជួសជុលរថយន្តស្ថិតនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ។
បុរសដែលស្លាប់មានឈ្មោះ អ៊ុង សុខឿន អាយុ៣៥ឆ្នាំមុខរបរ បើកបររថយន្ត មានទីលំនៅក្នុងភូមិព្រែកប្រស់ ឃុំទឹកថ្លា ស្រុកព្រៃនប់ខេត្តព្រះសីហនុ សព្វថ្ងៃស្នាក់កន្លែងកើតហេតុខាងលើ ចំណែកបុរសម្នាក់ទៀតមិនស្គាល់ឈ្មោះត្រូវចរន្តអគ្គិសនីឆក់ដែរ ប៉ុន្តែមិនស្លាប់គ្រាន់តែរងរបួសស្រាលប៉ុណ្ណោះ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុបុរសខាងលើបានជួសជុលម៉ូទ័រសម្រាប់បូមទឹកបាញ់លាងរថយន្ត ព្រោះតែម៉ូទ័រនោះចេញទឹកតិចពេក ប៉ុន្តែពេលជួសជុលមិនបានដកឌុយចេញពីព្រីឬបិទកុងតាក់ជាមុនសិនទេ ហើយក៏មិនបានដឹងថា ម៉ូទ័រនោះឆ្លងភ្លើងដែរ ខណៈដែលគាត់យកដៃទៅកាន់ម៉ូទ័រនោះក៏ស្រាប់តែត្រូវបានចរន្តអគ្គិសនីឆក់បណ្ដាលឲ្យដួលដេកនៅនឹងកន្លែង។
ចំណែកបុរសដែលជាអ្នករួមការងារម្នាក់ទៀតរបួសស្រាលផងដែរ បន្ទាប់មកមិត្តភក្ដិរួមការងារបានរត់ទៅដកឌុយចេញព្រមទាំងដឹកយកបុរសនោះទៅកាន់មន្ទីរពេទ្យដើម្បីសង្គ្រោះ ប៉ុន្តែជាអកុសលនៅពេលដឹកចេញបានចម្ងាយប្រមាណ៣គីឡូម៉ែត្រពីកន្លែងកើតហេតុក៏បានស្លាប់តែម្ដង ទើបដឹកសពត្រឡប់ក្រោយវិញ ហើយរាយការណ៍ជូននគរបាលឲ្យចុះទៅពិនិត្យដើម្បីធ្វើកំណត់ហេតុយកសពទៅធ្វើបុណ្យតាមប្រពៃណីនៅស្រុកកំណើត៕
Source: Kampuchea Thmey Daily
0 Comments