ភ្នំពេញ ៖ អ្នកនាំពាក្យក្រសួងយុត្តិធម៌ លោក គឹម សន្តិភាព បានអះអាងថា ការលើកឡើងរបស់លោក សម រង្ស៊ី ប្រធានចលនាឧទ្ទាមក្រៅច្បាប់ ដែលកំពុងរស់ដោយនិរទេសខ្លួននៅក្រៅប្រទេសថា ព្រះរាជសាររបស់ព្រះមហាក្សត្រ ជាព្រះរាជសារក្លែងក្លាយនោះ ជាការប្រមាថអង្គព្រះមហាក្សត្រ ដែលត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ។
លោក គឹម សន្តិភាព លើកឡើងបែបនេះ កាលពីយប់ថ្ងៃទី០៦ ខែមិថុនា ឆ្នាំ២០១៨ និងបន្ទាប់ពីលោក សម រង្ស៊ី បាននិយាយថា លិខិតដែលព្រះមហាក្សត្រអំពាវនាវឲ្យប្រជាពលរដ្ឋទៅបោះឆ្នោត គឺជាលិខិតក្លែងក្លាយ ដែលធ្វើឡើងក្រោមការគំរាមកំហែង។ អ្នកនាំពាក្យថា ទង្វើទណ្ឌិត សម រង្ស៊ី ជាការប្រមាថអង្គព្រះមហាក្សត្រ ល្មើសរដ្ឋធម្មនុញ្ញ និងក្រមព្រហ្មទណ្ឌ ដែលត្រូវផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ។
តាមលោក គឹម សន្តិភាព រដ្ឋធម្មនុញ្ញបានកំណត់ច្បាស់ថា “អង្គព្រះមហាក្សត្រមិនអាចនរណារំលោភបំពានបានឡើយ”។ ការប្រមាថព្រះរាជសាររបស់ព្រះមហាក្សត្រដោយចោទថា ជាព្រះរាជសារក្លែងក្លាយ និងអំពាវនាវមិនអោយខ្វល់ខ្វាយចំពោះព្រះរាជសាររបស់ព្រះមហាក្សត្រនោះ ជាការប៉ះពាល់យ៉ាងធ្ងន់ធ្ងរដល់ព្រះកិត្តិយស និងព្រះកិត្តិនាមអង្គព្រះមហាក្សត្រ។ លោកបន្តថា ទង្វើនេះជាអំពើប្រមាថចំពោះអង្គព្រះមហាក្សត្រ ល្មើសរដ្ឋធម្មនុញ្ញ និងក្រមព្រហ្មទណ្ឌ មាត្រា៤៣៧ស្ទួន ដែលកំណត់អោយផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់ពី២លានរៀល ទៅ១០លានរៀល។
សូមបញ្ជាក់ថា កាលពីថ្ងៃទី០៦ ខែមិថុនា ឆ្នាំ២០១៨ លោក សម រង្ស៊ី បានសរសេរលើបណ្តាញសង្គមហ្វេសប៊ុកផ្លូវការរបស់ខ្លួនថា លិខិតរបស់ព្រះមហាក្សត្រ ដែលបានអំពាវនាវឲ្យប្រជាពលរដ្ឋទៅបោះឆ្នោត នាថ្ងៃ២៩ ខែកក្កដា ខាងមុខនោះ គឺជាលិខិតក្លែងក្លាយទេ ឬក៏ជាលិខិតមួយ ដែលបានធ្វើឡើងក្រោមការគំរាមកំហែងពីជនផ្តាច់ការ។
ព្រះករុណាព្រះបាទ សម្ដេចព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា កាលពីថ្មីៗនេះ បានចេញព្រះរាជសារអំពាវនាវឱ្យប្រជាពលរដ្ឋគ្រប់រូបអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ដើម្បីជ្រើសរើសអ្នកដឹកនាំ អភិវឌ្ឍប្រទេសជាតិ ដោយកុំឲ្យមានការភ័យខ្លាច។ ព្រះរាជសារលើកឡើងថា “ការបោះឆ្នោតជ្រើសតាំងតំណាងរាស្ត្រនីតិកាលទី៦ និងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ មកនេះ។ ក្នុងឱកាសនេះ ខ្ញុំសូមអំពាវនាវជាឱឡារិកជូនជនរួមជាតិ អ្នកមានសិទ្ធបោះឆ្នោតទាំងអស់ សូមអញ្ជើញទៅបោះឆ្នោតឱ្យបានគ្រប់គ្រប់គ្នា ជ្រើសរើសអ្នកដឹកនាំប្រទេសជាតិ ដើម្បីអភិវឌ្ឍ និងការរីកចម្រើនរុងរឿងថ្កើងថ្កានលើគ្រប់វិស័យ”។
ព្រះរាជសាររបស់ព្រះមហាក្សត្របានលើកឡើងទៀតថា “ការបោះឆ្នោតនៅថ្ងៃអាទិត្យទី២៩ ខែកក្កដា ឆ្នាំ២០១៨ ខាងមុខ គឺជាការបោះឆ្នោតជាទូទៅ ជាសកលដោយសេរី ត្រឹមត្រូវ យុត្តិធម៌ តម្លាភាព និងដោយសម្ងាត់ ស្របតាមគោលការណ៍លទ្ធិប្រជាធិបតេយ្យសេរីពហុបក្ស។ ដូចនេះសូមកុំឲ្យមានការព្រួយបារម្ភពីការគាបសង្កត់ការគំរាមកំហែង ឬសម្លុតពីជនណាម្នាក់ឬបក្សនយោបាយណាមួយឲ្យសោះ។ ខ្ញុំសូមជនរួមជាតិទាំងអស់មេត្តាប្រើសិទ្ធិសេរីភាពបោះឆ្នោតទៅតាមសតិសម្បជញ្ញៈរបស់ខ្លួនម្នាក់ៗតើមានទំនុកចិត្តទៅលើបេក្ខជនណាម្នាក់គណបក្សនយោបាយណាមួយដោយសេរី”៕
Source: Kampuchea Thmey Daily
0 Comments