មនុស្ស​យ៉ាងតិច​៩៩​នាក់​ស្លាប់​ ខណៈ​ភ្នំភ្លើង​ហ្គា​តេ​ម៉ា​ឡា​គំរាម​ផ្ទុះ​ជាថ្មី

ការផ្ទុះ​កាលពី​ថ្ងៃ​ពុធ​នៃ​ភ្នំភ្លើង Fuego របស់​ប្រទេស​ហ្គា​តេ​ម៉ា​ឡា​ បាន​កើនឡើង​គួរ​ឲ្យ​ភ័យខ្លាច ដោយ​បញ្ចេញ​ភក់​ដ៏​ក្តៅ​ និង​គំនរ​ផេះ ​ខណៈដែល​ចំនួន​អ្នក​ស្លាប់​ពី​ការផ្ទុះ​លើក​មុន​ បាន​កើន​ឡើង​ដល់​យ៉ាងតិច​៩៩​នាក់​។​

ភាពភ័យខ្លាច​នៃ​ការផ្ទុះ​ថ្មី​នៃ​ភ្នំភ្លើង​កម្ពស់​៣,៧៦៣​ម៉ែត្រ​មួយ​នេះ​បានធ្វើ​ឲ្យ​រាំងស្ទះ​ដល់​ក្រុម​អ្នក​ជួយសង្គ្រោះ​ចាប់តាំងពី​ការផ្ទុះ​កាលពី​ថ្ងៃអាទិត្យ​មក​ដែល​បាន​កប់​ភូមិ​ទាំងមូល​នៅ​ប៉ែក​ខាងត្បូង​របស់​វា​។​

ទីភ្នាក់ងារ​វិទ្យាសាស្ត្រ​កោសល្យ​វិ​ច្ច័​យ​ជាតិ​បាន​និយាយ​នៅក្នុង​របាយការណ៍​មួយ​កាលពី​ថ្ងៃ​ពុធ​ថា កន្លែង​ដាក់​សព​បានទទួល​សព​ចំនួន​៩៩​នាក់​ដែល​ត្រូវបាន​សម្លាប់​ដោយសារតែ​ការផ្ទុះ​។​

ទីភ្នាក់ងារ​នេះ​បាន​និយាយថា រហូតមកដល់​ពេលនេះ​មាន​សព​ត្រឹមតែ​២៨​នាក់​ប៉ុណ្ណោះ​ដែល​ត្រូវ​បានកំណត់​អត្តសញ្ញាណ​។​

លោក Sergio Cabanas ប្រធាន​ភ្នាក់ងារ​គ្រប់គ្រង​គ្រោះមហន្តរាយ​របស់​ប្រទេស​ហ្គា​តេ​ម៉ា​ឡា​បាន​ប្រាប់​ក្រុម​អ្នកយកព័ត៌មាន​កាលពី​ថ្ងៃ​ព្រហស្បតិ៍​ថា “​យើង​មាន​ទិន្នន័យ​ជាមួយ​ឈ្មោះ​និង​ទីកន្លែង​ដែលមាន​មនុស្ស​បាត់​ខ្លួន​ហើយ​ថា តួរ​លេខ​គឺ​១៩២​នាក់​”​។​

ក្រុម​អ្នកជំនាញ​បាន​ព្រមាន​កាលពី​ថ្ងៃ​ពុធ​ថា ភ្លៀង​ធ្លាក់​ខ្លាំង​នៅ​តំបន់​នោះ​អាច​បង្ក​ឲ្យ​មានការ​បាក់​ដី​ដោយសារតែ​លំហូរ​នៃ​ភក់​ភ្នំភ្លើង​ចាប់តាំងពី​ការផ្ទុះ​កាលពី​ថ្ងៃអាទិត្យ​មក​។​

អ្នកជំនាញ​ខាង​ភ្នំភ្លើង​បាន​កត់ត្រា​អំពី​ការផ្ទុះ​ភ្នំភ្លើង​ជាច្រើន​ដង​ក្នុង​រយៈពេល​មួយ​ម៉ោង​កាលពី​ថ្ងៃ​ពុធ​ដែល​បង្កើតបានជា​ផេះ​ដែលមាន​កម្ពស់​៤,៧០០​ម៉ែត្រ​។​

វិទ្យាស្ថាន​ភ្នំភ្លើង​វិទ្យា​បាន​និយាយថា “​ការផ្ទុះ​កំពុង​បង្កើតបាន​ជាការ​រអិល​បាក់​ដី​ដែលមាន​ចម្ងាយ​ជា​មធ្យម​ពី​៨០០​ទៅ​១,០០០​ម៉ែត្រ​”​។​

ក្រុម​បុគ្គលិក​សង្គ្រោះបន្ទាន់​បាន​ផ្អាក​ការស្វែងរក​របស់​ពួកគេ​កាលពី​យប់​ថ្ងៃ​អង្គារ​បន្ទាប់ពី​ការផ្ទុះ​ថ្មី​បាន​បណ្តាល​ឲ្យ​មានការ​បាក់​ដី​។​

មនុស្ស​រាប់រយ​នាក់​ត្រូវបាន​ជម្លៀស​ចេញពី​សហគមន៍​ចំនួន​ប្រាំពីរ​នៅក្នុង​តំបន់ Escuintla ជិត​ភ្នំភ្លើង​ខណៈដែល​អ្នកស្រុក​ដែល​ភ័យ​ស្លន់ស្លោ​បាន​ប្រញាប់ប្រញាល់​ទៅរក​ឡាន​របស់​ពួកគេ​ដើម្បី​គេចចេញ​ដែលជា​ហេតុ​បង្ក​ឲ្យ​មានការ​កកស្ទះ​ចរាចរណ៍​៕ AFP

​

Source: Kampuchea Thmey Daily