សេចក្តីរាយការណ៍​ ៖ មេធាវី​របស់លោក ត្រាំ និយាយថា លោក គីម ជុង​អ៊ុន សុំ​អង្វរ​សម្រាប់​កិច្ចប្រជុំ​កំពូល

កាសែត The Wall Street Journal បាន​រាយការណ៍​កាលពី​ថ្ងៃ​ពុធ​ថា មេធាវី​របស់លោក ដូ​ណា​ល់ ត្រាំ បាន​និយាយថា មេដឹកនាំ​កូរ៉េខាងជើង​លោក គីម ជុង​អ៊ុន បាន​អង្វរ​ឲ្យ​មាន​កិច្ចប្រជុំ​កំពូល​មួយ​ជាមួយ​ប្រធានាធិបតី​អាមេរិក​។​

ការលើកឡើង​របស់លោក Rudy Giuliani ដែល​មានបំណង​បង្ហាញថា​លោក ត្រាំ ជា​អ្នកចរចា​ដ៏​តឹងតែង​នោះ​គឺអាច​បង្ក​ឲ្យ​មាន​ឧបសគ្គ​ដល់​កិច្ចប្រជុំ​ដែល​បាន​គ្រោងទុក​ក្នុង​រយៈពេល​តិចជាង​មួយ​សប្តាហ៍​មុនពេល​វា​ត្រូវ​ដល់ពេល​កំណត់​នឹង​កើតឡើង​។​
​
លោក Evans JR Revere អតីត​អ្នកការទូត​នៃ​ក្រសួងការបរទេស​ដែលមាន​ជំនាញ​អំពី​ប្រទេស​កូរ៉េខាងជើង​បាន​និយាយថា “​ប្រសិនបើ​ប្រជាជន​កូរ៉េខាងជើង​ត្រូវការ​ហេតុផល​មួយ​ដើម្បី​លុបចោល​កិច្ចប្រជុំ​នោះ អាមេរិក​នឹង​ប្រគល់​វា​ទៅ​ឲ្យ​ពួកគេ​”​។​
​
លោក Giuliani បានធ្វើការ​កត់សម្គាល់​នេះ​នៅក្នុង​ប្រទេស​អ៊ីស្រាអែល​អំឡុង​សន្និសីទ​ទីផ្សារ​មូលធន​មួយ​ដែល​នៅ​ទីនោះ​លោក​បាន​ពន្យល់​អំពី​លំដាប់​នៃ​ព្រឹត្តិការណ៍​ដែល​នាំ​ឲ្យ​លោក ត្រាំ លុបចោល​ហើយ​បន្ទាប់មក​ស្តារ​កិច្ចប្រជុំ​ឡើងវិញ​។​
​
លោក Giuliani ត្រូវបាន​ដកស្រង់​សំដី​ដោយ AFP ដែល​និយាយថា លោក​គីម​បាន​លុតជង្គង់​ហើយ​សំពះ​ដើម្បី​កិច្ចប្រជុំ​បន្ទាប់ពី​លោក ត្រាំ លុបចោល​វា​។​
​ប៉ុន្តែ​ក្រោយមក លោក Giuliani បាន​និយាយ​ការពារ​ការកត់សម្គាល់​របស់គាត់​។​
​
លោក​បាន​ថ្លែង​ក្នុង​បទ​សម្ភាស​តាម​ទូរស័ព្ទ​មួយ​ថា “​ទាំងនោះ​គឺជា​មតិ​របស់ខ្ញុំ​ហើយ​វា​គ្មានអ្វី​ពាក់ព័ន្ធ​នឹង​រដ្ឋបាល​នោះទេ​។ នេះ​គឺជា​ការបកស្រាយ​របស់​ខ្ញុំ​”​។​
​
នៅក្នុង​បទសម្ភាសន៍​ដាច់ដោយឡែក​មួយ​ជាមួយ​សារព័ត៌មាន Associated Press, លោក Giuliani បាន​ច្រានចោល​ការលើកឡើង​ដែលថា ការធ្វើ​អត្ថាធិប្បាយ​បែបនេះ​អាចធ្វើ​ឲ្យ​ខូច​ដល់​កិច្ចប្រជុំ​កំពូល​។​
​
លោក Giuliani បាន​និយាយថា លោក​មិន​ទទួលបាន​ការឆ្លើយតប​ណាមួយ​ពី​រដ្ឋបាល​អំពី​ការអត្ថាធិប្បាយ​របស់គាត់​ទេ​ហើយ​មិន​រំពឹងថា ​វា​នឹងធ្វើ​ឲ្យ​ប្រជាជន​កូរ៉េខាងជើង​ខឹងសម្បា​ឡើយ​។​
​
គួរ​បញ្ជាក់ថា វា​មិនមែនជា​លើកទីមួយ​ទេ​ដែល​លោក Giuliani បាន​លូកដៃ​ចូលក្នុង​គោលនយោបាយ​ការបរទេស​របស់លោក ត្រាំ ហើយក៏​មិនមែនជា​លើកដំបូង​ដែរ​ដែល​ការលើកឡើង​របស់គាត់​បាន​គំរាម​ធ្វើ​ឲ្យ​មាន​បញ្ហា​ថ្មី​សម្រាប់​លោក​ប្រធានាធិបតី​។
​
កាលពី​ខែ​មុន​លោក ត្រាំ បាន​រិះគន់​ជា​សាធារណៈ​អំពី​រឿងរ៉ាវ​របស់លោក Giuliani ទាក់ទង​នឹង​ការបង់ប្រាក់​ដោយ​មេធាវី​ផ្ទាល់​របស់លោក ត្រាំ គឺ​លោក Michael Cohen ទៅ​ឲ្យ​តារា​សម្តែង Stephanie Clifford ៕ AGENCIES

​

Source: Kampuchea Thmey Daily