រដ្ឋាភិបាលបាននិយាយកាលពីថ្ងៃសៅរ៍ថា ប្រទេសអូស្ត្រាលីបានបង្កើតក្រុមការងារសន្តិសុខមួយដើម្បីការពារទប់ទល់នឹងការវាយប្រហារតាមអ៊ីនធឺណិតនិងការជ្រៀតជ្រែកក្នុងការបោះឆ្នោត ចំពេលមានក្តីព្រួយបារម្ភថា មហាអំណាចបរទេសកំពុងតែជ្រៀតជ្រែកកិច្ចការក្នុងប្រទេសនិងមុនការបោះឆ្នោតចំនួនប្រាំនៅខែក្រោយ។
អ្នកនាំពាក្យក្រសួងមហាផ្ទៃបានប្រាប់រ៉យទ័រតាមរយៈអ៊ីម៉ែលថា ក្រុមការងារបោះឆ្នោតសុចរិត ដែលទើបបង្កើតថ្មីនឹងកំណត់និងដោះស្រាយនូវហានិភ័យចំពោះដំណើរការបោះឆ្នោតរបស់ប្រទេសអូស្ត្រាលី។ អ្នកនាំពាក្យរូបនេះបាននិយាយថា “នេះគឺជាវិធានការប្រុងប្រយ័ត្នទុកជាមុនដែលនឹងចាំបាច់ដើម្បីក្លាយទៅជាបទដ្ឋាន”។
កិច្ចប្រជុំក្រុមមេដឹកនាំប្រទេស G7 នៅក្នុងប្រទេសកាណាដាត្រូវបានគេរំពឹងថានឹងគាំទ្រវិធានការដើម្បីការពារការបោះឆ្នោតប្រឆាំងនឹងការជ្រៀតជ្រែកពីបរទេស។
សេចក្តីព្រាងនេះហាក់ដូចជានិយាយបញ្ឆិតបញ្ឆៀងបន្តិចបន្តួចចំពោះការចោទប្រកាន់ដោយសហរដ្ឋអាមេរិកនិងរដ្ឋាភិបាលនានានៃបណ្តាប្រទេសសហភាពអ៊ឺរ៉ុបដែលថា រុស្ស៊ីបានជ្រៀតជ្រែកក្នុងការបោះឆ្នោតរបស់ពួកគេ។យ៉ាងណាក្តីក្រុងមូស្គូបានបដិសេធការចោទប្រកាន់នេះ។
ការប្រកាសអំពីក្រុមការងាររបស់អូស្ត្រាលីបានកើតឡើងត្រឹមតែប៉ុន្មានសប្តាហ៍ប៉ុណ្ណោះមុនការបោះឆ្នោតបំពេញបន្ថែមចំនួន៥និងចំពេលមានការព្រួយបារម្ភនៅក្នុងប្រទេសអូស្ត្រាលីអំពីការជ្រៀតជ្រែករបស់ចិននៅក្នុងដំណើរការនយោបាយរបស់ខ្លួន។
ការបោះឆ្នោតបំពេញបន្ថែមនឹងក្លាយជាការធ្វើតេស្តអំពីប្រជាប្រិយភាពរបស់នាយករដ្ឋមន្ត្រីលោក Malcolm Turnbull មុនការបោះឆ្នោតថ្នាក់ជាតិនៅចុងឆ្នាំ២០១៩។
ចំណងទំនាក់ទំនងរវាងប្រទេសអូស្ត្រាលីនិងដៃគូពាណិជ្ជកម្មដ៏សំខាន់របស់ខ្លួនគឺប្រទេសចិន បានជួបប្រទះភាពជូរចត់ដោយសារសកម្មភាពរបស់ទីក្រុងកង់បេរ៉ាដើម្បីបញ្ឈប់ការជ្រៀតជ្រែកពីអន្តរជាតិ៕ REUTERS
Source: Kampuchea Thmey Daily
0 Comments