ស្ទឹងត្រែង ៖ លោកស្រីញ៉ោច សារឿន ប្រធានមន្ទីរវប្បធម៌ និងវិចិត្រសិល្បៈ ខេត្តស្ទឹងត្រែង បានបញ្ជាក់នៅថ្ងៃទី០៨ ខែមិថុនានេះថា ៖ មន្ទីរវប្បធម៌ និងវិចិត្រសិល្បៈ បានបង្កើតរបាំត្រីប៉ាសេអ៊ី និងបង្ហាត់បង្រៀនសិស្សដែលជាយុវជនជំនាន់ក្រោយឲ្យសម្តែងសិល្បៈរបាំនេះ ដើម្បីបង្ហាញឲ្យបងប្អូនប្រជាពលរដ្ឋទូទៅ ជាពិសេសប្រជានេសាទមានស្មារតីចូលរួមអភិរក្សប្រភេទត្រីប៉ាសេអ៊ី ដែលមានវត្តមាន នៅតែ ខេត្តស្ទឹងត្រែងតែប៉ុណ្ណោះ។
លោកស្រីប្រធានបន្តថា ៖ នេះក៏ជាការបង្ហាញអត្តសញ្ញាណរបស់ខេត្ត ដល់ភ្ញៀវទេសចរជាតិ និងអន្តរជាតិ ដែលបានមកដល់ខេត្តស្ទឹងត្រែង ហើយតែងសួរនាំរកត្រីប៉ាសេអ៊ី តែបច្ចុប្បន្នត្រូវអ្នកនេសាទបានធ្វើការប្រមាញ់ដោយគ្មានគោរពច្បាប់នេសាទឡើយ ស្ទើរតែធ្វើឲ្យប្រភេទត្រីប៉ាសេអ៊ីនេះ ឈានទៅផុតពូជ។
លោកស្រីប្រធានសំណូមពរឲ្យមន្ត្រីជំនាញបង្កើនកិច្ចសហការគ្នាធ្វើការអភិរក្សត្រីមួយប្រភេទនេះ កុំឲ្យផុតពូជ ព្រោះមន្ទីរវប្បធម៌និងវិចិត្រសិល្បៈខេត្ត) បានចាប់យករូបសំណាកត្រីនេះមកចងក្រងជាសិល្បៈរបាំរួចទៅហើយដើម្បីបង្ហាញពីការចូលរួមអភិរក្សដោយប្រយោល។
លោកទំនីរ៉ូប្រធានខណ្ឌជលផលស្ទឹងត្រែងបានអះអាងថា ៖ ការងារអភិរក្សមន្ត្រីជំនាញបានចាត់វិធានការគ្រប់ច្រកល្ហក តែសកម្មភាពនេះ បើគ្មានការចូលរួមពីប្រជាពលរដ្ឋទេ វានឹងទទួលបរាជ័យ។
លោកថា ៖ ក្តីព្រួយបារម្ភនេះ អាចទៅថ្ងៃអនាគតប្រភេទត្រីប៉ាសេអ៊ីនេះ គឺពិតជានៅតែរូបសំណាកតែប៉ុណ្ណោះ ដូចជា រូប-គ្រុឌ- នាគ-ឬ ដាយណូស័រ-ជាដើម គឺឮតែឈ្មោះតែគ្មានរូបរាង៕
Source: Kampuchea Thmey Daily
0 Comments