កាន់តែរឿងធំហើយ! តាន់ គឹមសួ ប្រកាសប្តឹងតារាប្រុស ឌួង តារាផានីន ទាមទារសំណងជំងឺចិត្ត៥ម៉ឺនដុល្លារ

Cambodia News June 16, 2018

ភ្នំពេញ ៖ បន្ទាប់ពីផ្ទុះសង្គ្រាមពាក្យសម្តីរវាងតារាសម្តែងប្រុសលោក ឌួង តារាផានីន ជាមួយអ្នកផលិតកម្មវិធីពញ្ញាក់អារម្មណ៍លោក តាន់ គឹមសួរ កក្រើកពេញបណ្តាញសង្គមហ្វេសប៊ុកនោះពេលនេះ ស្រាប់តែលោក តាន់ គឹមសួ បានប្រកាសដាក់ពាក្យបណ្តឹងចោទលើតារាប្រុសលោកឌួង តារាផានីន ពីបទបរិហារកេរ្តិ៍។

បង្ហោះភ្ជាប់ជាមួយពាក្យបណ្តឹងលោក តាន់ គឹមសួ បានសរសេរថា ហ៊ានចោទថាអូនខ្ទើយផង អូនជាប្រុសពេញលក្ខណៈចា។ ទុកអោយច្បាប់ជាអ្នកវិនិច្ឆ័យទៅថាអ្នកណាជាខ្ទើយអោយពិតប្រាកដ។នៅក្នុងពាក្យបណ្តឹងនោះលោក តាន់ គឹមសួ បានប្រកាសទាមទារសំណងជំងឺចិត្តចំនួន៥ម៉ឺនដុល្លារ។

ផ្អែកតាមពាក្យបណ្តឹងលោក តាន់ គឹមសួ បានលើកឡើងថា កាលពីថ្ងៃទី១០ ខែមិថុនា ឆ្នាំ២០១៨ឈ្មោះ ឌួង តារាផានីន បានថតយកគណនីហ្វេសប៊ុករបស់លោកដែលមានទាំងរូបថតផងនោះទៅបង្ហោះនៅលើបណ្តាញសង្គមហ្វេសប៊ុក ដោយប្រើប្រាស់ពាក្យបំផ្លើស ប្រឌិត មាក់ងាយ និងប្រមាថយ៉ាងធ្ងន់ធ្ងរចំពោះខ្លួន។

ប្រភពបានបន្តថា ចំពោះករណីនេះគឺជាការវាយប្រហាបង្ខូចកិត្តិយស និងប្រមាថយ៉ាងធ្ងន់ធ្ងរដល់រូបលោក ដោយចេតនាទុច្ចរិតរបស់ឈ្មោះ ឌួង តារាផានីន ដែលមិនអាចទទួលយកបានឡើយ។ដូច្នេះក្នុងនាមលោកជាជនរងគ្រោះសូមទាមទារជាសំណងជំងឺចិត្តជាទឹកប្រាក់ចំនួន៥ម៉ឺនដុល្លារ។

ជាមួយគ្នានេះជាប្រតិកម្មឆ្លើយតបលោក ឌួង តារាផានីន បានបញ្ជាក់ថា លោកឯងផុសរូបខ្ញុំបរិហារកេរ្តិ៍ខ្ញុំជាសាធារណៈ មុន Live និយាយពីខ្ញុំ ថាប្រុស ឬក៏ខ្ទើយ ជាសាធារណៈមុនសោះ ?ឥឡូវរត់ទៅប្ដឹងមុនទៀត បែក មែនលោក គឹមសួ ភស្ភុតាងខ្ញុំមានគ្រប់គ្រាន់៕