លោកចេង មុនីរ៉ា នាំយកអំណោយរបស់អនុសាខាកាកបាទក្រហមខណ្ឌច្បារអំពៅផ្តល់ជូនប្រជាពលរដ្ឋចំនួន៣០គ្រួសារនៅសង្កាត់វាលស្បូវ

ភ្នំពេញ ៖ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ និងជាប្រធានកិត្តិយសអនុសាខាកាកបាទក្រហមខណ្ឌ កាលពីរសៀលថ្ងៃទី៧ ខែមិថុនានេះ បាននាំយកអំណោយរបស់អនុសាខាកាកបាទក្រហមខណ្ឌទៅផ្តល់ជូនប្រជាពលរដ្ឋក្រីក្រចំនួន៣០គ្រួសារ ដែលកំពុងរស់នៅក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។

លោកចេង មុនីរ៉ា បានថ្លែងថា ថ្ងៃនេះកាកបាទក្រហមខណ្ឌច្បារអំពៅ បាននាំយកអំណោយមួយចំនួន មកចែកជូនបងប្អូន ប្រជាពលរដ្ឋ ក្រីក្រក្នុងមូលដ្ឋានសង្កាត់វាលស្បូវ ដែលអំណោយទាំងនេះរួមមាន ៖ អង្ករ ៣០គីឡូក្រាម ទឹកស៊ីអ៊ីវ ១យួរ និងធុងចម្រោះទឹកស្អាត និងថវិកា ៣ម៉ឺនរៀលផងដែរ។ បើទោះជាអំណោយទាំងនេះមិនច្រើនក៏ពិតមែន តែវាជាទឹក ចិត្តមនុស្សធម៌ ជួយគ្នាក្នុងគ្រាក្រ អាចរំលែកការលំបាករបស់បងប្អូនបានមួយគ្រា ហើយអាជ្ញាធរមូលដ្ឋាន មិនទុកឱ្យបងប្អូនណាម្នាក់ស្លាប់ដោយអត់បាយនោះទេ។

លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ មានប្រសាសន៍ថា “នេះមិនមែនជាលើកទី១ទេ កាកបាទក្រហមខណ្ឌ តែងតែបានផ្តល់អំណោយ ជូនប្រជាពលរដ្ឋក្រីក្រក្នុងមូលដ្ឋានរបស់ខ្លួនជាញឹកញាប់ ដោយមិនប្រកាន់ពីនិន្នាការនយោបាយ បក្ខពួកពណ៌សម្បុរនោះឡើយ ពោលគឺឱ្យតែបានដឹងថា មានពលរដ្ឋ ជួបការលំបាកក្នុងជីវភាពរស់នៅប្រចាំថ្ងៃនៅទីណា កាកបាទក្រហមកម្ពុជា តែងតែចុះទៅជួយតាម លទ្ធភាព ដល់ទីនោះ”។

ជាមួយគ្នានេះ លោកអភិបាល ក៏បានរំលឹកបងប្អូនប្រជាពលរដ្ឋទៅបោះឆ្នោតឱ្យបានគ្រប់គ្នា ព្រោះពេលវេលា នៃការបោះឆ្នោត គឺនៅថ្ងៃទី២៩ ខែកក្កដា ឆ្នាំ២០១៨ កម្ពុជានឹងប្រារព្ធពិធីបោះឆ្នោតជាតិ អាណត្តិទី៦ ដូច្នេះសុំបងប្អូនចូលរួមបោះឆ្នោតជ្រើសរើស មេដឹកនាំរួមសុខទុក្ខជាមួយបងប្អូន មេដឹកនាំដែលនាំសន្តិភាពជូនប្រទេសជាតិដូចសព្វថ្ងៃនេះ ឱ្យបានគ្រប់ៗគ្នា។ រួមគ្នាការពារសន្តិភាព ដែលប្រឹងប្រែងបានមកដោយលំបាក កុំឱ្យក្មេងៗជំនាន់ក្រោយជួប ប្រទះទុក្ខវេទនា ដូចពីមុនទៀត៕