កំពង់ចាម ៖ មានការភ្ញាក់ផ្អើលមួយ បានកើយទ្បើង ដោយសពកុមារាម្នាក់ ត្រូវបានស្រង់ចេញពីក្នុងស្រះទឹក បន្ទាប់ពីបាត់ខ្លួនអស់រយៈពេលប្រហែល២ម៉ោងក្នុង ខណៈដែលឪពុកម្តាយរវល់ធ្វើការ។
សពកុមារារងគ្រោះ ឈ្មោះស៊ុយ វុស អាយុ៤ឆ្នាំ មានឪពុកឈ្មោះ សោ សារ៉ន អាយុ៣៥ឆ្នាំ និងម្តាយ ឈ្មោះ ជៀប ចាន់ផុល អាយុ៣០ឆ្នាំ រស់នៅភូមិអណ្តូងត្រាំង ឃុំស្រម៉ ស្រុកជើងព្រៃ ខេត្តកំពង់ចាម។
ប្រភពព័ត៌មាននៅកន្លែងកើតហេតុ បានអោយដឹងថា នៅរសៀល ថ្ងៃទី៧ ខែមិថុនា ឆ្នាំ២០១៨ កុមារា ឈ្មោះស៊ុយ វុស បានលេងនៅក្រោមផ្ទះរបស់ខ្លួន រហូតដល់ម៉ោង១៥ ថ្ងៃដដែល ស្រាប់តែបាត់ មិនឃើញកុមារានេះទ្បើយ តែអាណាព្យាបាល មិនបានចាប់អារម្មណ៍។
បន្តិចក្រោយមក នៅតែមិនឃើញវត្តមានរបស់កុមាររងគ្រោះទើបអាណាព្យាបាល នាំគ្នាស្រែកហៅ តែទោះជាខំហៅយ៉ាងណាក៏រកមិនឃើញ ដោយមានការសង្ស័យក៏ចុះរាវក្នុងស្រះទឹកនៅក្បែនោះ។
នៅវេលាម៉ោង១៩ ថ្ងៃដដែល អាណាព្យាបាលក៏បានស្រង់កុមារ ស៊ុយ វុសចេញពីស្រះទឹក តែអកុសល កុមារាស៊ុយ វុស បានស្លាប់បាត់ទៅហើយ។
ប៉ូលិសបានអោយដឹងថា តាមការពិនិត្យសព បញ្ជាក់ថា កុមារា ស៊ុយ វុសពិតជាស្លាប់ដោយលង់ទឹកប្រាកដមែន។ សពត្រូវបានប្រគល់អោយឪពុកម្តាយធ្វើ បុណ្យតាមប្រពៃណី៕
Source: Kampuchea Thmey Daily
0 Comments