រតនគិរី ៖ រថយន្តកាមរីហើម១គ្រឿងពន្លះម៉ូតូក្នុងទិសដៅបញ្ច្រាសគ្នាយ៉ាងពេញទំហឹងបណ្ដាលឲ្យជនរងគ្រោះស្លាប់ម្នាក់ និងរងរបួសធ្ងន់ម្នាក់ បន្ទាប់ពីមានភ្លៀងធ្លាក់យ៉ាងខ្លាំង ហើយខ្យល់បោកបក់ថែមទៀត មើលផ្លូវពុំឃើញ ក៏ជ្រុលចង្កូតទៅបុកម៉ូតូតែម្តង។
គ្រោះថ្នាក់ចរាចរណ៍នេះ បានកើតឡើងកាលវេលាម៉ោង៦និង៣០នាទីយប់ថ្ងៃអាទិត្យ ១២រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែមិថុនា ឆ្នាំ២០១៨ នៅត្រង់ចំណុច វាលរំប្លង់ ស្ថិតនៅក្នុងភូមិតងកាម៉ាល ឃុំអូរជុំ ស្រុកអូរជុំ។
នគរបាលស្រុកអូរជុំ បានឲ្យដឹងថា ជនបង្កឈ្មោះ ស្មៀន ថៃ ភេទប្រុស អាយុ៣៤ឆ្នាំ ជនជាតិគ្រឹង ទីលំនៅបច្ចុប្បន្នភូមិសាទុក ឃុំប៉ូយ ស្រុកអូរជុំ បើកបររថយន្ត១គ្រឿងម៉ាកកាមរីហើម ស៊េរីឆ្នាំ95 ពណ៌សំបកឪឡឹក ពាក់ស្លាកលេខភ្នំពេញ 2B-0362។
នគរបាល បន្តថា ជនរងគ្រោះឈ្មោះ ម៉ាង ធន់ ភេទប្រុស អាយុ៤៥ឆ្នាំ ជនជាតិគ្រឹង (ស្លាប់) មានមុខរបរជានគរបាល នាយរងការិយាល័យ ទីលំនៅបច្ចុប្បន្នភូមិគោក ឃុំល្អក់ ស្រុកអូរជុំ ខេត្តរតនគិរី ជិះម៉ូតូ១គ្រឿង ម៉ាកស៊ីរុស ពណ៌ខ្មៅ អត់ស្លាកលេខ។
រីឯប្រពន្ធឈ្មោះ ឡញ រេល អាយុ៤០ឆ្នាំ ជនជាតិទំពួន បានរងរបួសធ្ងន់ បាក់ជើងម្ខាង ហើយត្រូវបានដឹកបញ្ជូនទៅព្យាបាលនៅមន្ទីរពេទ្យបង្អែក ខេត្តរតនគីរី។
ក្រោយកើតហេតុ នគរបាលមូលដ្ឋានចុះមកអន្តរាគមន៍ ហើយបានឃាត់ខ្លួនអ្នកបើកបររថយន្តបង្កជាបណ្ដោះអាសន្ន នៅអធិការដ្ឋាននគរបាលស្រុកអូរជុំ ក្រោមការសម្របសម្រួលពីលោក ជា ពេជ្រ ព្រះរាជអាជ្ញាអមសាលាដំបូងខេត្ត។
ដោយឡែកមធ្យោបាយទាំងពីរគ្រឿង ត្រូវសមត្ថកិច្ច អូសយកមករក្សាទុកនៅអធិការដ្ឋាននគរបាលស្រុកអូរជុំដើម្បី រង់ចាំធ្វើការដោះស្រាយតាមនីតិវិធីច្បាប់។
ចំណែកសាកសពជនរងគ្រោះ ត្រូវបានសមត្ថកិច្ចប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments