ស្ទឹងត្រែង ៖ ថ្លែងក្នុងកិច្ចប្រជុំស្តីពីការត្រួតពិនិត្យការអនុវត្តផែនការ (ភូមិស)គ្មានគ្រឿងញៀន វត្តដំរីស ឃុំព្រះរំកិល នាថ្ងៃទី០៨ មិថុនាឆ្នាំ២០១៨- អគ្គលេខាធិការនៃអាជ្ញាធរជាតិ ប្រយុទ្ធប្រឆាំងគ្រឿងញៀនកម្ពុជាសហការជាមួយសមត្ថកិច្ចនៅឃុំព្រះរំកិលស្រុថាឡាបរិវ៉ាត់ខេត្តស្ទឹងត្រែង បានពង្រឹងកិច្ចសហប្រតិបត្តិការប្រយុទ្ធប្រឆាំងគ្រឿងញៀនឲ្យកាន់តែមានប្រសិទ្ធភាពនៅឆ្នាំ២០១៨នេះជាពិសេសធ្វើឲ្យឃុំមួយនេះក្លាយជាភូមិសគ្មានគ្រឿងញៀន។
លោកនាយឧត្តមសេនីយ៍ មាស .វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍ថា ៖ កិច្ចសហប្រតិបត្តិការនេះ កម្លាំងការពារនៅតាមខ្សែបន្ទាត់ព្រំដែន និងអាជ្ញាធរភូមិឃុំត្រូវធ្វើការឲ្យជិតស្និទ្ធជាមួយគ្នាបន្ថែមទៀត ដើម្បីធ្វើឲ្យភូមិគោលដៅមានភូមិសាស្ត្រនៅជាប់ព្រំដែន គ្មានគ្រឿងញៀន។
លោកនាយឧត្តមសេនីយ៍មានប្រសាសន៍បន្ថែមថា ៖ ដើម្បីឲ្យផែនការរបស់យើងកាន់តែមានប្រសិទ្ធភាព សមត្ថកិច្ចពាក់ព័ន្ធទាំងកម្ពុជា-ឡាវ-ត្រូវបង្កើនការផ្តល់ព័ត៌មានឲ្យគ្នាទៅវិញទៅមក ដើម្បីបង្ការទប់ស្កាត់ពីចម្ងាយ ពិសេសអាជ្ញាធរឃុំសង្កាត់ដែលនៅផ្ទាល់ជាមួយប្រជាពលរដ្ឋ។
លោកយង់សុវឌ្ឍនាអភិបាលរងខេត្តស្ទឹងត្រែងមានប្រសាសន៍ថា ៖ នៅឆ្នាំ២០១៧ ក៏ដូចជានៅដើមឆ្នាំ២០១៨នេះ លេខាធិការដ្ឋានខេត្ត អាជ្ញាធរក្រុងស្រុក ឃុំ សង្កាត់ គណៈកម្មការត្រួតពិនិត្យគ្រឿងញៀន សមត្ថកិច្ចពាក់ព័ន្ធ បានធ្វើការរួមគ្នាជាពហុវិស័យ។
លោកអភិបាលរងបន្តថា ៖ ការងាររួមគ្នានេះ យើងបានចុះផ្សព្វផ្សាយអប់រំអំពីផលប៉ះពាល់ការគ្រោះថ្នាក់នឹងច្បាប់ស្តីពីគ្រឿងញៀនសរុបបានជិត៤០០លើក និងមានអ្នកចូលរួមជិតជាង៤ម៉ឺននាក់។
លោកថា ៖ ជាមួយគ្នានេះកម្លាំងសហការនៅតែបន្តធ្វើការបង្ក្រាប ស្រាវជ្រាវ រកជនសង្ស័យលួចលាក់-រក្សាទុក- ជួញដូរ និងប្រើប្រាស់- ធ្វើឲ្យភូមិគោលដៅយើងក្លាយជាភូមិសគ្មានគ្រឿងញៀននិង កុំឲ្យមានប្រជាពលរដ្ឋស្លូតត្រង់ ចាញ់បោកតាមការញុះញង់របស់មេខ្លោង។
សូមបញ្ជាក់ថា ៖ បញ្ហាគ្រឿងញៀននេះខេត្តស្ទឹងត្រែងនៅតែមានបន្ទុកធ្ងន់នៅឡើយដោយសារតែភូមិសាស្ត្រខេត្តមានលក្ខណៈស្មុគស្មាញ ជាតំបន់ ព្រៃភ្នំ ទន្លេ និងមានច្រករបៀងច្រើននៅតាមព្រំដែនកម្ពុជាឡាវ (ផ្លូវគោកផ្លូវទឹក) ដែលអំណោយផលល្អសម្រាប់ពួកឧក្រិដ្ឋជនចរាចរដឹកជញ្ជូននិងលួចលាក់នាំគ្រឿងញៀនឆ្លងកាត់៕
Source: Kampuchea Thmey Daily
0 Comments