ភ្នំពេញ ៖ ក្រុមការងារគណបក្សប្រជាជន ចុះជួយសង្កាត់ព្រែកំពឹស ខណ្ឌដង្កោ រាជធានីភ្នំពេញ អមដំណើរដោយលោក ជរ គឹមស៊,លោក អ៊ុយ សុន អនុប្រធានក្រុមការងារ ព្រមទាំងសហការីក្រុមការងារ លោក លោកស្រីក្នុងជួរគណៈកម្មាធិការបក្សសង្កាត់ សាខាបក្សភូមិ បានចុះជួបសំណេះសំណាលជាមួយប្រជាពលរដ្ឋ នៅព្រឹកថ្ងៃទី ១០-០៦-២០១៨ ស្ថិតនៅបរិវេណវត្ត កែវមុនី ភូមិដំណាក់សង្កែ សង្កាត់ព្រែកកំពឹស ខណ្ឌដង្កោ។
ក្នុងឱកាសនោះ លោក រ័ត្ន ស្រ៊ាង ក្នុងនាមប្រធានក្រុមការងារចុះជួយសង្កាត់ព្រែកកំពឹសខណ្ឌដង្កោ បាននាំយកនូវអាហារសម្រន់ មាននំប៉័ងចំនួន១៧៥០ដើម ការ៉េមចំនួន១៧៥០ដើម ទឹកអំពៅ និងទឹកសុទ្ធ មកបរិភោគរួមជាមួយ ប្រជាពលរដ្ឋ យុវជន យុវនារី កុមារា កុមារី ដែលបានមករង់ចាំទទួលស្វាគមន៍ សរុបមានចំនួន ១៧២១នាក់ ប្រកបដោយភាពស្និតស្នាល និងបានឧបត្ថម្ភដល់សមាជិកគណបក្សប្រជាជនដែលមានឈ្មោះបោះឆ្នោត បានមកចូលរួមចំនួន ១០៩៦នាក់ អស់ថវិកាចំនួន ២១លាន៩សែន២ម៉ឺនរៀល គឺក្នុងម្នាក់ៗទទួលបានថវិកាចំនួន ២ម៉ឺនរៀល។
បន្ទាប់មកបាន បើកចែកខោអាវកីឡាដល់កុមារា កុមារីដែលមកចូលរួមមានចំនួន ៦៨៥នាក់ ក្នុងម្នាក់ៗទទួលបានខោអាវកីឡា ០១កំប្លេ ប្រគល់បាល់ទាត់ និងបាល់ទះចំនួន ២០គ្រាប់ ជូនឲ្យសាខាភូមិសម្រាប់បំផុសកម្មភាពកីឡាដល់ស្រទាប់យុវជន និងកុមារនៅក្នុងភូមិ និងបានផ្តល់ជូនទឹកក្រូចដបមានរសជាតិឆ្ងាញ់សរុបចំនួន ៤៣២កេស គឺក្នុង ០១គ្រួសារទទួលបានទឹកក្រូចចំនួន ០១កេស។
ព្រមជាមួយគ្នានោះផងដែរ លោក រ័ត្ន ស្រ៊ាង ក៏បាននាំក្រុមការងារគ្រូពេទ្យក្រោមការដឹកនាំរបស់លោក ចុះមកធ្វើការពិនិត្យជម្ងឺ និងផ្តល់ថ្នាំព្យាបាលជូនដល់ប្រជាពលរដ្ឋមានជំងឺ ដែលបានមកចូលរួមក្នុងពិធីសំណេះសំណាលបានចំនួន ១៩៦នាក់(ក្នុងនោះមានកុមារ ២០នាក់) ផងដែរ។ សរុបថវិកាចំណាយក្នុងកម្មវិធីសំណេះសំណាលមានចំនួន ៦២លាន ០៥សែន ០៩ម៉ឺន ០១ពាន់រៀល៕
Source: Kampuchea Thmey Daily
0 Comments