គ្រូ​បង្វឹក​សួង ភារ​ម្យ ចេញពី​ក្រសួងការពារជាតិ ទៅ​ចូលរួម​ជាមួយ​វិសាខា

​លោក សួង ភារ​ម្យ ដែល​គេ​ស្គាល់​ថា​ ជា​គ្រូបង្វឹក​អ្នកចាំទី​ដែល​ផលិត​បាន​កីឡាករ​ល្បីៗ​ជាច្រើន​ប្រចាំ​ប្រទេស​កម្ពុជា បានសម្រេច​ចេញពី​ក្លិប​ក្រសួងការពារជាតិ ហើយ​ចេញទៅ​ចូលរួម​ជាមួយ​ក្រុម​ចំណូល​ថ្មី​វិសាខា ដែលជា​សមាជិក​ក្នុង​ក្លិប​ពានរង្វាន់​លី​គ​កំពូល​កម្ពុជា (Metfone Cambodian League 2018) ដូចគ្នា​។

យោង​តាម​សេចក្តី​ជូនដំណឹង​របស់​ក្លិប​វិសាខា នៅ​រសៀល​ថ្ងៃ​សុក្រ ទី​១៥ ខែមិថុនា ឆ្នាំ២០១៨ សប្តាហ៍​នេះ​បាន​បញ្ជាក់​ថា ​ក្លិប​ក៏ដូចជា​ថ្នាក់ដឹកនាំ​ជាន់ខ្ពស់​នៃ​ក្លិប​បានសម្រេច​ទទួលយក​លោក សួង ភារ​ម្យ ធ្វើជា​គ្រូបង្ហាត់​អ្នកចាំទី​ក្លិប​វិសាខា​។ លោក សួង ភារ​ម្យ នៅ​ទំនេរ​មួយរយៈ ក្រោយ​បាត់​មុខ​ពី​ក្លិប​ក្រសួងការពារជាតិ តាំងពី​ដើមរដូវ​កាល​ឆ្នាំ​២០១៨ មក​ម្ល៉េះ​។



ក្រោយ​ចូលរួម​ក្រុម​ជើងឯក​លី​គ​លំដាប់​ទី​២​កម្ពុជា កាលពី​ឆ្នាំ​២០១៧ កន្លង​ទៅ​នេះ លោក​សួង ភារ​ម្យ បាន​បង្ហាញ​ពី​ទិសដៅ​ក្នុង​ការ​បណ្ដុះបណ្ដាល អ្នកចាំទី​របស់​ក្លិប​វិសាខា តាម​ជំនាញ​ដែល​លោក​មាន​អាជ្ញា​ប័​ណ្ណ​ជាន់ខ្ពស់ រហូត​ទៅដល់ FIFA Goalkeeping Licence Coaching Course ឆ្នាំ ២០០២, Asian Football Confederation Course for coaches ឆ្នាំ​២០០៣, The AFC ‘A’ Certificate Coaching Course ឆ្នាំ​២០១២ និង AFC Level 1 Goalkeeping Coaching Certificate ឆ្នាំ​២០១៧​។

ក្រោយ​ការ​ចាកចេញ​របស់​លោក សួង ភារ​ម្យ ក្លិប​ក្រសួងការពារជាតិ បាន​ឲ្យ​កីឡាករ អ៊ុំ វិចិត្រ ដើរ​តួ​ធ្វើជា​គ្រូបង្វឹក​អ្នកចាំទី​បណ្តោះអាសន្ន​សិន ខណៈ​កីឡាករ អ៊ុំ សេរី​រ័ត្ន ដើរ​តួ​ជា​អ្នកចាំទី​ដៃ​ទី​១​បណ្តោះអាសន្ន​។ លោក សួង ភារ​ម្យ ត្រូវ​បង្ហាត់​កីឡាករ​អ្នកចាំទី​ក្មេងៗ​មួយចំនួន​នៅក្នុង​ក្លិប​ថ្មី​មានដូចជា ជា វ៉ាន់​សាក់​, កែវ សុខ​សិលា និង ធឿន សុ​ហួរ ដែល​ត្រូវការ​ហ្វឹកហាត់​ជាមួយ​អ្នកជំនាញ​បន្ថែម​ដើម្បី​អនាគត​វែងឆ្ងាយ​។

​ងាក​មក​មើល​ស្នាដៃ​របស់​លោក សួង ភារ​ម្យ ដែល​ធ្លាប់ធ្វើ​កន្លងមក​គឺ​លោក​ធ្លាប់ជា​គ្រូបង្វឹក​ក្រុម​ក្រសួងការពារជាតិ មុន​ផ្លាស់​ទៅ​បង្ហាត់​ក្រុម​យុវជន​សាលា​បាល់ទាត់​ជាតិ នៅ​បាទី​ក្នុង​ខេត្តតាកែវ មួយរយៈ និង​ត្រឡប់​មក​ចូលរួម​ក្នុង​ក្រសួងការពារជាតិ វិញ​មុន​ផ្លាស់​ទៅ​វិសាខា នៅ​ពាក់កណ្ដាល​រដូវ​កាល​នេះ​។ លោក​ក៏​ធ្លាប់​ជាប់​ឈ្មោះ​ជា​គ្រូបង្វឹក​របស់​ក្រុម​ជម្រើសជាតិ​នាពេល​កន្លងមក​ផងដែរ​។ កីឡាករ​ដែល​លោក ធ្លាប់​បង្ហាត់​ឲ្យមាន​កេរ្តិ៍ឈ្មោះ​នៅក្នុង​ប្រទេស​មានដូចជា ស៊ូ យ៉ា​ទី របស់​បឹងកេត​, គង់ ធ្នូ របស់​គីរីវង់​សុខ​សែន​ជ័យ​, អ៊ុំ វិចិត្រ និង​អ៊ុំ សេរី​រ័ត្ន របស់​ក្រសួងការពារជាតិ​, ហែម ស៊ី​ម៉ៃ របស់អង្គរថាយហ្គឺរជាដើម៕

 

Source: Kampuchea Thmey Daily