កំពង់ធំ ៖ ឯកឧត្តមបណ្ឌិត ងួន ញ៉ិល អនុប្រធានទី២រដ្ឋសភា បានអំពាវនាវដល់ព្រះសង្ឃ និងប្រជាពលរដ្ឋទាំងអស់ដែលគ្រប់អាយុបោះឆ្នោត សូមអញ្ជើញទៅបោះឆ្នោតឲ្យបានគ្រប់ៗគ្នាក្នុងន័យបំពេញកាតព្វកិច្ចជាពលរដ្ឋ ដើម្បីជោគវាសនាខ្លួន និងចូលរួមជាមួយរាជរដ្ឋាភិបាលបន្តអនុវត្តនូវលទ្ធិប្រជាធិបតេយ្យ និងកសាងសង្គមជាតិឱ្យកាន់តែរីកចម្រើនថែមទៀត។
នៅក្នុងពិធីសម្ពោធសមិទ្ធផលនានាក្នុងវត្តស្វាយភ្លើង ឃុំស្វាយភ្លើង ស្រុកបារាយណ៍ ខេត្តកំពង់ធំ កាលពីថ្ងៃទី១០ ខែមិថុនា ឆ្នាំ២០១៨ ឯកឧត្តមបណ្ឌិត ងួន ញ៉ិល បានជម្រាបជូនថា ការបោះឆ្នោតជ្រើសរើសតំណាងរាស្ត្រ នីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ដែលនឹងឈានចូលជិតមកដល់ក្នុងពេលឆាប់ៗនេះ ដូច្នេះសូមអំពាវនាវដល់ព្រះសង្ឃ និងប្រជាពលរដ្ឋទាំងអស់អញ្ជើញទៅបោះឆ្នោតឲ្យបានគ្រប់ៗគ្នា។ ឯកឧត្តមបណ្ឌិតអនុប្រធានទី២រដ្ឋសភាបានរំលឹកថា សូមកុំឱ្យជឿតាមជនអគតិមួយចំនួន ដែលបានអំពាវនាវកុំឲ្យពលរដ្ឋទៅបោះឆ្នោតនោះ។ ត្រូវយល់ថាការបោះឆ្នោត គឺជាការប្រើប្រាស់សិទ្ធិរបស់ខ្លួនដោយផ្ទាល់ ហើយប្រសិនបើប្រជាពលរដ្ឋមិនបានទៅបោះឆ្នោតទេនោះ នឹងបាត់បង់សិទ្ធិ ក្នុងការសម្រេចចិត្តរបស់ខ្លួនក្នុងការជ្រើសរើសអ្នកដឹកនាំប្រទេស ដែលខ្លួនស្រឡាញ់ពេញចិត្ត។ ឯកឧត្តមបណ្ឌិតអនុប្រធានទី២រដ្ឋសភាបានលើកឡើងថា សមិទ្ធផលជាច្រើនដែលបានសម្ពោធនាឱកាសនេះ គឺដោយសារប្រទេសជាតិទទួលបាននូវសុខសន្តិភាព និងស្ថិរភាពនយោបាយដែលប្រសូត្រចេញពីកិច្ចខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី តែបើប្រទេសជាតិមិនមានសន្តិភាពនោះទេ អ្វីៗមិនអាចកសាងបានឡើយ ហើយជំនឿសាសនារបស់ពលរដ្ឋក៏គ្មានដែរ។ ជាមួយការថ្លែងអំណរគុណដល់សប្បុរសជន និងពុទ្ធបរិស័ទចំណុះជើងវត្តទាំងអស់ ដែលបានចូលរួមកសាងសមិទ្ធផលនានាក្នុងវត្ត ឯកឧត្ដមបណ្ឌិត ងួន ញ៉ិល ក៏បានអញ្ជើញបំពាក់គ្រឿងឥស្សរិយយសមេដាយស្ថាបនាជាតិប្រគេន និងជូនដល់សប្បុរសជន ដែលបានចូលរួមចំណែកកសាង អភិវឌ្ឍន៍សង្គមជាតិ និងបានប្រគេនថវិកា និងសម្ភារៈចំពោះព្រះសង្ឃ និងកាត់ខ្សែបូសម្ពោធដាក់អោយប្រើប្រាស់នាពេលនោះផងដែរ។
តាមរបាយការណ៍លោក ហាក់ ម៉ុងហ៊ួត អភិបាលស្រុកបារាយណ៍ បានឲ្យដឹងថា វត្តស្វាយភ្លើងមានអាយុកាល១៥០ឆ្នាំមកហើយ តែក្នុងរបបប្រល័យពូជសាសន៍៣ឆ្នាំ ៨ខែ ២០ថ្ងៃ ត្រូវបានបំផ្លិចបំផ្លាញគ្មានសល់។ ចាប់តាំងពីឆ្នាំ១៩៨០ក្រោមការយកចិត្តទុកដាក់ផ្តួចផ្តើមគំនិតរបស់ឯកឧត្តមបណ្ឌិត ងួន ញ៉ិល អនុប្រធានទី២រដ្ឋសភា និងជាតំណាងរាស្ត្រមណ្ឌលខេត្តកណ្តាល រួមជាមួយពុទ្ធបរិស័ទក្នុងនិងក្រៅប្រទេស បានសម្រេចកសាងនូវសមិទ្ធផលជាច្រើនរួមមានព្រះវិហារ ឧបដ្ឋានសាលា កុដិតូចធំ ជាបន្តបន្ទាប់សម្រាប់ពលរដ្ឋគោរពបូជាចំណាយថវិកាអស់ប្រមាណជាង ៨ម៉ឺនដុល្លារអាមេរិក៕
Source: Kampuchea Thmey Daily
0 Comments