ភ្នំពេញ ៖ រថយន្តមិនចាំម៉ាកមួយគ្រឿង បានបើកបញ្ច្រាសទិសបុកគ្នាជាមួយម៉ូតូសង់កូរ៉េដឹកផ្លែឈើបណ្តាលឱ្យមនុស្សរងរបួសធ្ងន់២នាក់ ចំណែកម៉ូតូខូចខាតយ៉ាងដំណំ ហើយចាក់ផ្លែឈើចោលរាយប៉ាយពេញផ្លូវ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៥ព្រឹកថ្ងៃទី១២ខែមិថុនា ឆ្នាំ២០១៨ តាមបណ្តោយផ្លូវ៥៩៨ ភូមិទួលពពែ សង្កាត់ទួលសង្កែទី២ ខណ្ឌឬស្សីកែវរាជធានីភ្នំពេញ។
រថយន្ត ដែលបើកបញ្ច្រាសផ្លូវ មិនត្រូវបានស្គាល់ម៉ាកនោះទេ រីឯម៉ូតូម៉ាកសង់កូរ៉េពណ៌ក្រហមពាក់ស្លាកលេខ2687ភព1 ជិះដោយប្រុសស្រី២នាក់របួសធ្ងន់។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញម៉ូតូមួយគ្រឿងខាងលើ ជិះដោយមនុស្សប្រុសស្រី២នាក់ មានដឹកផ្លែឈើផងតាមផ្លូវ៥៩៨ ក្នុងទិសដៅពីត្បូងទៅជើងតាមទិសអាទិភាព ខណៈមកដល់ចំណុចកើតហេតុ ក៏ស្រាប់តែមានរថយន្តមិនចាំម៉ាកខាងលើបើកបញ្ច្រាសទិសដៅចរាចរណ៍ពីជើងទៅត្បូងខាងកើតទ្រូងផ្លូវ ជ្រុលបុកគ្នាពេញទំហឹងបណ្ដាលឲ្យជនរងគ្រោះប្រុសស្រី២នាក់រងរបួសធ្ងន់ ម៉ូតូដាច់កង់មុខ ហើយផ្លែឈើកំពប់រាយប៉ាយពេញផ្លូវចំណែករថយន្តក្រោយពីកើតហេតុភ្លាម បានគេចខ្លួនបាត់ស្រមោល។
ក្រោយពេលកើតហេតុ ជនរងគ្រោះប្រុសស្រីខាងលើ ត្រូវបានគេដឹកទៅសង្គ្រោះនៅមន្ទីរពេទ្យពន្លឺចំណែកម៉ូតូត្រូវបានសមត្ថកិច្ចមូលដ្ឋាន យកមកធ្វើការវាស់វែងយកទៅរក្សាទុកនៅប៉ុស្តិ៍ទួលសង្កែទី២បណ្ដោះអាសន្ន៕
Source: Kampuchea Thmey Daily
0 Comments