ភ្នំពេញ ៖ លោគី រិទ្ធី ចៅក្រមស៊ើបសួរសាលាដំបូងរាជធានីភ្នំពេញក្នុងសំណុំរឿងក្បត់ជាតិរបស់លោកកឹម សុខ នៅព្រឹកថ្ងៃទី០៧ ខែមិថុនា ឆ្នាំ២០១៨នេះ បានកោះហៅ សាក្សីពីររូបអោយចូលខ្លួនឆ្លើយបំភ្លឺចំពោះមុខចៅក្រមក្នុងនាមជាសាក្សី។
លោកស្រីចក់ សុភាព នាយិកាប្រតិបត្តិសិទ្ធិមនុស្សកម្ពុជា បានចូលខ្លួនបំភ្លឺនៅវេលាម៉ោង៨៖៣០នាទី ថ្ងៃទី០៧ ខែមិថុនា ហើយនៅវេលាម៉ោង១០និង៤០នាទីចៅក្រមបានបញ្ចប់កាសាកសួរនិងបានអោយលោកស្រីចក់ សុភាពត្រឡប់ទៅវិញ។
នៅមុខសាលាដំបូងលោកស្រីចក់ សុភាព បានប្រាប់អ្នកកាសែតថា ចៅក្រមតុលាការបានសាកសួរលោកស្រីអំពីប្រវត្តិការងាររបស់លោកកឹម សុខានៅពេលដែលលោកគឺជាប្រធានអង្គការសិទ្ធិមនុស្សនៅឡើយ។
ទោះបីយ៉ាងណាលោកស្រីចក់ សុភាព បានបដិសេធមិនធ្វើអត្ថាធិប្បាយជុំវិញកិច្ចការរបស់លោកកឹម សុខា និងការទំនាក់ទំនងជាមួយស្ថានទូតអាមេរិក ដែលតុលាការបានសាកសួរលោកស្រី។ចំណែកលោក មាស គឹមសេង ប្រធានអង្គការសមាគមធាងត្នោត ត្រូវចូលបំភ្លឺនៅវេលាម៉ោង១៤៖៣០នាទី ថ្ងៃទី០៧ ខែមិថុនាឆ្នាំ២០១៨នេះ។
កឹម សុខា អតីតប្រធានគណបក្សសង្គ្រោះជាតិ ត្រូវបានតុលាការចោទប្រកាន់ពីបទ សន្ទិដ្ឋភាពជាមួយបរទេស តាមមាត្រា ៤៤៣នៃក្រមព្រហ្មទណ្ឌ។ បទសន្ទិដ្ឋភាពជាមួយបរទេសចែងថា គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ។
សមត្ថកិច្ច បានចាប់ខ្លួនលោក កឹម សុខា ពាក់កណ្តាលអធ្រាត្រ ឈានចូលថ្ងៃទី០៣ ខែកញ្ញា ឆ្នាំ២០១៧។ ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំខ្លួនបណ្ដោះអាសន្ននៅពន្ធនាគារត្រពាំងផ្លុង ក្នុងខេត្តត្បូងឃ្មុំ នៅថ្ងៃទី០៤ ខែកញ្ញា ឆ្នាំ២០១៧។
លោកគី រិទ្ធី ចៅក្រមសាលាដំបូងរាជធានីភ្នំពេញ កាលពីខែមីនា ឆ្នាំ២០១៨ បានចេញដីកាសម្រេចបន្តឃុំខ្លួន លោក កឹម សុខា រយៈពេល៦ខែទៀត ដោយសារតែតុលាការត្រូវបន្តការសាកសួរសាក្សីមួយចំនួនទៀតនៅក្នុងសំណុំរឿងក្ដីនេះ៕
Source: Kampuchea Thmey Daily
0 Comments