សិង្ហបុរី ៖ ក្រោយពីបញ្ចប់ដំណើរទស្សនកិច្ចសិក្សាផ្លាស់ប្តូរបទពិសោធន៍ “លីក្វាន់យូរ» ដែលលោក ហ៊ុន ម៉ាណែត បានជួបពិភាក្សា និងដកបទពិសោធន៍ការងារជាមួយស្ថាប័នសំខាន់ៗ និងជាពិសេសបានជួបសម្តែងការគួរសមជាមួយនឹងថ្នាក់ដឹកនាំកំពូលៗនៃសាធារណរដ្ឋសិង្ហបុរី នោះ លោក ហ៊ុន ម៉ាណែត ត្រូវបានកម្មវិធីទស្សនកិច្ចសិក្សាផ្លាស់ប្តូរបទពិសោធន៍ “លីក្វាន់យូរ” ទទួលស្គាល់ជាបុគ្គលជោគជ័យទី៦៤ ហើយត្រូវបានប្រគល់ពានទទួលស្គាល់ដោយលោកប្រធានកម្មវិធី អេឌី តែ (Eddie Teo) ។
លោក ហ៊ុន ម៉ាណែត បានសរសេរលើបណ្តាញសង្គមហ្វេសប៊ុកផ្លូវការរបស់ខ្លួននៅថ្ងៃទី០៩ខែមិថុនា ឆ្នាំ២០១៨ថា សូមអរគុណដល់កម្មវិធី Lee Kuan Yew Exchange Fellow program ចំពោះការផ្តល់ឱកាសសម្រាប់ធ្វើការសិក្សា ដកបទពិសោធន៍ជាមួយស្ថាប័នសំខាន់ៗមួយចំនួន ក៏ដូចជាថ្នាក់ដឹកនាំសំខាន់ៗរបស់ប្រទេសសិង្ហបុរី។
សូមបញ្ជាក់ថា កម្មវិធីទស្សនកិច្ចសិក្សាផ្លាស់ប្តូរបទពិសោធន៍ “លីក្វាន់យូរ” ត្រូវបានបង្កើតឡើងក្នុងឆ្នាំ១៩៩១ ហើយបានអញ្ជើញបុគ្គលឆ្នើមៗមួយចំនួន ដើម្បីធ្វើទស្សនកិច្ចកម្រិតខ្ពស់នៅសាធារណរដ្ឋសិង្ហបុរី។ បុគ្គលដែលត្រូវបានអញ្ជើញឱ្យចូលរួមកម្មវិធីនេះ ត្រូវបានជ្រើសរើសដោយផ្អែកលើកំណត់ត្រានៃស្នាដៃដែលបានធ្វើកន្លងមក និងមានសក្ដានុពលលេចធ្លោ ក្នុងការចូលរួមអភិវឌ្ឍជាតិខ្លួន ក៏ដូចជាក្នុងទំនាក់ទំនងទ្វេភាគីជាមួយសាធារណរដ្ឋសិង្ហបុរី៕
Source: Kampuchea Thmey Daily
0 Comments