ភ្នំពេញ ៖ លោក ញឹក ប៊ុនឆៃ ដែលទើបត្រូវបានដោះលែងឲ្យមានសេរីភាពកាលពីថ្មីៗនេះ ទាក់ទងបញ្ហាគ្រឿងញៀននៅស្រុកភ្នំស្រួច ខេត្តកំពង់ស្ពឺនោះ ទទួលបានតួនាទីជាប្រធានគណបក្សខ្មែររួបរួមជាតិជាផ្លូវការវិញហើយ តាមរយៈអង្គសមាជរបស់គណបក្ស កាលពីព្រឹកថ្ងៃទី០៩ ខែមិថុនា ឆ្នាំ២០១៨។
សមាជនោះធ្វើឡើង ដើម្បីជ្រើសរើសប្រធានគណបក្សថ្មី ជំនួសលោក សឹង គិរី ដែលមានជំងឺមិនអាចដឹកនាំគណបក្សបាន ហើយបានលាឈប់ និងជ្រើសរើសអនុប្រធាន១រូប ដែលអង្គសមាជនេះ បានរៀបចំឡើងនៅផ្ទះលោក ញឹក ប៊ុនឆៃ ដែលស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដោយមានអ្នកចូលរួមប្រមាណ៦០០នាក់ ជាតំណាងមកពីរាជធានី ខេត្ត ចំនួន២៥ ទូទាំងប្រទេស។
នៅក្នុងសមាជនេះ បានសម្រេចជ្រើសរើសថ្នាក់ដឹកនាំគណបក្ស ដែលមានដូចជា លោកទា ចំរ៉ាត់ ប្រធានកិត្តិយសគណបក្ស, លោក ញឹក ប៊ុនឆៃ ប្រធានគណបក្ស, លោក សឹង្ហ គីរី ឧត្តមទីប្រឹក្សាគណបក្ស, លោក ទេព នន្នរី អនុប្រធានគណបក្ស, លោក អ៊ុំ សុមន្ថា អនុប្រធានគណបក្ស, លោក សុខ វិសាល អគ្គលេខាធិការគណបក្ស, លោក មូល ឈឿន អគ្គលេខាធិការរងគណបក្ស និងលោក ភិន ផុន អគ្គលេខាធិការរងគណបក្ស។
លោក ទា ចំរ៉ាត់ ប្រធានកិត្តិយសគណបក្សបានលើកឡើងថា គណបក្សខ្មែររួបរួមជាតិ មាននយោបាយបង្រួបបង្រួមខ្មែរគ្រប់មជ្ឈដ្ឋានសាមគ្គីជាធ្លុងមួយ មានយុត្តិធម៌ក្នុងសង្គម ប្រកាន់នយោបាយអព្យាក្រឹត្យ និងបានអំពាវនាវឲ្យសមាជិក សមាជិកាអត់ធ្មត់ និងជៀសវាងនូវការច្រណែននិន្ទាឈ្នានីសគ្នា ធ្វើយ៉ាងណាឲ្យបងប្អូននៅមូលដ្ឋាន ទៅបោះឆ្នោតជូនគណបក្សឲ្យបានគ្រប់គ្នា ដើម្បីទទួលបានជោគជ័យ ឬទទួលបានអាសនៈនៅក្នុងការបោះឆ្នោតនាពេលខាងមុខ។
ចំណែកលោក ញឹក ប៊ុនឆៃ ក្រោយពីទទួលបានតួនាទីជាប្រធានគណបក្សខ្មែររួបរួមជាតិឡើងវិញបានថ្លែងថា គណបក្សខ្មែររួបរួមជាតិ ត្រូវបានបង្កើតឡើងនៅថ្ងៃទី៣ ខែកុម្ភៈ ឆ្នាំ២០១៦ ដោយអតីតអ្នកតស៊ូស្នេហាជាតិ ដែលធ្លាប់បានដង្ហែសម្តេចព្រះនរោត្តមសីហនុ ក្នុងការតស៊ូរំដោះប្រទេសជាតិ នាទសវត្សរ៍ទី៨០ ជាគណបក្សយើងទាំងអស់គ្នា មិនមែនជាកម្មសិទ្ធិផ្តាច់មុខរបស់បុគ្គលណាមួយនោះទេ។
លោកបន្តថា គណបក្សខ្មែររួបរួមជាតិគាំទ្ររបបរាជានិយមគាំទ្រព្រះមហាក្សត្រ ព្រមទាំងមានផែនការកែទម្រង់ និងអភិវឌ្ឍន៍ប្រទេសជាតិ ឲ្យមានការរីកចម្រើន រុងរឿងលើគ្រប់វិស័យ។ គណបក្សខ្មែររួបរួមជាតិ ប្រកាន់យកគោលនយោបាយអព្យាក្រឹត្យ មិនរណបមហាអំណាច មិនរណបបរទេស ធ្វើការទំនាក់ទំនងជាមួយបណ្ដាប្រទេសទាំងអស់ លើសាកលលោក ដោយមិនប្រកាន់និន្នាការនយោបាយ និងពណ៌សម្បុរឡើយ។
តាមលោក ញឹក ប៊ុនឆៃ ការដឹកនាំ និងគ្រប់គ្រងនៅក្នុងគណបក្សខ្មែររួបរួមជាតិ ធ្វើឡើងតាមបែបលទ្ធិប្រជាធិបតេយ្យ គ្មានបក្សពួកនិយម គ្មានគ្រួសារនិយម និងគ្មានអំពើពុករលួយ អ្នកស្មោះត្រង់អ្នកសកម្មការងារ និងអ្នកជួយឧបត្ថម្ភគណបក្ស ជាអ្នកទទួលបានលទ្ធផលផ្លែផ្កា ហើយមិនអនុញ្ញាតឲ្យអ្នកដែលមិនគោរពគោលការណ៍គណបក្សទទួលបានលទ្ធផល ឬផ្លែផ្កានោះឡើយ។ ជាមួយគ្នានោះ លោក ញឹក ប៊ុនឆៃ បានអះអាងថា គណបក្សខ្មែររួបរួមជាតិនិងធ្វើសហប្រតិបត្តិការជាមួយបណ្ដាគណបក្សផ្សេងៗ ដោយមិនប្រកាន់និន្នាការនយោបាយ ដើម្បីខ្មែរបានឯកភាពគ្នាសាមគ្គីគ្នាជាធ្លុងមួយឈានទៅដោះស្រាយបញ្ហាប្រទេសជាតិ និងបញ្ហារបស់ប្រជាជន ដែលកំពុងប្រឈម នាពេលបច្ចុប្បន្ន ដូចជាបញ្ហាដីធ្លី បញ្ហាអយុត្តិធម៌ និងបញ្ហាពុករលួយជាដើម៕
Source: Kampuchea Thmey Daily
0 Comments