ភ្នំពេញ ៖ កុមារអង្គការមូលនិធិកុមារកម្ពុជា(CCF) ដែលពីមុនរស់នៅតំបន់គំនរសំរាមស្ទឹងមានជ័យកាលពីរសៀលថ្ងៃទី៨ ខែ មិថុនាឆ្នាំ២០១៨ ទទួលបានសម្ភារៈសិក្សា, ឧបករណ៍ក្មេងលេង, សម្លៀកបំពាក់, ស្បែកជើង, ស្រោមជើង, វ៉ែនតា ដែល ជាម៉ាករបស់ Vansពីសប្បុរសជនខ្មែរនិងជនជាតិអាមេរកាំងប្រមាណជាង១០រូបដើម្បីលើកទឹកចិត្តឲ្យពួកគេខិតខំរៀនសូត្រ។
ជាមួយនឹងការសួរសុខទុក្ខ និងការផ្តល់អំណោយមួយចំនួនធំ ជនជាតិអាមេរិកាំងក៏បានបង្កើតកម្មវិធីសប្បាយៗ ដើម្បីឱ្យកុមារក្រីក្រទាំងនេះ ទទួលបាននូវភាពសប្បាយរីករាយ ក្តីស្រឡាញ់ ការយកចិត្តទុកដាក់ ជាពិសេសទទួលបាននូវស្នាមញញឹម។
លោកស្តេវ វ៉ាន់ ដ័ររ៉េន(Steve Van Doren)តំណាងក្រុមហ៊ុន Vans បានថ្លែងឲ្យដឹងថា ការមកចូលរួមឧបត្ថម្ភរបស់ក្រុមហ៊ុន Vans ដល់កុមារក្នុងអង្គការ CCF នេះធ្វើឡើង បន្ទាប់ពីមានការសហការរវាងប្រធានក្រុមហ៊ុន Vans និងប្រធានអង្គការ CCFនេះ។ មួយវិញទៀត នេះជាការជួយដល់សម្រួលមួយផ្នែកតូចសម្រាប់កុមារកម្ពុជាដែលខ្វះខាតសម្ភារៈសិក្សា។ ជាពិសេសចង់ផ្តល់នូវភាពសប្បាយរីករាយ ក្តីស្រឡាញ់ ការយកចិត្តទុកដាក់និងស្នាមញញឹមដល់កុមារកម្ពុជា។
លោកស្តេវ បានបន្ដទៀតថា ក្រុមហ៊ុន Vans នឹងបន្ដជួយ ដល់កុមារកម្ពុជា នៅក្នុងឆ្នាំបន្តបន្ទាប់ទៀត និងជាមួយអង្គការ ផ្សេងៗនៅកម្ពុជា។
លោកស្កុត នីសិន(Scott Neeson)ស្ថាបនិកនិងជានាយកប្រតិបត្តិនៃមូលនិធិកុមារកម្ពុជា CCF បានថ្លែងឲ្យដឹងថា «ខ្ញុំជាអ្នកគាំទ្រផលិតផលម៉ាកVansរបស់ក្រុមហ៊ុនVansដែលមានផលិតផលិតផលជាច្រើនដូចជា៖ ស្បែកជើង កាបូប អាយឺត មួក ហើយខ្ញុំសង្ឃឹមថា អ្នកទាំងអស់គ្នា នឹងនៅបន្ដគាំទ្រផលិតផលរបស់ Vans»។
លោកបានថ្លែងអំណរគុណយ៉ាងជ្រាលជ្រៅចំពោះ ក្រុមការងាររបស់ក្រុមហ៊ុន Vans ដែលបានផ្ដល់នូវសម្ភារៈផ្សេងៗ ដល់កុមារដែលរស់នៅក្នុងអង្គការ CCF ជាពិសេសផ្តល់ភាពរីករាយ និងស្នាមញញឹមដល់កុមារ៕
Source: Kampuchea Thmey Daily
0 Comments