អ្នករចនាម៉ូដ Kate Spade ដែលបានធ្វើអត្តឃាតក្នុងទីក្រុងញូវយ៉កនៅសប្តាហ៍នេះ គឺកំពុងត្រូវបានគេព្យាបាលសម្រាប់ជំងឺធ្លាក់ទឹកចិត្ត និងការថប់បារម្ភអស់រយៈពេល៥ឆ្នាំមកហើយ។ នេះបើតាមការឲ្យដឹងកាលពីថ្ងៃពុធដោយស្វាមីរបស់នាង។
ស្វាមីរបស់នាងឈ្មោះ Andy Spade បាននិយាយនៅក្នុងសេចក្តីថ្លែងការណ៍មួយដែលចុះផ្សាយដោយកាសែត The New York Times ថា “នាងបានស្វែងរកការជួយសង្គ្រោះសម្រាប់ជំងឺធ្លាក់ទឹកចិត្តនិងការថប់បារម្ភក្នុងរយៈពេល៥ឆ្នាំចុងក្រោយនេះដោយបានជួបនឹងគ្រូពេទ្យជាទៀងទាត់និងទទួលយកថ្នាំសម្រាប់ទាំងការធ្លាក់ទឹកចិត្តនិងការថប់បារម្ភ”។
មានការស្តីបន្ទោសចំពោះការអះអាងរបស់បងស្រីអ្នករចនាម៉ូដរូបនេះដែលថា នាង Kate Spade ត្រូវការការថែទាំសុខភាពផ្លូវចិត្តប៉ុន្តែបានបដិសេធការព្យាបាលដោយសារក្តីកង្វល់អំពីផលប៉ះពាល់ដល់ម៉ាកយីហោរបស់នាង។
បងស្រីរបស់ Spade ឈ្មោះ Spaa Saffo បានប្រាប់កាសែត The Kansas City Star ពីផ្ទះរបស់នាងនៅទីក្រុង Santa Fe ក្នុងរដ្ឋ New Mexico ថា “ខ្ញុំមិនដែលនឹកស្មានដល់ការស្លាប់របស់តារារចនាម៉ូដវ័យ៥៥ឆ្នាំរូបនេះទេ”។ សពរបស់នាងត្រូវបានរកឃើញកាលពីថ្ងៃពុធក្នុងបន្ទប់ផ្ទះល្វែង Park Avenue របស់នាង។
លោកស្រី Spade ដែលមានស្រុកកំណើតនៅ Missouri ហើយដំបូងឡើយធ្វើការជាអ្នកសារព័ត៌មានគឺបានចាប់ផ្តើមដាក់ម៉ាកសំគាល់របស់នាងនៅឆ្នាំ១៩៩៣ជាមួយស្វាមីរបស់នាងឈ្មោះ Andy និងមានជំនួយពីអ្នកវិនិយោគខាងក្រៅ។
គេហទំព័រព័ត៌មានតារាល្បី TMZ បានដកស្រង់ប្រភពប៉ូលិសដែលនិយាយថា លោកស្រី Spade បានធ្លាក់ចូលទៅក្នុងភាពតានតឹងក្នុងរយៈពេលប៉ុន្មានសប្តាហ៍ថ្មីៗនេះបន្ទាប់ពីស្វាមីរបស់នាងបានចាកចេញពីនាងហើយកំពុងស្វែងរកការលែងលះ។
លោក Andy Spade បាននិយាយថា គាត់និងភរិយារបស់គាត់បានរស់នៅដាច់ដោយឡែកពីគ្នាប៉ុន្តែនៅក្នុងសង្កាត់តែមួយដោយមើលថែកូនស្រីអាយុ១៣ឆ្នាំរបស់ពួកគេឈ្មោះ Bea៕ AFP
Source: Kampuchea Thmey Daily
0 Comments