ង៉ែ​ត្រ រដ្ឋា អាច​យកឈ្នះ Pic Ka បាន​ឬ​អត់?

ង៉ែ​ត្រ រដ្ឋា អ្នក​ប្រដាល់​ក្លិប​តា​ព្រហ្ម​មានជ័យ ត្រូវគេ​ផ្គូផ្គង​អោយ​ជួប​ជាមួយ​អ្នក​ប្រដាល់​ថៃ Pic Ka នា​យប់​ថ្ងៃទី​០៩ ខែ​មិថុនា ​ឆ្នាំ​២០១៨​នេះ នៅ​សង្វៀន​TV5 ព្រែកកំពឹស។ ង៉ែ​ត្រ រដ្ឋា និង Pic Ka ប្រកួត​គ្នា​ក្នុង​ទម្ងន់​៦៣,៥០០​គ​.​ក្រ។

ជា​លើក​ទី​២០​របស់​ង៉ែ​ត្រ រដ្ឋា​ហើយ ដែល​គេ​ផ្តល់​ឪ​កាស​ឲ្យ​ឡើង​ប្រកួត​ជាមួយ​ថៃ​នេះ ។ ង៉ែ​ត្រ រដ្ឋា​ប្រកួត​ជាមួយ​ថៃ​១៩​លើក​កន្លងមកនេះ គឺ​ឈ្នះ​តែ​៣​លើក​ទេ ដោយ​ចាញ់​១៣​លើក ស្មើ​០២​លើក និង អត់​ប្រកាស​លទ្ធផល​០១ លើក ។​
​
អ្នក​ប្រដាល់​ថៃ Pic Ka ដែលជា​គូរ​បស់​ង៉ែ​ត្រ រដ្ឋា​នេះ មិន​ធ្លាប់​មក​ប្រកួត​នៅ​ស្រុក​ខ្មែរ​ទេ​កន្លងមក ។ អ្នក​ប្រដាល់​ថៃ​រូបនេះ គេ​មាន​កំណត់ត្រា​ប្រកួត​តិចជាង​ង៉ែ​ត្រ រដ្ឋា ជាង​ពាក់កណ្តាល​ឯណោះ ពោល​គេ​មាន​ប្រវត្តិ​ប្រកួត​៦៩​លើក ក្នុងនោះ​វាយ​ឈ្នះ​៥៤​លើក ចាញ់​១៤​លើក និង ស្មើ​០១​លើក បើ​ធៀប​ជាមួយ​ង៉ែ​ត្រ រដ្ឋា​នោះ គឺ​តិចជាង​៧០​លើក ។
​
ង៉ែ​ត្រ រដ្ឋា គេ​មាន​ប្រវត្តិ​ប្រកួត​ចំនួន​១៤២​លើក ឈ្នះ​១១១​លើក ចាញ់​២៧​លើក និង​ស្មើ​០៤​លើក ។ រដ្ឋា មាន​ស្នៀត​ទាត់​ល្អ កណ្តាប់ដៃ​ល្អ ហើយ​ស្នៀត​ជង្គង់ កែង ក៏​ល្អ​គួរសម​ដែរ ។​ទន្ទឹមនេះ គេ​ចិត្ត​ប្រដាល់​ធំ តែ​វាយ​ចេញ​រាង​យឺត​បន្តិច​។ ប៉ុន្តែ​យ៉ាងណា ង៉ែត រដ្ឋា មិនដឹងថា​អាច​យកឈ្នះ​ថៃ​(Pic Ka)​នេះ បាន​ឬ​អត់​នោះទេ​? ព្រោះថា ង៉ែ​ត្រ រដ្ឋា មួយរយៈ​ចុងក្រោយ​នេះ គេ​ស្រុត​ធ្លាក់ចុះ​ច្រើន ដោយ​វាយ​ចាញ់​ថៃ​៤ ប្រកួត​ជាប់ៗ​គ្នា​តែម្តង ។​
​
ដូច្នេះ ការ​ឈ្នះ​ចាញ់​រវាង​ង៉ែ​ត្រ រដ្ឋា និង Pic Ka នេះ ពុំមាន​នរណា​ហ៊ាន​ទាយ​មុន​ថា អ្នកណា​ឈ្នះ​នោះទេ ? ។ យ៉ាងណា​មិនទាន់​ប្រាកដថា អ្នក​ប្រដាល់​ក្លិប​តា​ព្រហ្ម​មានជ័យ​រូបនេះ គេ​វាយ​ចាញ់ Pic Ka នោះដែរ៕

Source: Kampuchea Thmey Daily