កណ្តាល ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងារថ្នាក់ជាតិចុះជួយស្រុកកោះធំ បានជួបសំណេះសំណាលជាមួយសិស្សថ្នាក់ទី១២ នៃវិទ្យាល័យទាំង៤ ស្ថិតក្នុងស្រុកកោះធំ ខេត្តកណ្ដាល កាលពីថ្ងៃព្រហស្បតិ៍ ៥កើត ខែស្រាពរណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៦ ខែសីហា ឆ្នាំ២០១៨។
ពិធីនេះប្រព្រឹត្តឡើង ដោយមានការចូលរួមពីលោកប្រធាន និងអនុប្រធានការិយាល័យអប់រំស្រុក លោកគ្រូ អ្នកគ្រូ និងសិស្សានុសិស្សថ្នាក់ទី១២ នៃវិទ្យាល័យទាំង៤ សរុបប្រមាណ ៧៩២នាក់។
ថ្លែងទៅកាន់អង្គពិធីទាំងមូលទេសរដ្ឋមន្ត្រី ស៊ុន ចាន់ថុល បានផ្ដាំផ្ញើឲ្យសិស្សានុសិស្សទាំងអស់ ខិតខំប្រឹងប្រែងរៀនសូត្រ ដើម្បីយកចំណេះទាំងនេះមកបម្រើប្រទេសជាតិរបស់យើង។ ពីព្រោះថា ចំណេះវិជ្ជាជាទ្រព្យមានតម្លៃមិនអាចកាត់ថ្លៃបាន ស្របតាមសុភាសិតខ្មែរមួយឃ្លាពោលថា «ចំណេះវិជ្ជាជាទ្រព្យដ៏ចំណាន ចោរលួចមិនបាន ចាយច្រើនរឹតតែចម្រើនឡើង»។
ទេសរដ្ឋមន្ត្រី បានបន្ថែមទៀតថា រាជរដ្ឋាភិបាលដឹកនាំដោយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវការអ្នកចេះដឹងពិតប្រាកដបន្ថែមទៀតដើម្បីជួយ អភិវឌ្ឍលើគ្រប់វិស័យ ក្នុងគោលបំណងប្រែក្លាយពីប្រទេសកំពុងអភិវឌ្ឍទៅជាប្រទេសអភិវឌ្ឍជឿនលឿន ដូចបណ្តាប្រទេសអភិវឌ្ឍមួយចំនួនលើសកលលោក។
ជាមួយគ្នានេះផងដែរ ទេសរដ្ឋមន្ត្រី បានសន្យាផ្តល់ម៉ូតូមួយគ្រឿងដល់សិស្សដែលប្រឡងជាប់ ទទួលបាននិទ្ទេស A និងសិស្សដែលប្រឡងជាប់ទទួលបានប្រាក់រង្វាន់លើកទឹកចិត្ត ចំនួន ១០ម៉ឺនរៀល ជាពិសេសស្វែងរកអាហារូបករណ៍ពីសាកលវិទ្យាល័យនានានៅក្នុងស្រុកផ្ដល់ជូនសិស្សក្នុងស្រុកកោះធំ និងនាំក្មួយៗសិស្សានុសិស្សដែលបានប្រឡងជាប់ជិះរថភ្លើងពីភ្នំពេញទៅកំពង់ឆ្នាំង ដើម្បីស្វែងយល់ពី ការរីកចម្រើនរបស់ប្រទេសជាតិផងដែរ។
លោក ស៊ុន ចាន់ថុល ក៏បានក្រើនរំឭកផងដែរឲ្យក្មួយៗសិស្សានុសិស្សទាំងអស់តាំងចិត្តឲ្យ មុតស្រួច ស្វែងរកគ្រប់មធ្យោបាយ ប្រើឲ្យអស់សមត្ថភាព និងសក្ដានុពលរបស់ខ្លួន ពិសេសរំឭកមេរៀនឲ្យ បានញឹកញាប់ ថែរក្សាសុខភាពឲ្យបានល្អ មុនពេលថ្ងៃប្រឡងមកដល់ និងបានជូនពរឲ្យពួកគាត់ប្រឡង ជាប់គ្រប់ៗគ្នា ជាពិសេសទទួលបាននិទ្ទេស A ឲ្យបានច្រើនជាងឆ្នាំមុនៗ។
សូមជម្រាបជូនថា ការប្រឡងសញ្ញាប័ត្រមធ្យមសិក្សាទុតិយភូមិឆ្នាំសិក្សា២០១៧-២០១៨ នឹងប្រព្រឹត្ត ទៅនៅថ្ងៃទី២០ ខែសីហា ឆ្នាំ២០១៨ខាងមុខនេះ ដែលក្នុងនោះនៅស្រុកកោះធំ មានមណ្ឌល ប្រឡង ចំនួន បី រួមមាន ៖ វិទ្យាល័យ ហ៊ុន សែន ស្អាង (ជើង) វិទ្យាល័យ ហ៊ុន សែន ស្អាង (ត្បូង) និងវិទ្យាល័យ វឌ្ឍនៈឈូងលាភ៕
Source: Kampuchea Thmey Daily
0 Comments