អ្នកប្រដាល់ជើងខ្លាំងកម្ពុជា២រូប ត្រៀមជួបប្រកួតជាមួយអ្នកប្រដាល់ថៃ នៅក្នុងកម្មវិធីប្រដាល់ពេលព្រឹកGanzberg Top Fighter លើសង្វៀនSEATV ថ្ងៃទី ១៨ ខែសីហា ឆ្នាំ២០១៨នេះ។ នោះគឺ សរ រាជសីហ៍ អ្នកប្រដាល់ក្លិបមោងឫស្សីមរតកគុនខ្មែរខេត្តបាត់ដំបង ត្រូវជួបប្រកួតជាមួយអ្នកប្រដាល់រុស្សីឈ្មោះ Aushev។ ពួកគេប្រកួតគ្នាក្នុងប្រភេទទម្ងន់៧៥ គីឡូក្រាម ។
នេះជាការជំនួបដ៏តឹងតែងបំផុត រវាងសរ រាជសីហ៍ និង Aushev ព្រោះថាអ្នកប្រដាល់រុស្សីរូបនេះ មិនធម្មតានោះឡើយ ។ នេះបើតាមអ្នកផ្គូផ្គងប្រចាំសង្វៀនSEATV អោយដឹង ។
សរ រាជសីហ៍ គេធ្លាប់ប៉ះប្រកួតជាមួយអ្នកប្រដាល់បរទេសប៉ុន្មាននាក់ហើយ តែភាគច្រើនជាអ្នកប្រដាល់ថៃប៉ុណ្ណោះ គឺពុំសូវធ្លាប់ដែលជួបប្រកួតជាមួយអឺរ៉ុបនោះឡើយ ។ តែយ៉ាងណា កណ្ដាប់ដៃ កែង និងជើងទាត់របស់រាជសីហ៍ វាយចេញខ្លាំងនិងមានទម្ងន់ធ្ងន់គួរសមដែរ ដូច្នេះការជួបជាមួយAushev ប្រហែលជាមិនមានបញ្ហាចោទអ្វីឡើយ។
ជាអ្នកប្រដាល់ដែលមិនចេះវាយបន្ធូដៃនោះទេ អោយតែគេយល់ថាដៃគូអាចបង្ក្រាបបាន គឺសរ រាជសីហ៍ គេមិនប្រោះទុកយូរទេ គេផ្តួលយកឈ្នះតែម្តង ។ និយាយពីបច្ចេកទេស និង កលល្បិចនោះ គេនៅស្ទើរនៅឡើយ តែកម្លាំងកាយសម្បទារឹងមាំល្អ ។ សរ រាជសីហ៍ ធ្លាប់ឡើងប្រកួតចំនួន៦៦ដង ឈ្នះ ៥៤ដង ចាញ់១២ ដង និងមិនដែលស្មើ ។ ចាំមើល រវាង Aushev និង សរ រាជសីហ៍ តើនរណាជាអ្នកឈ្នះ សម្រាប់ជំនួបលើកដំបូងនេះ? ។
តាមលោកញាណ សុធី អ្នកចាត់ចែងកម្មវិធីប្រដាល់ប្រចាំSEATV អោយដឹងថាAushev នេះ គេទើបតែមកប្រកួតនៅសង្វៀនរបស់លោកលើកទី១ប៉ុណ្ណោះ ។
Aushev គេជាអ្នកប្រដាល់ជើងថ្មី ដែលហ្វឹកហាតនៅស្រុកថៃ ។ គេមានស្នៀតកណ្តាប់ដៃល្អ ខ្លាំង និងរហ័ស ហើយចេះស្នៀតជង្គង់ថែមទៀត ។ អ្នកប្រដាល់រូបនេះ មានប្រវត្តិប្រកួតចំនួន២៧លើក ដោយឈ្នះ២១ដង ចាញ់០៦ លើកនិងមិនដែលស្មើ ។ នេះបើតាមលោកញាណ សុធី បញ្ជាក់អោយដឹង ។
គួរបញ្ជាក់ឲ្យដឹងដែរថា សរ រាជសីហ៍ កាលពីថ្ងៃទី១៥កក្កដា២០១៨កន្លងទៅនេះ បានវាយផ្តួលអ្នកប្រដាល់ជនជាតិគៀរហ្ស៉ីស្ថានឈ្មោះ Sergei អោយបោះបង់ចោលការប្រកួត នៅក្នុងទឹកទី៣ នៅលើសង្វៀនSEATVនេះ ។
សុខ សាវិន អ្នកប្រដាល់ជើងខ្លាំង នៃក្លិបអេលីតគុនខ្មែរ នឹងត្រូវឡើងតស៊ូជាមួយអ្នកប្រដាល់ថៃPhat Srakeo ដោយជួបគ្នាក្នុងទម្ងន់៦០គ.ក្រ ។
Phat Srakeo គេធ្លាប់មកប្រកួតនៅស្រុកខ្មែរម្តងហើយកន្លងមក ។ អ្នកប្រដាល់ថៃ Phat Srakeo នេះ មានកម្ពស់ទាបជាងសាវិនគឺ១,៦៦ម៉ែត្រ និងមានកំនត់ត្រាប្រកួតតិចជាងសាវិន គឺ៦២លើក ឈ្នះ៥៣លើក ចាញ់០៩លើក មិនដែលស្មើ ។ ដូច្នេះPhat Srakeo មិនប្រាកដថា អាចយកឈ្នះលើសុខ សាវិនបាននោះឡើយ តែយ៉ាងណាសាវិន ក៏មិនអាចមើលស្រាលអ្នកប្រដាល់ថៃនោះបានដែរ ។
សុខ សាវិន មានកម្រិតសមត្ថភាពបច្ចេកទេសល្អ កាយសម្បទារឹងមាំ ។គេមានប្រវត្តិប្រកួត៩១លើក ដែលក្នុងចំនួននេះគេវាយឈ្នះ៦៦លើក ចាញ់២០លើក និងស្មើ០៥លើក ។ ដូចនេះមិនធម្មតាទេ ឡើងប្រកួតជិតមួយរយលើក ចាញ់តែ២០លើកនោះ ។
ទោះជាយ៉ាងណា សុខ សាវិន គេប្រហែលជាមិនពិបាកក្នុងការជួប Phat Srakeo នោះទេ ព្រោះអ្នកប្រដាល់កម្ពុជារូបនេះ ជាជើងចាស់និងធ្លាប់មានឈ្មោះបោះសម្លេងគួរសមដែរ ។ជាលើកទី៩ របស់សាវិនហើយ ដែលជួបប្រកួតជាមួយថៃ ។ក្នុងការជួប៨លើកកន្លងមក សាវិន វាយឈ្នះថៃ៥លើក និងចាញ់៣លើក ។ ចាំមើល លើកនេះសុខ សាវិន អាចយកឈ្នះ Phat Srakeo បានឬអត់ ? ៕
Source: Kampuchea Thmey Daily
0 Comments