ភ្នំពេញ ៖ បុរសម្នាក់ ត្រូវគេវាយប៉ោងភ្នែក និងបែកមុខមាត់ ព្រោះតែរើសបានកាបូបលុយគេហើយម្ចាស់គេសុំវិញមិនឲ្យ ព្យាយាមជិះរត់ ក៏ត្រូវជនរងគ្រោះដេញតាមព្រមទាំងស្រែកថា ចោរៗផងនោះក៏ត្រូវបានប្រជាពលរដ្ឋអ្នកដំណើរនាំគ្នាបើកម៉ូតូដេញតាមចាប់បាន រួចព្រួតគ្នាវាយ ហើយក៏ប្រគល់ជូនសមត្ថកិច្ចតែម្តង។
ហេតុការណ៍នោះ បានកើតឡើងកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី១៦ខែសីហា ឆ្នាំ២០១៨ នៅចំណុចផ្លូវលេខ៦៣ កែងផ្លូវលេខ១៥៤ ក្នុងសង្កាត់បឹងរាំងខណ្ឌដូនពេញ។
សមត្ថកិច្ចបានឲ្យដឹងថា ជនសង្ស័យ ដែលឃាត់ខ្លួននោះ ឈ្មោះឆោម ចាន់ឡាយ ភេទប្រុស អាយុ៣៧ ឆ្នាំ មុខរបរមិនពិតប្រាកដ ស្នាក់នៅម្តុំលូប្រាំសង្កាត់ស្ទឹងមានជ័យទី៣ ខណ្ឌមានជ័យ និងមានស្រុកកំណើតនៅភូមិពោធិចិនដាំ ឃុំ ពោធិចិនដាំ ស្រុកស្វាយអន្ទរ ខេត្តព្រៃវែង(ជនសង្ស័យធ្លាប់ប្រើប្រាស់គ្រឿងញៀនតាមរយៈធ្វើតេស្ដទឹកនោម)។ ចំណែកជនរងគ្រោះឈ្មោះតាំង វិវឌ្ឍន៍ ភេទប្រុសអាយុ៣៤ឆ្នាំ មុខរបរមន្ត្រីរាជការ ស្នាក់នៅសង្កាត់ចតុមុខ ខណ្ឌដូនពេញ។ កាបូបលុយរបស់ជនរងគ្រោះ ដែលជនសង្ស័យរើសយកមិនបានសម្រេចនោះ មានតែលុយ១ដុល្លារប៉ុណ្ណោះ និងអត្តសញ្ញាណប័ណ្ណ១សន្លឹក ប័ណ្ណបើកបររថយន្ត១ សៀវភៅធនាគារ និងកាតATM។
ប្រភពព័ត៌មានបានឲ្យដឹងថា មុនពេលកើតហេតុ ជនរងគ្រោះបានជិះម៉ូតូធូដេឌុបគូដណ្តឹងចេញពីផ្សារសូរិយាម៉លធ្វើដំណើរដល់ចំណុចកើតហេតុ ស្រាប់តែជ្រុះកាបូបលុយ ដែលដាក់នៅចន្លោះម៉ូតូ។ ពេលជិះហួសបន្តិចក៏បកមកក្រោយវិញដើម្បីរើស ក៏ស្រាប់តែមានជនសង្ស័យម្នាក់ជិះម៉ូតូម៉ាកហុងដាឌ្រីម សង់ស៊េរីឆ្នាំ២០១០ ពណ៌ខ្មៅ ពាក់ស្លាកលេខភ្នំពេញ1BG 1532 ធ្វើដំណើរមកពីក្រោយក៏រើសយក។ ពេលនោះជនរងគ្រោះបានប្រាប់ថា ជាកាបូបរបស់ខ្ញុំទេ តែបុរសរូបនោះមិនព្រមឲ្យហើយបានបន្ថែមល្បឿនព្យាយាមជិះម៉ូតូគេចខ្លួន ក៏ត្រូវម្ចាស់កាបូបស្រែកឲ្យជួយឃាត់ ព្រមទាំងបើកម៉ូតូដេញតាម ព្រមទាំងស្រែកឆោឡោថា ចោរៗផងនោះ ទើបមានប្រជាពលរដ្ឋជួយដេញពីចំណុចកើតហេតុ រហូតមកដល់ចំណុចមុខមន្ទីរពេទ្យផ្តល់ឈាមស្ថិតក្នុងសង្កាត់ទំនប់ទឹក ក៏ជួបសមត្ថកិច្ចកំពុងយាមគោលដៅនោះ ជួយឃាត់បានតែម្តង។
ប្រភពព័ត៌មានបានបន្តទៀតថា ក្នុងពេលចាប់បានបុរស ដែលរើសកាបូបគេមិនព្រមឲ្យនោះក៏ត្រូវបានប្រជាពលរដ្ឋស្វាគមន៍ម្នាក់មួយដៃមួយជើងឡើងប៉ោងភ្នែក និងបែកមុខមាត់ ហើយក៏នាំជនសង្ស័យទៅនគរបាលប៉ុស្តិ៍ទំនប់ទឹកយកទៅសាកសួរ រួចក៏ប្រគល់ជនសង្ស័យរូបនោះមកឲ្យមកឲ្យសមត្ថកិច្ចប៉ុស្តិ៍បឹងរាំងខណ្ឌដូនពេញវិញដើម្បីចាត់ការតាមច្បាប់៕
Source: Kampuchea Thmey Daily
0 Comments