ភ្នំពេញ ៖ ជនសង្ស័យដែលសកម្មក្នុងបទល្មើសឆក់តាមផ្លូវសាធារណៈញឹកញាប់រហូតដល់គេស្គាល់មុខច្បាស់ហើយនោះ រហូតមកដល់ពេលនេះត្រូវបានសមត្ថកិច្ចមូលដ្ឋានសហការជាមួយស្ថាប័នតុលាការសម្រេចចូលឆែកឆេរដកហូតយកវត្ថុតាងមួយចំនួន និង ឃាត់ខ្លួនជនសង្ស័យបានពីរនាក់ កាលពីវេលាម៉ោង៦និង៣០នាទីល្ងាច ថ្ងៃទី១៤ ខែសីហា ឆ្នាំ២០១៨ នៅចំណុចភូមិតាងួនសង្កាត់កាកាបទី១ ខណ្ឌពោធិ៍សែនជ័យ។
ជនសង្ស័យ២នាក់នោះទី ១មានឈ្មោះ ឈឹម សុខាវ ហៅអាខាវ ភេទប្រុស អាយុ១៨ឆ្នាំមុខរបរមិនពិតប្រាកដ មានទីលំនៅភូមិតាងួន សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។ទី២ មានឈ្មោះ សុខ សារិន ហៅអាជ្រឹង ភេទប្រុសអាយុ១៨ឆ្នាំមុខរបរមិនពិតប្រាកដមានទីលំនៅភូមិតាងួន សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។ សម្ភារៈដកហូតបានរួមមានម៉ូតូម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខភ្នំពេញ1HC-9576 ជារបស់ជនសង្ស័យឈ្មោះសុខ សារិន និង ម៉ូតូម៉ាកស៊ុយហ្សុយគីស្មាស់វី ពណ៌ខ្មៅ ស៊េរីឆ្នាំ២០១៤ ពាក់ស្លាកលេខភ្នំពេញ1CF-1295 ជាម៉ូតូរបស់ជនសង្ស័យឈ្មោះ ឈឹម សុខាវ។
តាមសមត្ថកិច្ចបានឲ្យដឹងថា កាលពីវេលាម៉ោង១៨ល្ងាចថ្ងៃទី១៤ ខែសីហា ឆ្នាំ២០១៨ កម្លាំងនគរបាលប៉ុស្តិ៍កាកាបទី១សហការជាមួយកម្លាំងនគរបាលយុត្តិធម៌នៃអធិការដ្ឋាននគរបាលខណ្ឌពោធិ៍សែនជ័យ ដោយមានការសម្របសម្រួលពីលោក កុល បុន ព្រះរាជអាជ្ញារងអមសាលាដំបូងរាជធានីភ្នំពេញ បានអនុញ្ញាតឲ្យសមត្ថកិច្ចនគរបាលធ្វើការស្រាវជ្រាវនិងឃាត់ខ្លួនជនសង្ស័យចំនួន២នាក់ខាងលើ បន្ទាប់ពីសមត្ថកិច្ចធ្វើការស្រាវជ្រាវនិងតាមដានសកម្មភាពបានច្បាស់លាស់ហើយនោះនិងក៏ដោយសារមានការសហការល្អ ពីប្រជាពលរដ្ឋរាយការណ៍ប្រាប់ផងដែរ អំពីសកម្មភាពដែលជនសង្ស័យបានធ្វើកន្លងមកដោយបានធ្វើសកម្មភាពឆក់តាមផ្លូវសាធារណៈញឹកញាប់ពោលគឺចំនួន៤លើកមកហើយ ក្នុងនោះបានសម្រេចចំនួនបីលើក។
ក្រោយពីសួរនាំជនសង្ស័យអ្នកទាំង២នាក់ បានសារភាពថា កន្លងមកពួកខ្លួនបានធ្វើសកម្មភាពឆក់យកទ្រព្យសម្បត្តិគេតាមផ្លូវសាធារណៈចំនួន៤លើករួចមកហើយ ដោយលើកទី១នៅថ្ងៃទី២៨ ខែកក្កដា ឆ្នាំ២០១៨ វេលាម៉ោង៤និង៣០នាទី នៅចំណុចផ្សារតាំងកសាងហៅ ផ្សារកណ្ដាល ភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ ឆក់បានទូរស័ព្ទចំនួន១គ្រឿងម៉ាកអូប៉ូ លក់បានលុយចំនួន ៦០ដុល្លា។ លើកទី២នៅថ្ងៃទី ១២ ខែសីហាឆ្នាំ ២០១៨ វេលាម៉ោង៦ល្ងាច នៅចំណុចភូមិតាងួន សង្កាត់កាកាបទី១ ខណ្ឌពោធិ៍សែនជ័យ ឆក់បានទូរស័ព្ទដៃម៉ាក អាយហ្វូន លក់បានលុយចំនួន១២០ដុល្លារ។
លើកទី៣ នៅថ្ងៃទី១៣ ខែសីហាឆ្នាំ ២០១៨ វេលាម៉ោង៧យប់ ក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ ឆក់បានទូរស័ព្ទដៃ មិនបានសម្រេច។ លើកទី៤នៅថ្ងៃទី១៣ ខែសីហា ឆ្នាំ២០១៨ វេលាម៉ោង១១យប់ នៅចំណុចផ្លូវជាលេខ៣ ក្បែររង្វង់មូលចោមចៅ ឆក់បានទូរស័ព្ទដៃម៉ាកសាំស៊ុង លក់បានលុយ៦០ ដុល្លារ។
ក្រោយពីសាកសួរជនសង្ស័យទាំងពីរនាក់រួចសមត្ថកិច្ចបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕
Source: Kampuchea Thmey Daily
0 Comments