ពានរង្វាន់​បាល់ទាត់​សម្តេច​ចក្រី ហេង សំរិន ចាប់ផ្តើម​ប្រកួត​នៅ​ចុង​សប្ដាហ៍​នេះ​តទៅ​ហើយ

ពានរង្វាន់​បាល់ទាត់​សម្តេច​អគ្គ​មហា​ពញា​ចក្រី ហេង សំរិន លើក​ទី​២ ឆ្នាំ​២០១៨ ​នឹង​ចាប់ផ្តើម​ប្រកួត​ពី​ចុង​សប្ដាហ៍​នេះ​តទៅ​ហើយ ដោយមាន​រយៈពេល​ប្រមាណ​ជា​៣​ខែ ខណៈ​មាន​ក្រុម​ចូលរួម​ចំនួន​២១ ដោយ​បែង​ចែកជា​៤​ពូ​ល​ផ្សេងគ្នា​។

ក្រុម​ទាំង ២១ ដែល​បាន​ចុះឈ្មោះ​ចូលរួម​ប្រកួត​នៅ​ឆ្នាំនេះ បាន​ចាប់ឆ្នោត​បែងចែក​ពូ​ល​រួចរាល់ កាល​ពី​ពេល​ថ្មីៗ ដោយ​ក្នុង​នោះ​ពូ​ល A មាន​ក្រុម TN Kandal សម្ព័ន្ធ គ​.​ស​.​ន​.​ប​.​ក Down Town Sport អគ្គនាយកដ្ឋាន​គយ និង​រដ្ឋាករ និង​ក្រុម​យ៉ា​រ៉ា​យ៉ា​រ័ត្ន ឯ​ពូ​ល B មាន​ក្រុម​សម្ព័ន្ធ​យុវជន​មូស្លីម​កម្ពុជា យុវជន​បៃតង បូរី​រ៉ាត់​អេ​ហ្វ​ស៊ី បាសាក់​អេ​ហ្វ​ស៊ី និង​ក្រុម KMH Academy​។ ចំណែក​ពូ​ល C មាន Pisnoka FC ស្នងការ​នគរបាល​ខេត្តកំពត ម៉ា​ឌី​ណា​អេ​ហ្វ​ស៊ី ISI Group United យុវជន​វត្តវ៉ា​រិន្ទ​ព្រែកលៀប និង​ក្រុម U19 ព្រះខ័ន​រាជ​ស្វាយរៀង ខណៈ​ពូ​ល D មាន​ក្រុម​អាណាចក្រ​បៃតង Avatar FC ទន្សោង​អេ​ហ្វ​ស៊ី X-Sport FC និង​ក្រុមយុវជន​ស្វាយជ្រំ​។



​តាម​គម្រោង​ក្រុម​នីមួយៗ​នៅតាម​ពូ​ល​ត្រូវ​ប្រកួត​វិល​ជុំ​តាម​ពូ​ល ដែល​ចាប់ផ្តើម​ពីថ្ងៃ​ទី ២៦ ខែសីហា​ឆ្នាំ​២០១៨ តទៅ ដើម្បី​រក​ក្រុម​ខ្លាំង​ជាង​គេ​ចំនួន​២​ក្រុម​ក្នុង​១​ពូ​ល ឡើង​ទៅ​ប្រកួត​វគ្គ ៨ ក្រុម រួច​ឈានទៅ​វគ្គ​ពាក់កណ្តាល​ផ្តាច់ព្រ័ត្រ និង​វគ្គ​ផ្តាច់ព្រ័ត្រ ដែល​នឹង​គ្រោង​ធ្វើឡើង​នៅ​ថ្ងៃទី ២០ ខែតុលា ឆ្នាំ​២០១៨ ខាងមុខ​។ ចំពោះ​ប្រកួត​បើកឆាក​នៅ​ថ្ងៃអាទិត្យ ចុង​សប្ដាហ៍​នេះ​ក្រុម​ធី​អិន​កណ្ដាល​អែ​ហ្វ​ស៊ី ប៉ះ​ក្រុម​សម្ព័ន្ធ​គ​.​ស​.​ន​.​ប​.​ក នៅ​វេលា​ម៉ោង​៤​ល្ងាច​លើ​ទីលាន​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ ខណៈ​ក្លិប​កីឡាបាល់ទាត់​ពិស្ណុការ ត្រូវ​ជួប​ក្រុម U19 ព្រះខ័ន​រាជ​ស្វាយរៀង (​ឈុត​យុវជន​) នៅវេលា​ម៉ោង​៦​ល្ងាច​។

ចំណែក​ក្រុម​ម្ចាស់​ជើងឯក នឹង​ទទួល​​បាន​ប្រាក់​រង្វាន់​រហូតដល់ ៣២ លាន​រៀល គឺ​ច្រើនជាង​ឆ្នាំមុន ដែល​បាន​ត្រឹម ២៥ លាន​រៀល​។ គណៈកម្មការ​ក៏​ត្រៀម​ប្រាក់​រង្វាន់​ដល់​អ្នកចាំទី​ល្អ អ្នក​ស៊ុត​បាល់​បញ្ចូល​ទី​ច្រើន​ជាង​គេ ក្រុម Fair play ក្រុម​លេខ ២ និង​ក្រុម​លេខ ៣ ផងដែរ​។

សូម​រំលឹក​ថា ​ពានរង្វាន់​សម្តេច​ចក្រី​ឆ្នាំ​ដំបូង​កាលពី​ឆ្នាំ​២០១៧ មាន​ក្រុម​ចូលរួម​ចំនួន​១៨​ក្រុម​ដោយ​ចែកជា​ពូ​ល​ផ្សេងៗ​គ្នា​ដើម្បី​ប្រកួត​ជម្រុះ​។ ជា​លទ្ធផល​ក្រុម​ជើងឯក​បាន​ទៅ​ក្រុម​អាណាចក្រ​បៃតង ដែល​កាលនោះ​ទទួល​បាន​ពានរង្វាន់​១ មេដាយមាស​ម្នាក់​១ និង​ប្រាក់រង្វាន់ ២៥,០០០,០០០ រៀល ហើយ​ក្រុម​សម្ព័ន្ធ​យុវជន​ម៉ូ​ស្លី​ម ​ដែល​ទទួល​បាន​ជើងឯក​រង​ទទួលបាន​មេដាយប្រាក់​ម្នាក់​១​គ្រឿង និង​ទឹកប្រាក់​ចំនួន​១២,០០០,០០០ រៀល និង​ក្រុម​ចំណាត់ថ្នាក់​លេខ​៣ បាន​ទៅ​ក្រុម​ពិស្ណុការ ទទួលបាន​ទឹកប្រាក់​៦,០០០,០០០​រៀល ហើយ​ក្រុម​Old Town Garden ទទួលបាន​ពានរង្វាន់ Fair Play៕

Source: Kampuchea Thmey Daily