ភ្នំពេញ ៖ អភិបាលរាជធានីភ្នំពេញ លោក ឃួង ស្រេង កាលពីព្រឹកថ្ងៃទី៣ ខែសីហា នេះ បានដឹកនាំ មន្ត្រីជំនាញ និងអាជ្ញាធរមូលដ្ឋាន ចុះជួបសំណេះសំណាល សួរសុខទុក្ខ និងស្តាប់នូវសំណូមពរ របស់ប្រជាពលរដ្ឋ រស់នៅសហគមន៍ បុរីសន្តិភាព២ សង្កាត់ចោមចៅទី២ ខណ្ឌពោធិ៍សែនជ័យ។
ក្នុងឱកាសនោះ លោកអភិបាល បានផ្តល់ជូនជាកាដូជាច្រើន ដល់ប្រជាពលរដ្ឋនៅទីនោះ មានផ្លូវចំនួន៧ខ្សែ និងប្រព័ន្ធលូមេ ចំនួន៤ខ្សែ តបតាមការសន្យា កាលពីមុនពេលបោះឆ្នោតជ្រើសតាំងតំណាងរាស្ត្រ នីតិកាលទី៦ កន្លងទៅនេះ។
លោក ឃួង ស្រេង បានមានប្រសាសន៍ថា នៅក្នុងបុរីសន្តិភាព២នេះ រដ្ឋបាលរាជធានីភ្នំពេញបានកសាងសមិទ្ធផលជាច្រើន ដើម្បីបំពេញទៅតាមតម្រូវការ ក្នុងមូលដ្ឋាន របស់ប្រជាពលរដ្ឋ ដែលពីមុនតំបន់នេះ គ្មានអ្វីទាំងអស់ តែមកដល់ឥឡូវនេះ ប្រជាពលរដ្ឋមានផ្ទះសម្បែង រស់នៅសមរម្យ មានផ្សារ មានប្រព័ន្ធទឹក-ភ្លើងប្រើប្រាស់ មានសេវារថយន្តក្រុង និងសេវាសុខាភិបាលថែមទៀត។
សហគមន៍សន្តិភាព២ មានការអភិវឌ្ឍន៍មិនចាញ់សហគមន៍ដទៃទៀត ក្នុងរាជធានីភ្នំពេញឡើយក្រោមការយកចិត្តទុកដាក់ពីអាជ្ញាធរដែនដីគ្រប់លំដាប់ថ្នាក់ ,ការយកចិត្តទុកដាក់ពីរដ្ឋបាលរាជធានីភ្នំពេញដែលតែងតែចុះជាប់ដើម្បីបានដឹងពីសុខទុក្ខរបស់បងប្អូន ជាពិសេសទទួលបានការណែនាំ និងការគិតគូរដ៏ខ្ពង់ខ្ពស់ពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងផ្សារភ្ជាប់សុខទុក្ខជាមួយប្រជាពលរដ្ឋជាប់ជានិច្ច។
គួរបញ្ជាក់ថា សហគមន៍សន្តិភាព២ មានសហគមន៍ប្រជាពលរដ្ឋចំនួន៨សហគមន៍ស្មើនឹង២៥៥០គ្រួសារ ដែលបងប្អូនភាគច្រើនប្រកបរបរលក់ដូរ, សេវាកម្ម និងកម្មកររោងចក្រ។ បងប្អូនទាំងជាង២ពាន់គ្រួសារនេះ ភាគច្រើនត្រូវផ្លាស់ប្តូរទីលំនៅបែបមិនរៀបរយ ចេញពីសហគមន៍ដីក្រហម,សហគមន៍បឹងកក់ និង១ផ្នែកទៀតមកពីប្រភពផ្សេងៗតាំងពីឆ្នាំ២០០៦,២០០៩ និងឆ្នាំ២០១០។
ក្នុងឱកាសនោះដែរ លោក អភិបាលរាជធានីក៏បានថ្លែងអំណរគុណ ចំពោះប្រជាពលរដ្ឋ ដែលបានទៅបោះឆ្នោតយ៉ាងច្រើនកុះករ បង្ហាញពីឆន្ទៈ ក្នុងការជ្រើសរើសមេដឹកនាំ ដែលខ្លួនស្រលាញ់ពេញចិត្ត តាមបែបប្រជាធិបតេយ្យ។
លោកថា ក្នុងនាមអាជ្ញាធរ ដែលជាអាណាព្យាបាល តែងតែគិតគូរជានិច្ច ពីសុខទុក្ខប្រជាពលរដ្ឋនៅតាមមូលដ្ឋានគ្រប់ពេល ជាពិសេសនៅពេលជួបប្រទះនូវបញ្ហាប្រឈមនានា។
បន្ទាប់ពីសំណេះសំណាល លោក អភិបាល និងមន្ត្រីក្រោមឱវាទ បានបន្តចុះ ទៅពិនិត្យមើលស្ថានភាពប្រជាពលរដ្ឋនៅភូមិ ដូនកុក សង្កាត់បឹងធំ ខណ្ឌពោធិ៍សែនជ័យ និងបានផ្តល់ផ្លូវបេតុងឆ្អឹងដែកមួយខ្សែមានប្រវែងជាង១ពាន់ម៉ែត្រ ដើម្បីសម្រួលដល់ការធ្វើដំណើរ ពីភូមិដូនកុក ទៅភូមិបឹងធំ ក្នុងសង្កាត់បឹងធំ និងទៅតំបន់ផ្សេងៗទៀត ដែលតំបន់ទាំងនោះ បានទទួលរងដោយទឹកជំនន់លិចលង់ កាលពីពេលកន្លងទៅនេះ។ រួចពីនោះ ក្រុមប្រតិភូ សាលារាជធានីភ្នំពេញ និង អាជ្ញាធរមូលដ្ឋាន ក៏បានបន្តដំណើរ ទៅពិនិត្យមើលការសាងសង់រង្វង់មូល តាង៉ុយ ដែលស្ថិតក្នុងសង្កាត់ ឪឡោក ខណ្ឌពោធិ៍សែនជ័យផងដែរ៕
Source: Kampuchea Thmey Daily
0 Comments