បាត់ដំបង ៖ លំនៅឋានចំនួន២ខ្នង ដែលបានសាងសង់ឡើងនៅជាប់ៗគ្នា ត្រូវបានអគ្គិភ័យលេបត្របាក់ទាំងកណ្តាលថ្ងៃ បើគិតពីទ្រព្យសម្បត្តិដែលអគ្គីភ័យបំផ្លាញ សរុបប្រមាណជិត២ម៉ឺន ដុល្លារ ដោយសារតែការឆ្លងចរន្តអគ្គិសនី។
បើយោងតាមរបាយការណ៍របស់ការិយាល័យបង្ការ ពន្លត់អគ្គីភ័យ នៃស្នងការដ្ឋាននគរបាល ខេត្តបាត់ដំបង បានអោយដឹងថា ហេតុការណ៍ដែលធ្វើអោយមានភាពចលាចលនេះ បានកើតឡើងកាលពីថ្ងៃទី ៣ ខែសីហា ឆ្នាំ២០១៨ វេលាម៉ោង ១២ថ្ងៃត្រង់ នៅចំណុចក្រុមទី១ ភូមិវត្តលៀប សង្កាត់ចំការសំរោង ក្រុងបាត់ដំបង។
របាយការណ៍បានបន្តថា ក្រោយពីទទួលបានព័ត៌មានភ្លាម កំលាំងការិយាល័យជំនាញបានចេញប្រតិបត្តិការ ដោយបានប្រើប្រាស់រថយន្តទឹកចំនួន៣គ្រឿង ដើម្បីឆ្ពោះទៅកាន់ទីកន្លែងកើតហេតុ ព្រមទាំងបានធ្វើការបាញ់ទប់ស្កាត់ដើម្បីកុំអោយអណ្តាតភ្លើង រាលដាលទៅកាន់ផ្ទះប្រជាពលរដ្ឋដទៃ ព្រោះនៅក្នុងពេលនោះដែរ គឺភ្លើងកំពុងឆេះទៅលើលំនៅដ្ឋានចំនួន២ខ្នង រួចទៅហើយ។
ជាលទ្ធផល អណ្តាតភ្លើងត្រូវបានរលត់អស់នៅវេលាម៉ោង១ និង ២០ នាទី រសៀលថ្ងៃដដែល រីឯផ្ទះដែលត្រូវចរន្តអគ្គិសនីឆ្លង និងឆេះមុនគេគឺម្ចាស់ផ្ទះមានឈ្មោះ វ៉ា កូលាប ភេទស្រី អាយុ៦៣ឆ្នាំ មានមុខរបរលក់ដូរ ដោយផ្ទះនេះមានទំហំ ៧ គុណ ១០ ម៉ែត្រ ធ្វើអំពីឈើ ជញ្ជាំងក្តារ ប្រក់ស័ង្កសី និងទ្រព្យសម្បត្តិរួមមាន ប្រាក់ដុល្លារចំនួន ៤៦០ ដុល្លារ គ្រែ ៤ មាសគ្រឿង ១,៣ តម្លឹង ប្លាទីនគ្រឿង ៧ ជី កង់ ៣ ទូរទស្សន៍ ១ គ្រឿង និងសម្ភារៈក្នុងផ្ទះជាច្រើនទៀត សរុបប្រហែល ៨ ០០០ ដុល្លារ។
ដោយឡែកផ្ទះ១ខ្នងទៀត ដែលត្រូវអណ្តាតភ្លើងរាលដាលឆេះទៅដល់នោះ គឺម្ចាស់ឈ្មោះ ធូ ជឹក ភេទប្រុស អាយុ៦១ឆ្នាំ មានមុខរបរលក់ដូរដូចគ្នា ដោយផ្ទះមានទំហំ៨ គុណ ៩ ម៉ែត្រ ធ្វើអំពីឈើ ជញ្ជាំងក្តារ ប្រក់ស័ង្កសី ដែលទ្រព្យសម្បត្តិដែលខាតបង់រួមមាន មាសគ្រឿង ៦ ជី គ្រែ១ ទូរទស្សន៍១ ក្បាល វី ស៊ី ឌី ១ កង្ហារ ៥ លុយខ្មែរ១ លាន ៣ សែន រៀល និងសម្ភារៈផ្សេងៗទៀត សរុបជាទឹកប្រាក់ អស់ប្រហែល៨ ០០០ ដុល្លារ ដូចគ្នា ដោយមូលហេតុគឺមកពីការឆ្លងចរន្តអគ្គិសនី៕
Source: Kampuchea Thmey Daily
0 Comments