រតនគិរី ៖ បុរសម្នាក់ បានរងរបួសធ្ងន់ ខណៈកំពុងជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខកណ្ដាល 1P-3246 ដឹកត្រីដើរលក់តាមចម្ការ ស្រាប់តែមានរថយន្ត១គ្រឿងម៉ាកកូរ៉េចំណុះ២តោន ដឹកទឹកកក បានជ្រុលចង្កូតបុកម៉ូតូពេញទំហឹង។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១១និង៤៤នាទីព្រឹក ថ្ងៃទី១២ ខែសីហា ឆ្នាំ២០១៨ ត្រង់ចំណុចផ្លូវចូលទៅសមុទ្រ ស្ថិតក្នុងភូមិស៊ើង ឃុំស៊ើង ស្រុកបរកែវ ខេត្តរតនគិរី។
សមត្ថកិច្ចបានឲ្យដឹងថា ជនរងគ្រោះឈ្មោះ ឯក ប៊ុនធឿង ភេទប្រុស អាយុ៣៩ឆ្នាំ ជនជាតិខ្មែរ មុខរបរដឹកត្រីដើរលក់តាមចម្ការ រស់នៅភូមិជ័យជំនះ សង្កាត់ឡាបានសៀក ក្រុងបានលុង រងរបួសបែកក្បាលជង្គង់ ខាងឆ្វេងខ្ទេច និងដៃខាងឆ្វេងផងដែរ ត្រូវបានដឹកបញ្ជូនទៅសង្គ្រោះនៅមន្ទីរពេទ្យបង្អែស្រុកបរកែវ។
ក្រោយកើតហេតុអ្នកបើកបររថយន្តបានរត់គេចខ្លួនបាត់ បន្សល់ទុករថយន្ត និងម៉ូតូនៅកន្លែងកើតហេតុ ត្រូវបានសមត្ថកិច្ចយកមករក្សាទុកនៅអធិការដ្ឋានស្រុកបរកែវ រង់ចាំធ្វើការដោះស្រាយពេលក្រោយ៕
Source: Kampuchea Thmey Daily
0 Comments