បាត់ដំបង ៖ នៅព្រឹកថ្ងៃទី១៣ ខែសីហា ឆ្នាំ២០១៨ គេសង្កេតឃើញថា កម្លាំងជំនាញ របស់មន្ទីរសាធារណការ និងដឹកជញ្ជូន បានចុះសិក្សាស្តីពីគម្រោង ទៅលើចំណុចក្បាលស្ពានវត្តគរ ដែលកំពុងរងការទន្ទ្រានពីសំណាក់ទឹកជំនន់ នាពេលកន្លងមក ដែលធ្វើអោយមានការបាក់ស្រុកយ៉ាងខ្លាំងគួរអោយបារម្ភ។
គួរបញ្ជាក់ដែរថា ស្ពានវត្តគរ បានសាងសង់ឡើងដោយមូលនិធិ នៃរាជរដ្ឋាភិបាល កម្ពុជា ដែលផ្សាភ្ជាប់ពីភូមិវត្តតាមឹម ទៅភូមិវត្តគរ និងឆ្លងកាត់លើដងស្ទឹងសង្កែ ចេញពីខេត្តបាត់ដំបង ឆ្ពោះ ទៅកាន់ខេត្តប៉ៃលិន នាខ្សែបន្ទាត់ព្រំដែនកម្ពុជា ថៃ តាមរយៈផ្លូវជាតិ លេខ ៥៧។
មួយរយៈពេលដ៏វែងអន្លាយមកនេះ ក្បាលស្ពានវត្តគរ ត្រើយខាងកើតបាននិងកំពុងមានការបាក់ស្រុតយ៉ាងធ្ងន់ធ្ងរ ដែលការបាក់ដីនេះបានរាលដាលដល់ខឿនក្បាលស្ពានតែម្តង ដោយតម្រូវអោយអ្នកធ្វើដំណើរត្រូវមានការប្រុងប្រយ័ត្នអោយបានខ្ពស់ ដោយសារតែផ្លូវដែលត្រូវធ្វើដំណើរមានជង្ហុកនៃការបាក់ដីលូតចូលមកដល់ លើចិញ្ចើមផ្លូវទៅហើយ។
កន្លងមក លោក ចាន់ សំបូរ អនុប្រធានមន្ទីរសាធារណការ និងដឹកជញ្ជូន ខេត្ត ធ្លាប់បាននិយាយថា មន្ទីរមិនទាន់មានលទ្ធភាពជួសជុលនៅឡើយទេ ដោយសារតែគ្មានលុយ ហើយគម្រោងមិនទាន់ធ្លាក់មកដល់ ដូច្នេះមន្ទីរបានត្រឹមតែចាក់ដីជាបណ្តោះអាសន្ន ព្រមទាំងបានដាក់ប៉ាយ និងសញ្ញាសម្គាល់នានា ដើម្បីបញ្ចៀសរាល់ការធ្វើដំណើររបស់ប្រជាពលរដ្ឋ កុំអោយក្បែរណ្តៅដីដែលបាក់ស្រុតនោះ។
ផ្ទុយទៅវិញ នៅព្រឹកថ្ងៃនេះដែរ គេក៏បានឃើញកម្លាំងជំនាញ ចុះមកវាស់វែង និងស្ទង់នីវ៉ូ ត្រង់ចំណុចដីបាក់ខាងលើ ដែលកំពុងប្រឈមយ៉ាងធ្ងន់ធ្ងរ ដល់ដីផ្លូវក្បាលស្ពាន ដែលប្រជាពលរដ្ឋធ្វើដំណើរជាប្រចាំ ព្រោះអ្នកធ្វើដំណើរជាច្រើនបានសំដែងនូវការព្រួយបារម្ភយ៉ាងខ្លាំងទៅលើ ការបាក់ស្រុតនេះ។
នៅព្រឹកនោះដែរ លោក ចាន់ សំបូរ ក៏បានលើកឡើងថា ការចុះត្រួតពិនិត្យនេះ គឺកម្លាំងរបស់មន្ទីរបានធ្វើការសិក្សាអំពីគម្រោង ដើម្បីផ្ញើទៅអោយក្រសួងសាធារណការ និងដឹកជញ្ជូន ពិនិត្យ ក្នុងការផ្តល់កញ្ចប់ថវិកា សម្រាប់ការស្ថាបនា និងជួសជុល ក្បាលស្ពាននេះឡើងវិញ ព្រោះលោកក៏យល់ឃើញថា សភាពដីក្បាលស្ពានពិតជាធ្ងន់ធ្ងរឡើងហើយ៕
Source: Kampuchea Thmey Daily
0 Comments