តំណាង​លីគ​កំពូល​អេស្ប៉ាញ មក​ពិភាក្សា​ការងារ​ជាមួយ​តំណាង​លីគ​កំពូល​កម្ពុជា

យោង​តាម​​សេចក្តី​ជូនដំណឹង​របស់​គណៈកម្មការ​ប្រកួត​បាល់ទាត់​​ជាតិ​កម្ពុជា (CNCC) បាន​បញ្ជាក់​ថា ​តំណាង​របស់​លីគ​បាល់ទាត់​កំពូល​ប្រទេស​អេស្ប៉ាញ (La Liga) បាន​មក​ពិភាក្សា​ការងារ​ជាមួយ​​តំណាង​របស់ CNCC ដើម្បី​សិក្សា​ពី​គ្នា​ទៅ​វិញ​ទៅ​មក​និង​ចែករំលែក​ព័ត៌មាន​ពិសេសៗ​រវាង​​គ្នា​នឹង​គ្នា។

ប្រភព​បាន​បញ្ជាក់​ថា​លោក ឈី កុលបុត្រា ប្រធានការិយាល័យទីផ្សារ និង ផ្សព្វផ្សាយ​ព័ត៌មាន​នៃ​គណៈកម្មការ​ប្រកួត​បាល់ទាត់​ជាតិ​កម្ពុជា (CNCC) បាន​ជួប​ជាមួយ​នាយក​គ្រប់គ្រង​ក្រប​ខណ្ឌ La Liga ប្រចាំ​តំបន់​អាស៊ីប៉ាស៊ីហ្វិក ​លោក Ivan Codina នៅ​ព្រឹក​ថ្ងៃច័ន្ទ​ទី១៣ ខែសីហា ដើម​សប្ដាហ៍​នេះ។ ភាគីទាំងពីរបានពិភាក្សាពីការផ្សព្វផ្សាយវិស័យបាល់ទាត់ និង​ ចែករំលែក​ព័ត៌មាន​ពិសេសៗ​ទៅ​វិញ​ទៅ​មក។



ក្រោយ​ជួប​ជាមួយ​ភាគី​ខាង La Liga លោក ឈី កុលបុត្រា បាន​បង្ហើប​ឲ្យ​ដឹង​ជា​សាធារណៈ​ថា «វាជា​ឱកាស​ដ៏​ល្អមែនទែន​ដែល​យើង​បានជួបជាមួយនាយកគ្រប់គ្រង La Liga​ ខាង​អាស៊ី​ប៉ាស៊ីហ្វិក។ យើងបានពិភាក្សាគ្នាយ៉ាងរលូន និង​ បាន​ចែករំលែក​ព័ត៌មាន​មួយ​ចំនួន​ស្ដី​ពី​ការ​ផ្សព្វផ្សាយ​បាល់ទាត់។ ខ្ញុំសង្ឃឹមថា នៅពេលអនាគត​ យើង​នឹង​អាច​មាន​កិច្ចសហ​ប្រតិបត្តិការ​ជាមួយ​គ្នា​ក្នុងវិស័យដ៏មានប្រជាប្រិយភាពនេះ»។

ក្នុង​ដំណើរ​មក​កាន់​ប្រទេស​កម្ពុជា នាយក​គ្រប់គ្រង La Liga និង សហការី​ ក៏​បាន​ជួបជាមួយ​ថ្នាក់​ដឹកនាំក្លិប​មួយ​ចំនួន​ដូចជា បឹងកេត ភ្នំពេញក្រោន និងអ្នកគាំទ្របាល់ទាត់ផងដែរ។ ភាគី La Liga អាច​នឹង​មាន​ការ​នាំយក​កីឡាករ​កម្ពុជា មួយ​ចំនួន​ទៅ​ហ្វឹកហាត់​ដក​ស្រង់​បទពិសោធន៍​នៅ​ប្រទេស​អេស្ប៉ាញ នៅ​ពេល​អនាគត​ទៀតផង៕

Source: Kampuchea Thmey Daily