កីឡាការិនី តេក្វាន់ដូ ជម្រើសជាតិកម្ពុជា ស៊ន សៀវម៉ី បានប្រកួតចាញ់កីឡាការិនី SVETLA NA OSIPOVAមកពីប្រទេសអ៊ូបេគីស្ថាន នៅវគ្គ១ភាគ៤ផ្ដាច់ព្រ័ត្រ នៅក្នុងព្រឹត្តិការណ៍ប្រកួតកីឡាអាស៊ីលើកទី១៨នៅប្រទេសឥណ្ឌូនេស៊ី។
សៀវ ម៉ី ប្រកួតលើប្រភេទទម្ងន់៦៧គីឡូក្រាម។ ក្នុងការប្រកួតដំបូង កីឡាការិនីកម្ពុជារូបនេះ ត្រូវជួបប្រកួតជាមួយកីឡាការិនីមកពីប្រទេសស្រីលង្កា តែកីឡាការិនីស្រីលង្កាបានប្រកាសដកខ្លួនចេញធ្វើឲ្យសៀវម៉ីបានទទួលជ័យជំនះនៅវគ្គ១៦ក្រុមចុងក្រោយនេះ ដោយមិនបាច់បង្ហូរញើស។
ជាមួយនឹងជ័យជំនះនេះ សៀវម៉ីត្រូវប្រជែងជាមួយកីឡាការិនី SVETLANA OSIPOVA ដើម្បីបានឡើងទៅវគ្គពាក់កណ្ដាលផ្ដាច់ព្រ័ត្រ ដែលនៅវគ្គពាក់កណ្ដាលផ្ដាច់ព្រ័ត្រនេះ ប្រសិនបើសៀវម៉ីចាញ់ ក៏បានទទួលមដាយសំរិទ្ធដែរ តែពេលនេះសៀវម៉ីចាញ់នៅវគ្គ១ភាគ៤ផ្ដាចព្រ័ត្រ គឺចាញ់ក្នុងពិន្ទុ៣ ទល់៥។
ក្នុងខណៈដែលកីឡាការិនីតេក្វាន់ដូស៊ន សៀវម៉ីចាញ់នៅវគ្គ៨នាក់ចុងក្រោយនោះ បានធ្វើឲ្យលេចចេញជាសំណួរជាច្រើនថា តើកម្ពុជានៅមានប្រភេទកីឡាណាដែលមានសង្ឃឹមដណ្ដើមបានមេដាយឬទេ ? ។
តេក្វាន់ដូ បើនិយាយដោយឡែកគឺកីឡាការិនីស៊ន សៀវម៉ីជាជាក្ដីសង្ឃឹមខ្លាំងជាងគេរបស់កម្ពុជាក្នុងការប្រជែងយកមេដាយក្នុងការប្រកួតកីឡាអាស៊ីលើកទី១៨ដែលកំពុងធ្វើនៅទីក្រុងហ្សាការតា និង ប៉ាឡាំបាងសាធារណរដ្ឋឥណ្ឌូនេស៊ី ។
ប្រមុខអូឡាំពិកកម្ពុជាលោកថោង ខុនបានអះអាងមុនពេលចេញដំណើរទៅចូលរួមពិធីសម្ពោធបើកការប្រកួតកីឡាអាស៊ីនៅឥណ្ឌូនេស៊ីថា ព្រឹត្តិការណ៍លើកនេះកម្ពុជាសង្ឃឹមថា នឹងរកបានមេដាយមាសលើសពី២គ្រឿង។ ប្រភេទកីឡាដែលជាទីសង្ឃឹមនោះមានតេក្វាន់ដូ ម៉ូតូទឹក ជីជីតស៊ី សូហ្វតិន្នីស ។
លោកបានបញ្ជាក់ថា អ្វីៗគឺសុទ្ធតែជាកម្រោងនិងការប្ដេជ្ញាចិត្ត ។ កាលពីឆ្នាំ២០១៤កម្ពុជាបានកំណត់ទិសដៅថានឹងរកមេដាយមាសឲ្យបានមួយគ្រឿងហើយកាលនោះកម្ពុជាធ្វើបានមែន ។ សម្រាប់ឆ្នាំ២០១៨នេះកម្ពុជាបានដាក់ទិសដៅស្វែងរកមេដាយមាសឲ្យបានលើសពី២ គ្រឿង៕
Source: Kampuchea Thmey Daily
0 Comments