កំពង់ធំ ៖ លោក ប៉ែន សុខុម និងមិត្តភក្ដិ បានស្វែងរកអ្នកឧបត្ថម្ភ ជាថវិកា ឬសម្ភារៈសិក្សា របស់ប្រើប្រាស់មួយចំនួន ពីសប្បុរសជន ដើម្បីយកទៅចែកជូន សិស្សសាលា ៧៧នាក់ និងប្រជាពលរដ្ឋ នៅភូមិទួលនាងសាយ ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។
កម្មវិធីនេះបានរៀបចំធ្វើឡើងកាលពីថ្ងៃទី០៥ ខែសីហា ឆ្នាំ២០១៨ ស្ថិតនៅក្នុងថ្នាក់រៀនបំប៉ន បឹងស្បូវ ដែលមានការចែកសម្ភារៈសិក្សា ដល់ក្មេងៗ និងសិស្សានុសិស្ស ក្នុងម្នាក់ទទួលបាន « កាតាបស្ពាយ ០១ សៀវភៅ ០២ក្បាល ខ្មៅដៃ ដែកឃួង ជ័រលុប »។ ចំណែកប្រជាពលរដ្ឋទទួលបានសាប៊ូកក់សក់ ខ្លា ស ០១ដបផងដែរ រីឯលោកគ្រូ ទទួលបាន ថ្នាំពេទ្យ អាវយឺត មី ត្រីខ ប៊ិចសៀវភៅ ខ្មៅដៃ មួយចំនួនដែរ។
លោកមេភូមិ លោកគ្រូ និងប្រជាពលរដ្ឋ បានសម្តែងនូវអារម្មណ៍សប្បាយរីករាយនិងគាំទ្រដល់សកម្មភាពសប្បុរសធម៌ ដែលបានចូលរួមសាមគ្គីគ្នា ទាំងថវិកា សម្ភារៈសិក្សា សម្ភារៈប្រើប្រាស់មួយចំនួន ពិសេសក្នុងពេលថ្ងៃសម្រាកពីការងារ ដើម្បីនាំយកសម្ភារៈទាំងនោះ ទៅចែកជូនសិស្ស និងប្រជាពលរដ្ឋ ទាំងនេះជាសកម្មភាពសប្បុរសធម៌ ក្នុងការចែករំលែកគ្នាក្នុងគ្រាខ្វះខាត។
លោកមេភូមិ បានបញ្ជាក់ថា ទីនេះគាត់ចង់បាន សាលា០១ខ្នង បីបន្ទប់ និងផុតពីផ្ទៃដី ៣ម៉ែត្រ បានហើយ ងាយស្រួលសម្រាប់ក្មេងតូចៗ បានរៀនជិតផ្ទះ ដោយមិនត្រូវជិះទូកទៅឆ្ងាយពីផ្ទះ៕
Source: Kampuchea Thmey Daily
0 Comments