ភ្នំពេញ ៖ មន្ទីរពេទ្យកៅហ្ស៊ុង នៃកោះតៃវ៉ាន់ សាធារណរដ្ឋប្រជា មានិតចិនបានជួយបណ្តុះបណ្តុះដល់ គ្រូពេទ្យកម្ពុជា លើជំនាញផ្នែកសុខភាពអនាម័យ និងវិធីសាស្ដ្រ ក្នុងការលាងដៃ មុននឹងពិនិត្យ ព្យាបាលអ្នកជំងឺ ដើម្បីធានាបាននូវសុវត្ថិភាព និងស្ដង់ដារត្រឹមត្រូវ។
ថ្លែងក្នុងសិក្ខាសាលាស្ដីពីការបណ្ដុះបណ្ដាលលើកកម្ពស់អនាម័យដៃដល់គ្រូពេទ្យនៅមន្ទីរពេទ្យ បង្អែកបាទី កាលពីព្រឹកថ្ងៃទី២២ ខែសីហាឆ្នាំ២០១៨លោកវេជ្ជបណ្ឌិត Yee Hsuan Chiou នាយកផ្នែកកម្មវិធីនៃមន្ទីរពេទ្យ កៅហ្ស៊ុង នៃកោះតៃវ៉ាន់ សាធារណរដ្ឋប្រជាមានិតចិន បានលើកឡើងថា ការបណ្ដុះបណ្ដាលជំនាញសុខភាពអនាម័យ ក្នុងការ លាងដៃសម្រាប់គ្រូពេទ្យនេះក្នុងគោលដៅលើកកម្ពស់ការយល់ដឹងដល់គ្រូពេទ្យឲ្យមានជំនាញ និង ចំណេះដឹងត្រឹមត្រូវស្របតាមស្ដង់ដាររបស់អង្គការសុខភាពពិភពលោក ក្នុងការពិនិត្យ ព្យាបាលអ្នក ជំងឺ ព្រមទាំងពង្រឹងផ្នែកសុខភាពអនាម័យកុមារ និងទារក ជាពិសេសកាត់បន្ថយការឆ្លងជំងឺរបស់ អ្នកជំងឺមកគ្រូពេទ្យផងដែរ។
លោកវេជ្ជបណ្ឌិតបានបន្ដថា រហូតមកដល់ពេលនេះ មន្ទីរពេទ្យកៅហ្ស៊ុង បានជួយបណ្ដុះបណ្ដាលធនធានមនុស្ស ផ្ដល់ជំនួយបច្ចេកទេស សម្ភារបរិក្ខារពេទ្យ ដល់មន្ទីរពេទ្យ បង្អែកបាទី និងលើកកម្ពស់សមត្ថភាពគ្រូពេទ្យ ដើម្បីធ្វើយ៉ាងណាឲ្យគ្រូពេទ្យមានចំណេះ ជំនាញគ្រប់ គ្រាន់ក្នុងការពិនិត្យ ព្យាបាល និងផ្ដល់សេវាជូនប្រជាពលរដ្ឋប្រកបដោយស្ដង់ដារត្រឹមត្រូវ។
លោកវេជ្ជបណ្ឌិត សៅ ចាន់ថា នាយកមន្ទីរពេទ្យបង្អែកបាទី បានមានប្រសាសន៍ថា ការបណ្ដុះបណ្ដាលនេះ នឹងជួយឲ្យគ្រូពេទ្យទទួលបាននូវចំណេះដឹង និងជំនាញបន្ថែមក្នុងការចូលរួមជួយ សង្គ្រោះអាយុជីវិតអ្នកជំងឺ ការថែទាំ និងព្យាបាលអ្នកជំងឺ។
លោកវេជ្ជបណ្ឌិត សៅ ចាន់ថា បានបន្តថា «ប្រសិន បើគ្រូពេទ្យមិនបានដឹងអំពីវិធីសាស្ដ្រក្នុងការលាងដៃឲ្យបានត្រឹមត្រូវទេ ក្នុងនាមជាអ្នកផ្ដល់សេវាថែទាំ អ្នកជំងឺ នឹងនាំយកនូវមេរោគផ្សេងៗជូនដល់អ្នកជំងឺវិញ»។
លោកវេជ្ជបណ្ឌិតបានបន្ដទៀតថា ក្រោយពីការ ឆ្លងកាត់ការបណ្ដុះបណ្ដាល ជំនាញក្នុងការថែរក្សាអនាម័យ និងវិធីសាស្ដ្រក្នុងការលាងដៃនេះរួចមក គ្រូពេទ្យនឹងកាន់តែយល់ដឹងកាន់តែច្បាស់ និងយកទៅអនុវត្ដន៍ឲ្យបានគ្រប់ពេលវេលា ខណៈពេល ដែលពិនិត្យ និងផ្ដល់សេវាជូនដល់អ្នកជំងឺស្របតាមក្បួនច្បាប់វិជ្ជសាស្ដ្រ។
សូមបញ្ជាក់ថា កាលពីឆ្នាំ២០១៦កន្លងមក មន្ទីរពេទ្យកៅហ្ស៊ុងបានចុះអនុស្សរណៈជាមួយ មន្ទីរពេទ្យបង្អែកបាទី និងមន្ទីរសុខាភិបាលខេត្ដតាកែវ ដើម្បីបណ្ដុះបណ្ដាលជំនាញបច្ចេកទេសជូន ដល់គ្រូពេទ្យលើគម្រោងសុខភាពអនាម័យអន្ដរជាតិ ការផ្ដល់សម្ភារ បរិក្ខារពេទ្យ និងការនាំយកគ្រូ ពេទ្យពីកម្ពុជា ទៅបណ្ដុះបណ្ដាលនៅក្នុងកោះតៃវ៉ាន់ក្នុងមួយឆ្នាំចំនួន២នាក់ផងដែរ៕
Source: Kampuchea Thmey Daily
0 Comments