ភ្នំពេញ ៖ វិទ្យុជាតិថៃគ្រោងផ្សាយកម្មវិធីភាសាខ្មែរឡើងវិញ ដើម្បីជាប្រយោជន៍ដល់បងប្អូនប្រជាជនកម្ពុជាដែលកំពុងស្នាក់នៅ និង បម្រើការងារនៅក្នុងប្រទេសថៃកាន់តែច្រើនឡើង។
ក្នុងជំនួបរវាងប្រតិភូវិទ្យុជាតិកម្ពុជា និងវិទ្យុជាតិថៃ នៅឯប្រទេសថៃ លោកស្រីសូមន្តផាន កូសុនសិរីសិទ្ធ ប្រធានផលិតកម្មវិធីនៃវិទ្យុជាតិថៃ បានឲ្យដឹងថា វិទ្យុជាតិថៃនឹងខិតខំស្នើកញ្ចប់ថវិកាពីរាជរដ្ឋាភិបាលរបស់ខ្លួន ដើម្បីបើកដំណើរការផ្សាយកម្មវិធីភាសាខ្មែរឡើងវិញបន្ទាប់ពីបានបិទមួយរយៈ។
លោកស្រីបញ្ជាក់ថា គម្រោងបង្កើតកម្មវិធីផ្សាយភាសាខ្មែរឡើងវិញនៅក្នុងវិទ្យុជាតិថៃនេះ បានធ្វើឡើងក្រោយពេលចំនួនប្រជាជនកម្ពុជាបាននឹងកំពុងស្នាក់នៅនិងបម្រើការនៅក្នុងប្រទេសថៃកាន់តែមានការកើនឡើងពោលគឺរហូតដល់ជាង១លាននាក់។ លោកស្រីបន្ថែមថា កម្មវិធីនេះអាចធ្វើឡើងក្នុងរយៈពេល១៥នាទី ដែលផ្សព្វផ្សាយព័ត៌មានពាក់ព័ន្ធទៅនឹងបញ្ហាច្បាប់ថ្មីៗរបស់អាជ្ញាធរថៃនឹងព័ត៌មានផ្សេងៗទៀត ដើម្បីជាប្រយោជន៍ដល់មន្ត្រីការទូត អ្នកទេសចរ អ្នកជំនួញ និងពលករកម្ពុជាបានដឹងជ្រួតជ្រាប។ ទាំងនេះគឺជាកត្តាចម្បងដែលធានាបានសុវត្ថិភាព និងភាពស្របច្បាប់។
សូមបញ្ជាក់ថា កាលពីកន្លងទៅនេះវិទ្យុជាតិថៃមានផ្សាយភាសាបរទេសចំនួន១២ភាសាក្នុងមួយថ្ងៃ ប៉ុន្តែមកដល់ពេលនេះដោយសារកង្វះថវិកាត្រូវបានកាត់បន្ថយនៅសល់ត្រឹមតែ៦ភាសាប៉ុណ្ណោះក្នុងមួយថ្ងៃ។ ទោះជាបែបនេះក្តី មន្ត្រីវិទ្យុជាតិថៃបានសន្យានឹងខិតខំបើកកម្មវិធីភាសាខ្មែរឡើងវិញនឹងធ្វើការស្នើកញ្ចប់ថវិកាជាតិនាខែតុលាខាងមុខនេះ៕
Source: Kampuchea Thmey Daily
0 Comments