ជនជាតិ​ចិន​ចំនួន​៧​នាក់ ដែល​ផ្សព្វផ្សាយ​សេវាកម្ម​ផ្លូវភេទ ត្រូវបាន​សមត្ថកិច្ច​ខេត្ត​ព្រះសីហនុ​ចាប់ខ្លួន​ហើយ

ព្រះសីហនុ​ ៖ ដោយ​អនុវត្តន៍​តាម​ការណែនាំ និង​បទបញ្ជា​របស់​ស្នងការ​នគរបាល ខេត្ត​ព្រះសីហនុ ដើម្បី​ឃ្លាំមើល និង​បង្ក្រាប​ឲ្យ​បាន​ជនជាតិ​ចិន ដែល​ប្រកប​របរ​ខុសច្បាប់​នៅ​កម្ពុជា ដូច​ជាមាន​ការ​ដើរ​ផ្សព្វផ្សាយ​ចែក​ខិតប័ណ្ណ​ម៉ាស្សា មាន​រូបភាព​ទាក់ទាញ បង្កប់​សេវាកម្ម​ផ្លូវភេទ បែប​ពេស្យាចារ​នោះ អ្នកដើរ​ចែក​ខិត​ប័ណ្ណ​ម៉ាស្សា​ចំនួន​៧​នាក់ ត្រូវ​បាន​សមត្ថកិច្ច​នគ​របាល​ខេត្ត​ព្រះសីហនុ ​សហការ​គ្នា ស្រាវជ្រាវ​ឆ្មក់​ចាប់បាន កាលពី​យប់​ថ្ងៃទី​១២ ខែសីហា ឆ្នាំ​២០១៨ និង​ដកហូត​បាន​ខិតប័ណ្ណ​ជាច្រើន​សន្លឹក​ផងដែរ។

ការ​ចាប់​ខ្លួន​បុរស​ជនជាតិ​ចិន​ទាំង​៧​នាក់ ត្រូវ​បាន​ធ្វើឡើង​ក្រោម​បញ្ជា​របស់លោក ជួន ណា​រិន្ទ បន្ទាប់ពី​មានការ​ចែកចាយ​ជាច្រើន​ក្នុង​បណ្ដាញ​សង្គម​ហ្វេ​ស​ប៊ុ​ក កាលពី​សប្ដាហ៍​មុន ពី​រឿង​ដើរ​ចែក​ខិត្តប័ណ្ណ នៅ​ខេត្ត​ព្រះសីហនុ​។ ជនជាតិ​ចិន​ទាំង​៧នាក់​នោះ រួមមាន​ឈ្មោះ ១- LI YU HANG ភេទ​ប្រុស អាយុ ២២ ឆ្នាំ ,២- LI ZI MING ភេទ​ប្រុស អាយុ ៣៤ ឆ្នាំ ,៣-FAN CHAOJUN ភេទ​ប្រុស អាយុ​២៧ ឆ្នាំ​, ៤- LU JIAN ភេទ​ប្រុស អាយុ ២៩ ឆ្នាំ ,៥- LI ZHU ZHI ភេទ​ប្រុស អាយុ ៣៦ ឆ្នាំ ,៦- WEN XIAO HU ភេទ​ប្រុស អាយុ​៣៤ ឆ្នាំ​។ ដោយឡែក ទី​៧- ឈ្មោះ FU PENG PENG ភេទ​ប្រុស អាយុ​៣០​ឆ្នាំ ត្រូវ​បាន​ឃាត់ខ្លួន​នៅ​ចំណុច​ខាងក្រោយ​កាស៊ីណូ ប៉ាវ​ម៉ា​យ ក្រុម​១៧ ភូមិ​៤ សង្កាត់​៤ ក្រុងព្រះសីហនុ ដោយ​បាន​បិទ​រូបភាព​អាសអាភាស នៅ​កញ្ចក់​ក្រោយ​រថយន្ត​។



លោក​ឧ​ត្ត​ម​សេនីយ៍​ទោ ជួន ណា​រិន្ទ ស្នងការ​នគរបាល​ខេត្ត បាន​ឲ្យ​ដឹង​ថា ពេល​ដែល​ហៅ​អ្នកជំនាញ មក​ធ្វើការ​បកប្រែ​ភាសា​ចិន ក្នុង​ខិ​ត្ត​ប័ណ្ណ​ទាំងនោះ មានន័យ​ត្រឹមតែ​សេវាកម្ម​ម៉ាស្សា​ប៉ុណ្ណោះ ប៉ុន្តែ​រូបភាព វា​បង្កប់​ទៅជា​ការ​ផ្សព្វផ្សាយ​អាជីវកម្ម​ផ្លូវភេទ ឬ​ពេស្យាចារ ដែល​ជា​អំពើ​ខុសច្បាប់​នៅ​ប្រទេស​កម្ពុជា​។ លោក​ឧ​ត្ត​ម​សេនីយ៍​ស្នងការ​បាន​បញ្ជាក់​ថា បុរស​ជនជាតិ​ចិន​ទាំង​៧នាក់​នោះ យើង​បាន​ធ្វើ​ការអប់រំ ឲ្យ​ធ្វើ​កិច្ចសន្យា​បញ្ឈប់​សកម្មភាព​ផ្សព្វផ្សាយ​នេះ​ទាំងស្រុង ពីព្រោះ​វា​ជា​អំពើ​ខុសច្បាប់​នៅ​កម្ពុជា​។

សូម​បញ្ជាក់​ថា ថ្មីៗ​នេះ ខិត​ប័ណ្ណ​រូប​ស្ត្រី​ចិន​ស្រស់​ស្អាត​ស្រាត​ននល​គោក និង​មាន​សរសេរ​អក្សរ​ចិន​អម​ជាមួយ រួម​ទាំង​ដាក់​លេខ​ទូរស័ព្ទ​សម្រាប់​ទំនាក់ទំនង ត្រូវ​បាន​ចែកចាយ​ពេញ​ខេត្ត​ព្រះសីហនុ ដែល​ជា​ខេត្ត​មួយ​ដែល​ជា​សំបូរ​ដោយ​ភ្ញៀវទេសចរ​ចិន​។ ខិត្តប័ណ្ណ​នេះ គឺ​មាន​ក្រុម​ស្រីៗ​ដើរ​ចែក​នៅ​តាម​បន្ទប់​ភ្ញៀវ ដែល​ស្នាក់នៅ​សណ្ឋាគារ និង​នៅ​តាម​ទីសាធារណៈ​មួយចំនួន​នៅក្នុង​ខេត្ត​ព្រះសីហនុ​៕

Source: Kampuchea Thmey Daily