ពានរង្វាន់បាល់ទាត់លីគហ្វូតសាលឆ្នាំ២០១៨ (National Futsal League 2018) ដែលរៀបចំដោយសហព័ន្ធកីឡាបាល់ទាត់កម្ពុជា បានស្វែងរកឃើញក្រុមឡើងទៅវគ្គផ្តាច់ព្រ័ត្រហើយក្រោយបញ្ចប់ការប្រកួតវគ្គពាក់កណ្ដាលផ្តាច់ព្រ័ត្រនៅល្ងាចថ្ងៃសៅរ៍ ទី១១ ខែសីហា ឆ្នាំ២០១៨ថ្មីៗនេះលើទីលាន ដឹប្លូស្ព័ត (The Blue Sport) ម្តុំទួលគោក ខណៈក្រុមស.ស.យ.ក កំចាយមារ និងក្រុម Down Town Sport FC សុទ្ធតែឈ្នះដូចគ្នា។
សូមរំលឹកថា លីគហ្វូតសាលមានក្រុមចូលរួមចំនួន១០ក្រុមហើយក្រុមដែលមានចំណាត់ថ្នាក់ល្អជាងគេចំនួន៤ក្រុមក្រោយប្រកួតវិលជុំចំនួន១៨សប្ដាហ៍ ត្រូវប៉ះគ្នានៅវគ្គពាក់កណ្ដាលផ្តាច់ព្រ័ត្រ ហើយក្រុម ឈ្នះត្រូវប៉ះគ្នានៅវគ្គផ្តាច់ព្រ័ត្រថែមទៀត។ សរុបលទ្ធផលនៅវគ្គខ្វែងកន្លងទៅនេះឃើញថាក្រុមស.ស.យ.ក កំចាយមារ ឈ្នះក្រុម Home Sport FC ១៣ទល់៤ ហើយក្រុម Down Town Sport FC ឈ្នះក្រុមឱម៉ាល់ ៦ទល់១។
ក្រុមចាញ់ត្រូវប៉ះគ្នាក្នុងវគ្គចំណាត់ថ្នាក់លេខ៣និងក្រុមឈ្នះបន្តប៉ះគ្នាក្នុងវគ្គផ្តាច់ព្រ័ត្រដែរធ្វើឡើងនៅថ្ងៃទី១៨ខែសីហា ឆ្នាំ២០១៨ ខាងមុខ។ ដូច្នេះក្រុម Home Sport ប៉ះក្រុម ឱម៉ាល់ នៅម៉ោង៤ល្ងាចនិងក្រុមស.ស.យ.ក កំចាយមារ ប៉ះក្រុមDown Town Sport។ ក្រុមជើងឯកនឹងទទួលបានពានរង្វាន់១ មេដាយមាសម្នាក់១និងប្រាក់រង្វាន់២០លានរៀលផងដែរ។
សូមរំលឹកថា ការប្រកួតលីគហ្វូតសាលជាលើកដំបូងនៅក្នុងស្រុកនេះធ្វើឡើងពីថ្ងៃទី០៣ ខែ មិនា រហូតដល់ថ្ងៃទី២៨ ខែ កក្កដា ឆ្នាំ ២០១៨ ខណៈភាគច្រើនប្រកួតនៅថ្ងៃចុងសប្ដាហ៍ ដែលមានក្រុមជាសមាជិកចំនួន១០ក្រុមលើទីលាន ដឹប្លូស្ព័ត (The Blue Sport) ម្តុំទួលគោក។ ការប្រកួតមានរូបមន្តជាលក្ខណៈប្រកួតបែបលីគ តាមប្រព័ន្ធលីគ២ជុំ (វិលជុំសន្សំពិន្ទុ) ហើយក្រុមដែលមានពិន្ទុច្រើនជាងគេចំនួន៤ក្រុម (Top4) ត្រូវឡើងទៅប្រកួតគ្នាដណ្តើមជើងឯកប្រចាំរដូវកាល៕
Source: Kampuchea Thmey Daily
0 Comments