ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា គណបក្សណាទទួលបានជ័យជំនះ គណបក្សនោះ កាន់អំណាចស្របតាមការប្រគល់សិទ្ធិពីប្រជាពលរដ្ឋជាម្ចាស់ឆ្នោត ហេតុនេះ គ្មានទេរបស់ដែលហៅថាការបែងចែកអំណាចនោះ ហើយការទាមទារបែងចែកអំណាច ប្រៀបបាននឹងលេងបៀ ចាញ់ ហើយស្នើយកលុយចាញ់មកបែងចែកគ្នាឡើងវិញ។
លោក សុខ ឥសាន លើកឡើងបែបនេះ តាមបណ្តាញអេឡិកត្រូនិកតេឡេក្រាម កាលពីថ្ងៃអាទិត្យ ទី០៥ ខែសីហា ឆ្នាំ២០១៨។ លោកលើកឡើងយ៉ាងនេះថា “នៅពេលដែលទប់ស្កាត់ការបោះឆ្នោតមិនបាន ហើយការបោះឆ្នោតបានប្រព្រឹត្តទៅដោយរលូន និងប្រកបដោយមហាជោគជ័យមក មានក្រុមជនមួយចំនួនបានលើកមតិ បែបឆ្កួតលីលាថា គួរតែមានការបែងចែកអំណាចគ្នាទៅ ដើម្បីកុំឲ្យគេថា សភាឯកបក្ស, មានការបែកបាក់ជាតិ”។
លោក សុខ ឥសាន បញ្ជាក់ទៀតថា បើចង់ឲ្យមានការបែងចែកអំណាច ទី១, តើចាំបាច់រៀបចំការបោះឆ្នោតធ្វើអី ? ទី២, តើយកច្បាប់ទៅទុកនៅឯណា ? ទី៣, តើយកឆន្ទៈម្ចាស់ឆ្នោតទៅទុកនៅឯណា ? ទី៤, តើយកមុខម្ចាស់ឆ្នោតទៅទុកនៅឯណា បើអ្នកចង់បានអំណាចយកទៅបែងចែកគ្នាអស់ហើយ ? ទី៥, តើអ្វីទៅអត្ថន័យ និងខ្លឹមសារនៃលទ្ធិប្រជាធិបតេយ្យសេរីពហុបក្សនោះ ? ដូច្នេះ មានតែការបោះឆ្នោតទេ ដែលផ្តល់តម្លៃដល់លទ្ធិប្រជាធិបតេយ្យសេរីពហុបក្សនោះ។
តាមលោក សុខ ឥសាន គណបក្សណាបានទទួលជ័យជំនះ គណបក្សនោះកាន់អំណាចស្របតាមការប្រគល់សិទ្ឋិពីប្រជាពលរដ្ឋជាម្ចាស់ឆ្នោត។ ហេតុនេះ គ្មានទេ របស់ដែលហៅថា ការបែងចែកអំណាចនោះ។ ការទាមទារបែងចែកអំណាចនេះ ប្រៀបបាននឹងលេងបៀរចាញ់អស់ហើយ ស្នើយកលុយចាញ់មកបែងចែកគ្នាឡើងវិញ។
អ្នកនាំពាក្យគណបក្សប្រជាជនកម្ពុជាបានលើកឡើងទៀតថា លទ្ធផលនៃការបោះឆ្នោត បានផ្តល់ការគាំទ្រចំពោះគណបក្សប្រជាជនកម្ពុជា។ ដូច្នេះលទ្ធផលនៃការបោះឆ្នោត គឺជាសិទ្ធិសម្រេចផ្តាច់មុខរបស់ប្រជាជនកម្ពុជា ដែលជាម្ចាស់ប្រជាធិបតេយ្យនៅកម្ពុជា គ្មានជនណាអាចបំពាន ឬមិនទទួលបានទេ។ ពីព្រោះ នេះជាលទ្ធផលចេញពីការបោះឆ្នោតបែបប្រជាធិបតេយ្យសេរីពហុបក្ស ។ លទ្ធផលនេះ ក៏ជាប្រជាធិបតេយ្យសេរីពហុបក្សដដែល ទោះបីមានបក្សតែមួយដឹកនាំ។ លោកបន្តថា ទោះបីនៅក្នុងនីតិកាលទី៦ នៃរដ្ឋសភា ដឹកនាំផ្តាច់មុខដោយគណបក្សប្រជាជនកម្ពុជា ក៏នៅតែស្ថិតនៅក្នុងក្របខ័ណ្ឌនៃរបបប្រជាធិបតេយ្យសេរីពហុបក្សដដែល នៅតែស្ថិតនៅក្រោមដំបូលរដ្ឋធម្មនុញ្ញប្រជាធិបតេយ្យសេរីពហុបក្ស។
លោក សុខ ឥសាន បញ្ជាក់ដែរថា នេះជាលក្ខណៈពិសេសនៅតែក្នុងនីតិកាលទី៦ប៉ុណ្ណោះ នៅនីតិកាលក្រោយៗទៀត គណបក្សនយោបាយនានា នៅតែអាចចូលរួមប្រកួតប្រជែងដណ្តើមខ្សែក្រវាត់ពីគណបក្សប្រជាជនកម្ពុជា បានតាមគោលការណ៍ប្រជាធិបតេយ្យ។ លោកបន្តថា កាលពីនីតិកាលទី៥ ក៏គណបក្សប្រជាជនកម្ពុជា បំពេញតួនាទីភារកិច្ចតែម្នាក់ឯងដែរ ដោយសារតែអតីតបក្សប្រឆាំងមកបើកតែប្រាក់ខែទេ តែមិនបានចូលធ្វើការ គឺពហិការរហូត។ ដូច្នេះ រដ្ឋសភានីតិកាលទី៥ មានលក្ខណៈឯកបក្សដែរ។ លោកសង្ឃឹមថា រដ្ឋសភានីតិកាលទី៦ កាន់តែមានលទ្ធភាពបំពេញភារកិច្ចងាយស្រួលជាង ពេលមានបក្សប្រឆាំងនៅរារាំងជាឧបសគ្គផង។
ដូច្នេះ អស់លោកចាញ់ គួរកុំថ្នាំងថ្នាក់នឹងការសម្រេចចិត្តរបស់ប្រជាជនកម្ពុជា ដែលជាម្ចាស់ប្រទេស ម្ចាស់លទ្ធិប្រជាធិបតេយ្យកម្ពុជា គួរទទួលយកទៅ។ ជោគជ័យដ៏ធំធេងរបស់គណបក្សប្រជាជនកម្ពុជា គឺឆ្លុះបញ្ចាំងពីបរាជ័យរបស់បណ្តាគណបក្សប្រកួតប្រជែង ហើយមិនអាចប្រកែកបានទេ មានតែដកខ្លួនទៅរៀនយុទ្ធសីល្បថ្មី យកមកប្រកួតទៀត មិនទាន់ហួសពេលទេ។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួម ហើយជាលទ្ធផល មានប្រជាពលរដ្ឋកម្ពុជាបានអញ្ជើញទៅបោះឆ្នោតចំនួន៦.៩៤៦.១៦៤នាក់ ដែលស្មើនឹង៨២,៨៩ ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប៨.៣៨០.២១៧នាក់ ហើយតាមរបាយការណ៏គណបក្សបានបង្ហាញថា គណបក្សប្រជាជនកម្ពុជាទទួលបានអាសនៈទាំងអស់នៅក្នុងសភា មិនមានគណបក្សណាអាចទទួលបានអាសនៈនោះទេ៕
Source: Kampuchea Thmey Daily
0 Comments