ទ្វីបអឺរ៉ុប​រងគ្រោះ​ដោយ​រលក​កម្ដៅ​ ខណៈ​ភ្លើង​ឆេះ​ព្រៃ​វាយប្រហារ​ប្រទេស ព័រ​ទុយ​ហ្គា​ល់​

ទ្វីបអឺរ៉ុប​ត្រូវបាន​វាយប្រហារ​ដោយ​រលក​កម្ដៅ​ដ៏​ខ្លាំង​កាលពី​ថ្ងៃអាទិត្យ​ដោយ​សីតុណ្ហភាព​ឡើង​ខ្ពស់​បាន​បង្ក​ឲ្យ​មាន​ភ្លើង​ឆេះ​ព្រៃ បិទ​រោងចក្រ​នុយក្លេអ៊ែរ​ហើយ​ថែមទាំង​គំរាមកំហែង​ដល់​ការផ្គត់ផ្គង់​ដំឡូង​បំពង​របស់​ប្រទេស​ហូ​ឡង់​ផងដែរ​ថ្វីបើ​ប្រទេស​មួយចំនួន​បាន​រងគ្រោះ​តិចតួច​ក៏ដោយ​។​

- អេ​ស្ប៉ា​ញ​: អគ្គិភ័យ​ស្ថិតនៅក្រោម​ការគ្រប់គ្រង
​សេវា​ពន្លត់​អគ្គិភ័យ​ក្នុង​តំបន់​បាន​និយាយថា សីតុណ្ហភាព​ខ្ពស់បំផុត​៤២​អង្សា​សេ​ត្រូវបាន​គេ​ព្យាករណ៍​នៅ​តំបន់​ភាគ​និរតី Extremadura កាលពី​ថ្ងៃអាទិត្យ​ដែល​នៅ​ទីនោះ ភ្លើង​ឆេះ​ព្រៃ​មួយ​ក្នុង​ទីប្រជុំជន San Vicente de Alcantara បាន​ស្ថិតក្រោម​គ្រប់គ្រង​របស់​ក្រុម​ពន្លត់​អគ្គិភ័យ​។​
​
ភ្នាក់ងារ​ឧតុនិយម​អេ​ស្ប៉ា​ញ​បាន​រាយការណ៍​ថា សីតុណ្ហភាព​បាន​ឈានដល់​៤៤​អង្សា​សេ​នៅ​ភាគខាងត្បូង​ប្រទេស​កាលពី​ថ្ងៃ​សៅរ៍​។​
​ការកើនឡើង​នៃ​សីតុណ្ហភាព​នេះ​បាន​ឆក់យក​ជីវិត​មនុស្ស​ចំនួន​៣​នាក់​រួចទៅហើយ​ក្នុង​សប្ដាហ៍​នេះ​។​

- ព័រ​ទុយ​ហ្គា​ល់​: សីតុណ្ហភាព​៤៥​អង្សា​សេ​ត្រូវបាន​គេ​ព្យាករណ៍​
​សីតុណ្ហភាព​ត្រូវបាន​គេ​រំពឹងថា​នឹង​ឡើងដល់​៤៥​អង្សា​សេ​នៅក្នុង​ផ្នែក​មួយចំនួន​នៃ​ប្រទេស​ព័រ​ទុយ​ហ្គា​ល់​នៅ​ថ្ងៃអាទិត្យ​ប៉ុន្តែ​នឹងមិន​ឡើង​លើស​៤៦.៨​អង្សា​សេ​ដែល​ត្រូវបាន​គេ​កត់ត្រា​កាលពី​ថ្ងៃមុន​នៅក្នុង​ទីក្រុង Alvega ភាគ​ខាងជើង​ទីក្រុង Lisbon ទេ​។​
​
កំណត់ត្រា​នៅតាម​ទីក្រុង​ជាច្រើន​ត្រូវបាន​បំបែក​កាលពី​ថ្ងៃ​សៅរ៍​ប៉ុន្តែ​គ្មាន​កន្លែង​ណា​អាច​បំបែក​កំណត់ត្រា​សីតុណ្ហភាព​៤៧.៣​អង្សា​សេ​នៅ​ភូមិ Amareleja កាលពី​ឆ្នាំ​២០០៣​ទេ​។​
​ទោះបីជា​យ៉ាងណាក៏ដោយ ភ្លើង​ឆេះ​ព្រៃ​នៅតែ​បន្ត​កើតមាន​ក្នុង​តំបន់ Monchique ភាគខាងត្បូង​ប្រទេស​កាលពី​ថ្ងៃអាទិត្យ​។​
​
ភ្លើង​ឆេះ​ព្រៃ​មួយទៀត​នៅក្នុង​តំបន់ Estremoz បាន​បណ្តាល​ឲ្យ​មនុស្ស​៦​នាក់​រងរបួស​ដោយ​ក្នុងនោះ​មាន​២​នាក់​ស្ថិតក្នុង​ស្ថានភាព​ធ្ងន់ធ្ងរ​។​

- បារាំង​: ការព្រមាន​មិន​ប្រុងប្រយ័ត្ន
​នៅ​ប្រទេស​បារាំង នាយកដ្ឋាន​៦៧​ក្នុងចំណោម​១០១​ត្រូវបាន​ព្រមាន​អំពី​រលក​កំដៅ​ខណៈ​សីតុណ្ហភាព​នៅ​ភាគខាងត្បូង​ប្រទេស​ត្រូវបាន​គេ​រំពឹងថា​នឹង​ឡើងដល់​កំពូល​ជិត​៤០​អង្សា​សេ​។​
​
ថ្ងៃ​សៅរ៍​គឺជា​ថ្ងៃ​ក្តៅ​បំផុត​នៅក្នុង​ប្រទេស​ចាប់តាំងពី​រលក​កំដៅ​ដ៏​ខ្លាំងក្លា​ក្នុង​ឆ្នាំ​២០០៣​មក​ដែល​កាលនោះ មាន​មនុស្ស​រាប់ពាន់នាក់​បាន​ស្លាប់​ដោយ​ភាគច្រើន​នៃ​ពួកគេ​គឺជា​មនុស្ស​ចាស់​ដែល​រស់នៅ​ដោយ​ខ្លួនឯង​។​
​
សេវា​សង្គ្រោះបន្ទាន់​បាន​ត្អូញត្អែរថា បើទោះបីជា​ការព្រមាន​អំពី​សុខ​ភាពជា​សាធារណៈ​ឲ្យ​រក្សា​ភាព​ត្រជាក់​និង​មាន​ជាតិ​ទឹក​ក៏ដោយ​ប៉ុន្តែ​តែមាន​ការប្រុងប្រយ័ត្ន​ច្រើនណាស់​ដោយ​លើកឡើង​ពី​ឧទាហរណ៍​នៃ​បុរស​វ័យ​ចំណាស់​ម្នាក់​នៅក្នុង​ទីក្រុង លី​យ៉ុង ដែលមាន​បញ្ហា​បេះដូង​ខណៈពេល​កំពុង​កាត់​ស្មៅ​នៅក្រោម​ពន្លឺ​ថ្ងៃរសៀល​ដ៏​ក្តៅ​។​
​
ចង្ក្រាន​រ៉េ​អា​ក់ទ័រ​នុយក្លេអ៊ែរ​ចំនួន​បួន​នៅតែ​បិទ​កាលពី​ថ្ងៃអាទិត្យ​ដោយសារ​សីតុណ្ហភាព​ក្តៅ​។

- អ៊ីតាលី​: ព្យុះកំបុតត្បូង​ត្រូវគេ​ប្រទះឃើញ
​ព្យុះភ្លៀង​ជាច្រើន​បាន​ជន់​លិច​នៅតាម​ដង​វិថី​ក្នុង​ទីក្រុង Sicily និង Sardinia នៅ​ភាគខាងត្បូង​នៃ​ប្រទេស​អ៊ីតាលី​កាលពី​ថ្ងៃអាទិត្យ​ដោយ​ធ្វើ​ឲ្យ​ថមថយ​រលក​កំដៅ​ដែល​បាន​បណ្តាល​ឲ្យ​មាន​បញ្ហា​ចរាចរណ៍​កាលពី​ចុង​សប្តាហ៍​។​
​
អ្នកទេសចរ​នៅ​កោះ Pantelleria ក្បែរ​ប្រទេស​ទុយ​នេ​ស៊ី​បាន​និយាយថា ពួកគេ​បាន​ប្រទះឃើញ​ព្យុះកំបុតត្បូង​មួយ​នៅ​ឆ្នេរសមុទ្រ​កាលពី​ថ្ងៃ​សៅរ៍​។​
​
ប្រព័ន្ធ​ផ្សព្វ​ផ្សាយបាន​រាយការណ៍​កាលពី​ថ្ងៃ​សៅរ៍​ថា ស្ត្រី​ម្នាក់​បាន​ស្លាប់​ដោយសារ​រលក​កំដៅ​នៅលើ​ឆ្នេរ​មួយ​ក្នុង​តំបន់ Liguria​។​

- អាល្លឺម៉ង់​: ភ្លៀង​ធ្លា​ក់បាន​នាំមក​នូវ​ភាព​ធូរស្រាល
​ភ្លៀងរលឹម​ដាច់​ដោ​យក​ន្លែ​ង​និង​ព្យុះភ្លៀង​បាន​នាំមក​នូវ​ការ​ធូរស្បើយ​ខ្លះៗ​ពី​កំដៅ​នៅ​ផ្នែក​មួយចំនួន​នៃ​ប្រទេស​អាល្លឺម៉ង់​កាលពី​ចុង​សប្ដាហ៍​ជាពិសេស​នៅ​ភាគខាងត្បូង​។
​
ទោះបីជា​យ៉ាងណាក៏ដោយ សីតុណ្ហភាព​ត្រូវបាន​គេ​រំពឹងថា​នឹង​កើនឡើង​ម្តងទៀត​រហូតដល់ ៣៩​អង្សា​សេ​នៅ​ភាគ​ខាងកើត​នៅ​ថ្ងៃ​ពុធ​។​

- អង់គ្លេស​: ក្តៅ​រហូតដល់​ថ្ងៃ​អង្គារ
​កម្ដៅ​នៅ​ចក្រភព​អង់គ្លេស​ក៏បាន​ធ្លាក់ចុះ​បន្តិច​ផងដែរ​កាលពី​ថ្ងៃអាទិត្យ​ខណៈដែល​កម្រិត​ខ្ពស់ជាង​៣០​អង្សា​ត្រូវបាន​គេ​រំពឹងថា​នឹង​វាយប្រហារ​ភាគខាងត្បូង​នៃ​ប្រទេស​អង់គ្លេស​។ នេះ​បើ​យោងតាម​ការិយាល័យ Met ដែល​ព្យាករណ៍​ថា រលក​កំដៅ​នឹង​បន្ត​រហូតដល់​ថ្ងៃ​អង្គារ​។​
​
សេវា​សុខភាព​សាធារណៈ​អង់គ្លេស​បាន​ប្រាប់​អ្នក​ដែល​នៅ​ភាគ​អាគ្នេយ៍​ឲ្យ​ស្នាក់​នៅក្នុង​ម្លប់​និង​ផឹកទឹក​ឲ្យ​បាន​ច្រើន​។​

- ហូ​ឡង់​: ខ្វះខាត​ដំឡូង​បំពង​?
​ខណៈពេលដែល​សីតុណ្ហភាព​បាន​ធ្លាក់ចុះ​ដល់​២៥​អង្សា​សេ​នៅ​ប្រទេស​ហូ​ឡង់​កាលពី​ថ្ងៃអាទិត្យ​នោះ គ្រោះរាំងស្ងួត​របស់​ប្រទេស​នេះ​នៅតែ​បន្ត​បំផ្លិចបំផ្លាញ​ដំណាំ​។​
​
កសិករ​បានធ្វើការ​ទាំ​ង​ថ្ងៃ​ទាំងយប់​ដើម្បី​សង្គ្រោះ​អ្វីដែល​ពួកគេ​អាចធ្វើ​បាន​ខណៈ​ទិន្នផល​ដំឡូង​និង​ពោត​ត្រូវ​រង​ការវាយប្រហារ​យ៉ាងខ្លាំង​។​
​
អ្នក​ផលិត​បាន​ព្រមាន​ថា ការខ្វះខាត​ដំឡូង​អាច​ប៉ះពាល់​ដល់​ការផ្គត់ផ្គង់​ដំឡូង​បំពង​ដែលជា​ការពេញនិយមរ​បស់​ជនជាតិ​ហូ​ឡង់​៕ AFP

​

Source: Kampuchea Thmey Daily