ភ្នំពេញ ៖ មន្ត្រីយោធាម្នាក់ ត្រូវបានសមត្ថកិច្ចនគរបាលខណ្ឌសែនសុខ ឃាត់ខ្លួន ពីបទប្រើប្រាស់អាវុធខ្លីភ្ជង់គំរាម និង វាយដំលើបុរសម្នាក់លក់ប្រហិតចៀនចល័តតាមផ្លូវ ដោយរ៉ឺម៉កម៉ូតូ ដែលទំនាស់នេះផ្តើមចេញពីករណីគ្រោះថ្នាក់ចរាចរណ៍។
ហេតុការណ៍នេះ បានកើតឡើងកាលពីយប់ថ្ងៃទី០២ ខែសីហា ឆ្នាំ២០១៨ នៅភូមិរោងចក្រ ម្តុំក្បែរវត្តសំរោងអណ្តែត ស្ថិតក្នុងសង្កាត់គោកឃ្លាង ខណ្ឌសែនសុខ។
មន្ត្រីយោធាម្នាក់ ដែលត្រូវបានឃាត់ខ្លួនខាងលើឈ្មោះ នួន ប៉ូ ភេទប្រុសអាយុ៤៩ឆ្នាំ មុខរបរមន្ត្រីយោធា ទីលំនៅម្តុំសង្កាត់ផ្សារដេប៉ូ៣ ខណ្ឌទួលគោក(ភ្នំពេញ)។
មន្ត្រីប៉ូលិស បានឲ្យដឹងថា មុនពេលកើតហេតុ ភាគីជនរងគ្រោះ ឈ្មោះ យ៉ែម វណ្ណៈ ភេទប្រុស អាយុ២៧ឆ្នាំ កំពុងលក់ប្រហិតចៀនចល័តតាមរ៉ឺម៉ក នៅម្តុំក្បែរ វត្តសំរោងអណ្តែត។ ក្រោយមកក៏ស្រាប់តែមានរថយន្តបាឡែនមួយគ្រឿងពាក់ស្លាកលេខ ភ្នំពេញ2AB-4119 បើកបរដោយឈ្មោះ សៅ ចាន់ធី ភេទប្រុស អាយុ៤៦ឆ្នាំ មុខរបរគ្រូបង្រៀន មានទីលំនៅម្តុំសង្កាត់ទួលសង្កែ ខណ្ឌឫស្សីកែវ បានបើករថយន្តមកប៉ះរ៉ឺម៉កលក់ប្រហិតរបស់គាត់ រួចក៏បើកទៅបាត់។
ក្រោយមកមួយស្របក់ មន្ត្រីយោធាខាងលើក៏បានបើកបររថយន្តរបស់ខ្លួនម៉ាក ព្រូសពាក់ស្លាកលេខ2AM-6485 ឆ្លងកាត់ទីនោះ ក៏ស្រាប់តែបុរសអ្នកលក់ប្រហិតនោះបក់ដៃឲ្យឈប់ ហើយបានកាន់ដំថ្មគប់មកលើរថយន្តរបស់មន្ត្រីយោធានោះ បណ្តាលឲ្យបែកកញ្ចក់ខាងមុខ។
ប្រភពដដែលបន្តថា ភ្លាមនោះមន្ត្រីយោធាក៏បានឈប់រថយន្តចុះមកសួរនាំតែនៅពេលឃើញអ្នកលក់ប្រហិតនោះកាន់ដុំថ្មនៅដៃ ក៏ចូលក្នុងឡានយកកាំភ្លើងខ្លីមកភ្ជង់ និង វាយចំក្បាល របួសស្រាល ដើម្បីឲ្យបញ្ឈប់សកម្មភាព។ ភ្លាមៗនោះដែរសមត្ថកិច្ចមូលដ្ឋានបានមកទាន់ក៏អន្តរាគមន៍ឃាត់ខ្លួនទាំងសងខាងយកមកសួរនាំ។
ចំណែកភាគីខាងអ្នកលក់ប្រហិតវិញបាននិយាយថា រថយន្តម៉ាកបាឡែនស្រវឹងស្រា បើកមកប៉ះរ៉ឺម៉កគាត់កំពុងចៀនប្រហិតបណ្តាលខ្ទាតខ្លាញ់ត្រូវគាត់និងអ្នកទិញម្នាក់រលាក មិនព្រមឈប់ហើយបើករត់ទៀត។ នៅពេលគាត់តាមទាន់ នៅត្រង់ផ្លូវកែង ហាណូយ អ្នកជិះរថយន្តបាឡែនបានហៅបក្ខពួកជាមន្ត្រីយោធានោះឲ្យមកជួយអន្តរាគមន៍ ពេលនោះប្រជាជនបានគប់កញ្ចក់រថយន្តរបស់គាត់បែកខាងមុខ នៅពេលនោះសមត្ថកិច្ចបានមកទាន់ឃាត់ខ្លួនតែម្តង។
លោក វរសេនីយ៍ទោ គួក សុខហួរ អធិការរងផ្នែកព្រហ្មទណ្ឌខណ្ឌសែនសុខ បានមានប្រសាសន៍ថា ករណីនេះខាងសមត្ថកិច្ចបានទុកពេលឲ្យភាគីទាំង២នាក់ ធ្វើការសម្របសម្រួលគ្នាបញ្ចប់រឿងប៉ុន្តែ ភាគីខាងអ្នកលក់ប្រហិតចៀនមិនព្រម ទាមទារលុយសំណងជំងឺចិត្តរាប់ពាន់ដុល្លារឯណោះ ដូច្នេះអាចនឹងបញ្ជូនឲ្យពួកគេទៅដោះស្រាយនៅតុលាការវិញហើយ៕
Source: Kampuchea Thmey Daily
0 Comments