បំណែក​គ្រាប់បែក​របស់​អាមេរិក​ត្រូវបាន​រកឃើញ​នៅ​កន្លែង​វាយប្រហារ​លើ​រថយន្តក្រុង​ក្នុងប្រទេស​យេ​មែន​

អ្នកកាសែត​ក្នុងស្រុក​ម្នាក់​បាន​អះអាងថា គ្រាប់បែក Raytheon Mark 82 មួយ​គ្រាប់​ទំនងជា​ត្រូវ​បាន​ប្រើប្រាស់​ ដោយ​ក្រុមចម្រុះ​ដឹកនាំ​ដោយ​អារ៉ាប៊ីសាអ៊ូឌីត​ដើម្បី​វាយប្រហារ​រថយន្តក្រុង​ពោរពេញ​ដោយ​កុមារ​នៅ​ប្រទេស​យេ​មែន ​កាលពី​ថ្ងៃ​ព្រហស្បតិ៍​ បន្ទាប់ពី​បំណែក​គ្រាប់បែក​ចេញពី​កន្លែង​កើតហេតុ​ត្រូវ​បាន​គេ​រកឃើញ។

ក្រុមចម្រុះ​ដែល​ដឹកនាំ​ដោយ​អារ៉ាប៊ីសាអ៊ូឌីត​បាន​វាយប្រហារ​រថយន្តក្រុង​មួយគ្រឿង​នៅ​តំបន់ Dahyan នៃ​ខេត្ត Saada ដែល​គ្រប់គ្រង​ដោយ​ក្រុម Houthi កាលពី​ថ្ងៃ​ព្រហស្បតិ៍​ដែលជា​ហេតុ​បណ្តាល​ឲ្យ​មនុស្ស​ចំនួន​៥១​នាក់​ស្លាប់​ដោយ​ភាគច្រើន​នៃ​ពួកគេ​គឺជា​កុមារ​និង​រងរបួស​យ៉ាងតិច​៧៩​នាក់​ទៀត។

ខណៈពេល​មាន​ធូលី​ហុយ​ពេញ​នៅ​កន្លែងកើតហេតុ​រួមជាមួយ​នឹង​សាកសព​ឆេះ​ខ្ទេច​ត្រូវបាន​រកឃើញ​នោះ អ្នកស្រុក​បាន​រកឃើញ​បំណែក​គ្រាប់បែក​ដែល​ប្រើ​ក្នុងការ​វាយប្រហារ​នេះ​។​

រូបភាព​ពី​កន្លែងកើតហេតុ​ដែល​ត្រូវបាន​ចែករំលែក​ដោយ​អ្នកសារព័ត៌មាន Nasser Arrabyee បានបង្ហាញ​ពី​បំណែក​ដែល​ហាក់ដូចជា​គ្រាប់បែក MK-82 ទម្ងន់​៥០០​ផោន​ដែល​សហរដ្ឋអាមេរិក​ប​ន្ត​លក់​ទៅ​ឲ្យ​អារ៉ាប៊ីសាអ៊ូឌីត​។​

ខណៈពេលដែល​រូបថត​នៃ​បំណែក​នេះ​មិនទាន់​ត្រូវបាន​ផ្ទៀងផ្ទាត់​ដោយ​ឯករាជ្យ​នោះ បំណែក​នៃ​គ្រាប់បែក MK 82 បាន​លេចឡើង​ម្ដង​ហើយ​ម្ដងទៀត​ចំពេល​យុទ្ធនាការ​ទម្លាក់​គ្រាប់បែក​របស់​យេ​មែន​កំពុង​បន្ត​។

MK-82 បានធ្វើ​ឲ្យ​មានការ​ភ្ញាក់ផ្អើល​ម្តង​រួចមកហើយ​កាលពី​ឆ្នាំ​២០១៦​នៅពេលដែល​ក្រុមចម្រុះ​ដឹកនាំ​ដោយ​អារ៉ាប៊ីសាអ៊ូឌីត​បាន​ទម្លាក់​គ្រាប់បែក​លើ​សាល​សហគមន៍​មួយ​ក្នុង​ខេត្ត Sanaa អំឡុងពេល​ពិធី​បុណ្យសព​របស់ Sheikh Ali al-Rawishan ដោយបាន​សម្លាប់​មនុស្ស​ជាង​១៤០​នាក់​និង​រងរបួស​៥២៥​នាក់​។​

ការលក់​អាវុធ​ទៅ​ឲ្យ​ប្រទេស​អារ៉ាប៊ីសាអ៊ូឌីត​ត្រូវបាន​ថ្កោលទោស​ម្តង​ហើយ​ម្តងទៀត​ដោយ​អង្គការ​សិ​ទិ្ធ​មនុស្ស​ដែល​ចាត់ទុក​ពួកគេ​ថា​ជា​កត្តា​សំខាន់​មួយ​ក្នុង​ការធ្វើ​ឲ្យ​ចំនួន​អ្នកស្លាប់​កើនឡើង​នៅក្នុង​ប្រទេស​ដែល​ហែកហួរ​ដោយ​សង្គ្រាម​មួយ​នេះ​។​

យោងតាម​ការប៉ាន់ប្រមាណ​របស់​អង្គការសហប្រជាជាតិ​បាន​ឲ្យ​ដឹងថា មាន​មនុស្ស​ជាង​១០,០០០​នាក់​ត្រូវបាន​សម្លាប់​នៅក្នុង​សង្គ្រាម​រយៈពេល​បី​ឆ្នាំ​ហើយ​ការរាំងស្ទះ​របស់​អារ៉ាប៊ីសាអ៊ូឌីត​នៅតែ​បន្ត​រួមចំណែក​ដល់​ភាពអត់ឃ្លាន​និង​ជំងឺ​នៅក្នុង​ប្រទេស​នេះ​៕

​

Source: Kampuchea Thmey Daily