អ្នកប្រដាល់លន បញ្ញា សមាគមកីឡាប្រដាល់ក្រសួងការពារជាតិ និងសេន កុសល អ្នកប្រដាល់ក្លិបមោងឫស្សីមរតកគុនខ្មែរខេត្តបាត់ដំបង ជាអ្នកឈ្នះចុងក្រោយគេក្នុងការប្រកួតជម្រុះចុងក្រោយដំណាក់កាលទី១ នៃការប្រកួតដណ្តើមកំពូលជើងឯកTV5 Knock Out Series by K.Cement ទម្ងន់៦០គីឡូក្រាម កាលពីយប់ថ្ងៃទី០៤ ខែសីហា ឆ្នាំ២០១៨ នៅសង្វៀន TV5 ព្រែកកំពឹស។
លន បញ្ញា គេបានវាយឈ្នះអ្នកប្រដាល់នួន រ៉ាថេប ក្លិបតាឯកដំបងដែកមានរិទ្ធខេត្តព្រៃវែងដោយពិន្ទុ ក្នុងការប្រកួត ដែលមាន៣ទឹកនោះ។
នួន រ៉ាថេប គេចាញ់ពិន្ទុលនបញ្ញាដាច់តែម្តង ក្នុងការប្រកួតបីទឹកនោះ ពោលចាញ់៥ទល់នឹង០ គឺចៅក្រមកាត់ក្តីទាំង៥រូប បានផ្តល់ពិន្ទុអោយគេឈ្នះទាំង៥រូប ។ នៅក្នុងការប្រកួតនោះ នួន រ៉ាថេប ចាញ់ជង្គង់ និងជើងទាត់របស់លន បញ្ញា ដាច់តែម្តង ។
ដូច្នេះនួន រ៉ាថេប គេត្រូវជ្រុះធ្លាក់ចេញពីការប្រកួតដណ្តើមកំពូលជើងឯកTV5 Knock Out Series by K.Cement ទម្ងន់៦០គីឡូក្រាម ត្រឹមដំណាក់កាលទី១នេះ ។ ឯ លន បញ្ញា គេត្រូវនៅបន្តការប្រកួតក្នុងដំណាក់កាលទី២ទៀត។
សូមបញ្ញាក់ថា លន បញ្ញា នេះ គេជាអ្នក ជាប់ចំណាត់ថ្នាក់លេខ២ ក្នុងរដូវកាលចាស់ក្នុងប្រភេទទម្ងន់៥៧គីឡូក្រាម ដែលបានបញ្ចប់ទៅមុននេះ ។
ចំណែក សេន កុសល អ្នកប្រដាល់ក្លិបមោងឫស្សីមរតកគុនខ្មែរខេត្តបាត់ដំបង គេបានយកឈ្នះថន ភឿត ក្លិបឃ្លាំងមឿងកីឡាខេត្តពោធិសាត់ដោយពិន្ទុ ក្នុងការប្រកួតជម្រុះដំណាក់កាលទី១នេះដែរ ។
ថន ភឿត គេចាញ់សេន កុសល ដោយប្រផុតប្រផើយប៉ុណ្ណោះ គឺ២ទល់នឹង៣ ពោលក្នុងចំណោមចៅក្រមទាំង៥រូប គឺ២រូបពានពិន្ទុគេឈ្នះ តែ៣រូបទៀតបានឲ្យសេន កុសលឈ្នះ ។ដូច្នេះ សេន កុសល គេនៅបន្តការប្រកួតនៅក្នុងដំណាក់កាលទី២បន្តទៀត ឯថន ភឿត ត្រូវជ្រុះធ្លាក់ត្រឹមនេះ ។ថន ភឿត ចាញ់ត្រង់មិនសម្រុកចូលវាយមុន ទុកអោយកុសលចូលវាយមុនរហូត ។
ចំពោះ ការប្រកួតជាលក្ខណះមិត្តភាពអន្តរជាតិរវាងអ្នកប្រដាល់ទម្ងន់ធ្ងន់កម្ពុជានិង ថៃវិញនោះ អ៊ុង
វិរៈ អ្នកប្រដាល់ជើងខ្លាំងទម្ងន់ធ្ងន់នៃក្លិបកងពលតូចទ័ពឆ័ត្រយោង៩១១ បានផ្តួលអ្នកប្រដាល់ទម្ងន់ធ្ងន់ថៃ Krak Boe Lek អោយបោះបង់ចោលការប្រកួតក្នុងទឹកទី៣ ។
Krak Boe Lek អ្នកប្រដាល់ថៃទម្ងន់ធ្ងន់ គេប៉ិះតែបោះបង់ការប្រកួតនៅក្នុងទឹកទី២ម្ល៉េះ បន្ទាប់ពីត្រូវមួយជង្គង់របស់អ៊ុង វិរៈ អុកត្រូវចុងឆ្អឹងជំនីខ្ចី និងដាល់ត្រូវមុខថែមមួយដៃទៀតនោះ ប៉ុន្តែដោយសារបញ្ចប់ទឹក គេក៏បន្តការប្រកួតទៀត ។ ប៉ុន្តែយ៉ាងណា Krak Boe Lek នៅតែចៀសមិនផុតពីបោះបង់ការប្រកួតក្នុងដើមទឹកទី៣ដែរ ដោយសារត្រូវកណ្តាប់ដៃដាល់របស់អ៊ុង វិរៈ នោះ ។
ដោយឡែក ប៊ីចាន់ណា អ្នកប្រដាល់ក្លិបមហិទ្ធរិទ្ធមេសរថ្ងកមកពីខេត្តស្វាយរៀង បានវាយឈ្នះសេក គឹមរួន អ្នកប្រដាល់ក្លិបអង្គរមានជ័យខេត្តសៀមរាប ក្នុងទឹកទី៣ ។ គឹមរួន ត្រូវចាន់ណា វាយកែងបែករយះចេញឈាមធំលើចិញ្ចើមខាងឆ្វេង បណ្តាលឲ្យឈាមហូរកាត់ភ្នែករំខានដល់ការប្រកួត ហើយត្រូវគ្រូពេទ្យបញ្ឈប់លែងឲ្យប្រកួតតែម្តង៕
Source: Kampuchea Thmey Daily
0 Comments