រតនគិរី ៖ ស្ត្រីជនជាតិគ្រឹងវ័យចំណាស់ម្នាក់ ដេកស្លាប់សង្ស័យខ្យល់គរក្រោយពីបានផឹកស្រាស្រវឹងមិនហូបបាយក្នុងពិធីសែនព្រេនមួយ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង១២និង៣០នាទី រំលងអធ្រាត្រឈានចូលថ្ងៃទី៦ ខែសីហា ឆ្នាំ២០១៨ នៅត្រង់ចំណុចផ្ទះសែនមួយកន្លែង ស្ថិតនៅក្នុងភូមិថារ៉ងជង ឃុំអូរជុំ ស្រុកអូរជុំ។
លោក ខាត់ សុផលនាយប៉ុស្តិ៍អូរជុំ បានឲ្យដឹងថា ជនរងគ្រោះឈ្មោះ ឡាត់ ម៉ាលើយ អាយុ៥០ឆ្នាំ ជនជាតិគ្រឹង មុខរបរធ្វើចម្ការ រស់នៅភូមិឃុំកើតហេតុខាងលើ ហើយជនរងគ្រោះបានមកចូលរួមធ្វើពិធីសែននៅផ្ទះរបស់ឈ្មោះ ម៉ៅ តាច ភេទប្រុស កាលពីល្ងាចថ្ងៃទី៥ ខែសីហានេះ ត្រូវជាបងប្អូននៅភូមិជាមួយគ្នា ពេលគាត់សែនរួចហើយក៏មានកម្មវិធីស៊ីផឹកបន្តិចបន្តួច. ខណៈជនរងគ្រោះបានផឹកស្រាស្រវឹងមិនហូបបាយទៀត បន្ទាប់មកជនរងគ្រោះស្រវឹងមិនទៅផ្ទះវិញទេ គាត់ក៏សុំដេកនៅផ្ទះសែននោះតែម្តង។
ក្រោយកើតហេតុសមត្ថកិច្ចជំនាញចុះមកត្រួតពិនិត្យនឹងធ្វើកោសល្យវិច័យលើសាកសពឃើញថា ពុំមានស្លាកស្នាមអ្វីឡើយ ហើយបានប្រគល់ទៅឲ្យសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments