ភ្នំពេញ ៖ ក្រោយទឹកស្រក នឹងមានការស្តារឡើងវិញជាបន្ទាន់នូវអ្វីដែលបានទទួលរងការខូចខាតដូចជាផ្ទះសម្បែង ទ្រព្យសម្បត្តិ ផលដំណាំនិងហេដ្ឋារចនាសម្ព័ន្ធផ្សេងៗទៀត របស់បងប្អូនប្រជាពលរដ្ឋ។ នេះបើតាមការអះអាងបញ្ជាក់ពីគណៈកម្មាធិការជាតិគ្រប់គ្រងគ្រោះមហន្តរាយ ក្នុងការឱកាស អញ្ជើញចុះពិនិត្យមើលស្ថានភាពទឹកជំនន់ក្នុងខេត្តក្រចេះ និងខេត្តស្ទឹងត្រែង កាលពីពេលថ្មីៗនេះ។
លោកទេសរដ្ឋមន្ត្រី ញឹម វណ្ណដា អនុប្រធានប្រចាំការគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងថា ក្រោយគ្រោះទឹកជំនន់បានធ្វើឲ្យខូចខាត និងបំផ្លិចបំផ្លាញនូវហេដ្ឋារចនាសម្ព័ន្ធនេះ យើងកំពុងរកវិធានការបែបណាក្នុងការស្តារឡើងវិញ នូវអ្វីៗដែលទទួលរងការខូចខាត ជាពិសេស រួមទាំងការស្តារឡើងវិញនូវជីវភាពរបស់បងប្អូនប្រជាពលរដ្ឋ ខណៈដែលប្រពលរដ្ឋប្រមាណជា ជាង៧ពាន់គ្រួសារ ត្រូវបានខ្វះស្បៀងនាពេលខាងមុខ។
លោកក៏បានជំរុញឲ្យមន្ទីរ និងអាជ្ញាធរពាក់ព័ន្ធ ត្រូវធ្វើសំណើអំពីផលប៉ះពាល់នៅទឹកជំនន់នេះ ទៅគណៈរដ្ឋមន្ដ្រី ដើម្បីស្ដារឡើងវិញនូវអ្វីដែលខូចខាតក្នុងមូលដ្ឋានរបស់ខ្លួន។
សូមបញ្ជាក់ថា មានខេត្តចំនួន៤ ដូចជាស្ទឹងត្រែង ក្រចេះ កំពង់ចាម និងត្បូងឃ្មុំ បានទទួលរងគ្រោះពីទឹកជំនន់ទន្លេមេគង្គលើ បណ្តាលឲ្យពលរដ្ឋជាង ១ម៉ឺនគ្រួសាររងការប៉ះពាល់ និងដំណាំផ្សេងៗជាច្រើនត្រូវបានបំផ្លាញ ជាពិសេស ខេត្តស្ទឹងត្រែងបានរងផលប៉ះពាល់ធ្ងន់ធ្ងរជាងគេដោយសារការបាក់ទំនប់វារីអគ្គិសនីនៅប្រទេសឡាវ។
គួរបញ្ជាក់ផងដែរថា សម្រាប់នៅថ្ងៃទី០៦និងទី០៧ ខែសីហា ឆ្នាំ២០១៨នេះ កម្ពស់ទឹកនៅខេត្តកំពង់ចាមនិងត្បូងឃ្មុំបាននិងកំពុងឡើងខ្ពស់ និងជន់លិចផ្ទះប្រជាពលរដ្ឋនូវឡើយទេ ហើយអាជ្ញាធរដែនដីនិងមន្ទីរជំនាញក៏បាននិងកំពុងយកចិត្តទុកដាក់យ៉ាងខ្លាំងលើបញ្ហានេះផងដែរ ក្នុងការត្រៀមសង្គ្រោះប្រជាពលរដ្ឋ បើសិនមានបញ្ហាអ្វីមួយកើតឡើង៕
Source: Kampuchea Thmey Daily
0 Comments