ស​.​ប​.​ក ប្រកាស​កាលបរិច្ឆេទ​ល​ក់​សំបុត្រ​ចូល​ទស្សនា​ប្រកួត​មិត្តភាព​អន្តរជាតិ​រវាង​កម្ពុជា​ជាមួយ​ម៉ាឡេស៊ី

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បានប្រកាស​ពី​កាលបរិច្ឆេទ​ក្នុង​ការ​ដាក់លក់​សំបុត្រ​សម្រាប់​អ្នកគាំទ្រ​ដើម្បី​ត្រៀម​ចូល​ទស្សនា​ប្រកួត​មិត្តភាព​អន្តរជាតិ​រវាង​ក្រុម​ម្ចាស់ផ្ទះ​ជម្រើសជាតិ​កម្ពុជា ជាមួយ​ក្រុម​ភ្ញៀវ​ជម្រើសជាតិ​ម៉ាឡេស៊ី ដែល​នឹង​ធ្វើឡើង​នៅ ខែកញ្ញា ខាងមុខ​។



បើ​តាម​ការ​បញ្ជាក់​តាម​រយៈ​ទំព័រ​ហ្វេ​ស​ប៊ុ​ក​របស់​សហព័ន្ធ​កីឡាបាល់ទាត់​កម្ពុជា បាន​លើក​ឡើង​ថា ​សំបុត្រ​នឹង​ចាប់ផ្តើម​លក់​នៅ​ថ្ងៃទី​០១ ខែកញ្ញា ឆ្នាំ​២០១៨ ពី​ម៉ោង ៩និង០០​ព្រឹក ដល់​ម៉ោង ៥និង០០​ល្ងាច​នៅ​ពហុ​កីឡដ្ឋាន​ជាតិ សម្រាប់​ការប្រកួត​មិត្តភាព​អន្ដរជាតិ​កម្ពុជា នៅ​វេលា​ម៉ោង​៦និង៣០​ល្ងាច ក្នុង​ថ្ងៃទី​១០ ខែកញ្ញា ឆ្នាំ​២០១៨ លើ​ទីលាន​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ​។



សូម​បញ្ជាក់​ថា ​ក្រោយ​ប្រកាស​តែងតាំង​កីឡាករ Keisuke Honda ជា​អ្នកចាត់ការ​ទូទៅ​ក្រុម​ជម្រើសជាតិ​កម្ពុជា សហព័ន្ធ​កីឡាបាល់ទាត់​កម្ពុជា​បាន ត្រៀម​រៀបចំ​កម្មវិធី​ប្រកួត​មិត្តភាព​អន្តរជាតិ​ចំនួន​៤​ប្រកួត​ជាមួយ​ក្រុម​ជម្រើសជាតិ​មួយចំនួន​នៅក្នុង​តំបន់ មុន​ចេញទៅ​ចូលរួម​ប្រកួត​ក្នុង​ពានរង្វាន់ AFF Suzuki Cup ឆ្នាំ​២០១៨ ចុងឆ្នាំ​នេះ​។​

យោង​តាម​ប្រភព​មកពី​សហព័ន្ធ​កីឡាបាល់ទាត់​កម្ពុជា បាន​បញ្ជាក់ថា​ ការប្រកួត​មិត្តភាព​ទាំង​៤​លើក​នេះ​មាន​បូក​ទាំង​ប្រកួត​ជាមួយ ក្រុម​ជម្រើសជាតិ​ម៉ាឡេស៊ី ផង​ដែរ​។ ចំណែក​៣​ប្រកួត​ផ្សេងទៀត​នឹងធ្វើ​ឡើង​នៅ​១២ ខែតុលា ពោលគឺ​ប្រកួត​ជាមួយ​ក្រុម​ជម្រើសជាតិ​ទី​ម័​រ​ខាងកើត និង​នៅ​ថ្ងៃទី​១៦ ខែតុលា ប្រកួត​ជាមួយ​ក្រុម​ជម្រើសជាតិ​សិង្ហ​បុរី​។ ចុងក្រោយ​នៅ​ថ្ងៃទី​២ ខែវិច្ឆិកា កម្ពុជា ត្រូវ​បន្ត​ប្រកួត​ជាមួយ​ក្រុម​បរទេស (​មិនទាន់​ប្រាកដថា​ក្រុម​ណា​)​។



បើ​និយាយ​ពី​ពានរង្វាន់ AFF Suzuki Cup 2018 ឆ្នាំនេះ​បែងចែក​ប្រកួត​ជម្រុះ​ជា​២​វគ្គ​ដោយ​ក្នុងនោះ​មាន​វគ្គ​ជម្រុះ​បឋម​និង​វគ្គ​ជម្រុះ​តាម​ពូ​ល​មុន​ស្វែង​រក​ឃើញ​ក្រុម​ខ្លាំង​ឡើង​ទៅ​ដណ្តើម​ជើងឯក​។ ប្រកួត​វគ្គ​ជម្រុះ​ដំបូង​ក្រុម​ទី​ម័​រ​ខាងកើត ត្រូវ​ប៉ះ​ប្រ៊ុយណេ ចំនួន​២​ជើង​គឺ​ប្តូរ​ទឹកដី​គ្នា​ដោយ​នៅ​ថ្ងៃទី​៣ ខែកញ្ញា ឆ្នាំ​២០១៨ ធ្វើឡើង​នៅ​ប្រទេស​ទី​ម័​រ​ខាងកើត ហើយ​ជើង​ទី​២ ធ្វើឡើង​នៅ​ថ្ងៃទី​១១​ខែកញ្ញា ឆ្នាំ​២០១៨ ធ្វើឡើង​នៅ​ប្រទេស​ប្រ៊ុយណេ​។ ក្រុម​ឈ្នះ​នៅ​វគ្គ​ជម្រុះ​នេះ​ទទួលបាន​កៅអី​ឡើង​ទៅ​ប្រកួត​វគ្គ​ជម្រុះ​តាម​ពូ​ល​ជា​បន្ត​ជាមួយ​ក្រុម​៩​ផ្សេងទៀត​។

ក្រុម​ដែល​ចាំ​នៅ​វគ្គ​ជម្រុះ​តាម​ពូ​ល​បាន​ចាប់ឆ្នោត​រួចរាល់​គឺ​ពូ​ល A មាន​វៀតណាម ម៉ាឡេស៊ី មី​យ៉ាន់​ម៉ា កម្ពុជា និង​ឡាវ ខណៈ​ពូ​ល B មាន​ថៃ ឥណ្ឌូណេស៊ី ហ្វីលីពីន សិង្ហ​បុរី និង​ក្រុម​ឈ្នះ​នៅ​វគ្គ​ជម្រុះ​អាចជា​ប្រ៊ុយណេ ឬ​ទី​ម័​រ​ខាងកើត​។ តាម​គម្រោងការ​វគ្គ​ជម្រុះ​តាម​ពូ​ល​នេះ​នឹង​ធ្វើ​ឡើ​ចាប់ពី​ថ្ងៃទី​៨ ខែវិច្ឆិកា ដល់​ថ្ងៃទី​១៥​ខែធ្នូ ឆ្នាំ​២០១៨​។

សម្រាប់​កម្មវិធី​ប្រកួត​ជម្រុះ​ពូ​ល A របស់​ក្រុម​កម្ពុជា វិញ​នឹង​ប្រកួត​បើកឆាក​ប៉ះ​ក្រុម​ម៉ាឡេស៊ី នៅ​ថ្ងៃទី​៦ ខែវិច្ឆិកា នៅ​រាជធានី​ភ្នំពេញ ខណៈ​ត្រូវ​ប៉ះ​ម្ចាស់ផ្ទះ​មី​យ៉ាន់​ម៉ា នៅ​ថ្ងៃទី​១២ ខែវិច្ឆិកា នៅ​ទីក្រុង​រ៉ង់​ហ្គូ​ន រហូតដល់​ថ្ងៃទី​២០ ខែវិច្ឆិកា ក្រុម​កម្ពុជា ត្រូវ​ប៉ះ​ឡាវ នៅ​រាជធានី​ភ្នំពេញ ហើយ​នៅ​ថ្ងៃទី​២៤ ខែវិច្ឆិកា ត្រូវធ្វើ​ដំណើរ​ទៅ​ប៉ះ​ម្ចាស់ផ្ទះ​វៀតណាម នៅ​ទីក្រុង​ហាណូយ​៕

   

Source: Kampuchea Thmey Daily